Read idege EJE ỌNYỊỊLA 45 Bible Online

EJE ỌNYỊỊLA 45 - idege bible

EJE ỌNYỊỊLA 45

¹Ala ị-kpụ ịpyọ myịm i-irya, m̀ jam mwu eje ọnyịịla ọlẹ ha adịrahụ. Ẹlẹlẹ nyam rụ ala lala ang ọdụpwụ nya akịraa ọnyịịla.

²À há uhi gụ ọlẹng ọhẹ-lọhẹ ọkịla wuu, ọnụ nyang tịtị rụ ala chọ́ọ̀! Ohe Oluhye wahị kụrụng ụka wuu.

³Adịrahụ ọtụka ee, ya oge nyang ba ọkụkụ mẹ, à la ụmụmẹ-ẹ la, à kpụ ẹhị kpụ!

⁴Bwula ọngịrị nyang, kịnyaa lọkụrụ-kụrụ, nyọka kpa ẹla-ịlẹhị bala ang ọ-họ kpakpa nyang kịlahị, ká ọngịrị nyang ā họ ang ẹbyẹbyị.

⁵Ịcha nyang chakpa ru ẹhị! Ị chị aluji nyang ọ-ọkịlẹtụ, à kpa ẹpwụma lụmẹ-lụmẹ nọnọ, ị chị bẹlẹ-bẹlẹ e-ekpeleji nya ata nyang.

⁶Ohe Oluhye ee, ẹchị-adịrahụ nyang ka juwa gbe oyi myị oyi, Adịrahụ oriri nyang ri nya ọ-kpa ọpyị lọkpẹẹkpẹẹ.

⁷Ang ọnyịịla à háng lẹ, ang ọtịpyọ wụng ẹjẹ, ịnyị à du ká Ohe Oluhye, Ohe Oluhye nyang chụng, ya ọkẹkẹnị wụng pwọ̀ọọ lala ida gụ angị ri iko nyang wuu lẹ.

⁸Ang ịkụrụ-kụrụ nyang ri oru-oru ọ-chị kwọkwọ nya ịmaa bala alo bala ikechiya. Ẹ-ẹpwa nya adịrahụ ọlẹ kị kpa ẹngịrị nya inyi họ ịnyangga alayịlọ juwa du ayịlọ jung lẹnwụ ụma ịdatị-datị.

⁹Anyị anyang nya ịdịrịhụ ri angịhyẹ nya anyang ilihi-ihi nyang. Adịrahụ ọnyang ọlẹ kọ ri ahụ onyeewe nyang godayị u-upwuriri nyang lịjańg ịlahịchịng ịlẹ kị họ lokpokpo ịgọm o-bwu Ofii.

¹⁰Ahụ onyeewe nya adịrahụ ee, ke ụrụ lam ká wo yẹẹyẹẹ mẹ, deeri nya angịnyị nyang bala ugbiyegu nya adang anyị mẹ.

¹¹Ụhị nyang adịrahụ ọrụng à tịtọ lẹ, aa jwọọ ihi mẹ, chajị ọwa-à ri ayịbang lẹ.

¹²Angị bwu epweji nya ịTaya ka kpa ang-ahị warị kaka họ oyiri nyang, Alụdụ ka tịtọ nyọka yeng ye.

¹³Ọnyị ọnyang nya adịrahụ juwa ẹ-ẹpwang nyamwụ, ọ chakpa há ụhị! Ị kpa okpoko ịgọm nọmwụ ju awụrụ nyamwụ.

¹⁴Ị kpọọ wẹ ẹga nya adịrahụ lịwụrụ ị-chị ịna datị-datị ịnyịịla nyamwụ, anjwo ịyang nyamwụ tọọ da kele ịnyịnyị.

¹⁵Ị jẹ kele lọkẹkẹnị bala ẹhụ, juwa jụ ka ẹpwa nya adịrahụ.

¹⁶Anyị alẹng nyang ka ri ịdịrịhụ jaabwọ ká adaa igogo anyị ri. A ka gyaa ri alegbeju tu ẹga myị ẹga nya odehe ọlẹ da.

¹⁷M̀ ka họ ká ẹnyị nyang ka lehe, loyi ọnyị myị ọnyị, ká alẹpwụma wuu ka gwogbo hang gbe oyi myị oyi. Eje Ọnyịịla ọlẹ ri nya anyị ịtụma nya iKora.