Read idege EJE ỌNYỊỊLA 48 Bible Online

EJE ỌNYỊỊLA 48 - idege bible

EJE ỌNYỊỊLA 48

¹Amkpaa chakpa lụmẹ! Ọ chila kahị ka gwogbo họọ lụmẹ-lụmẹ e-epweji nya Ohe Oluhye nyahị, ọ-ọgbọdọ ọlịgọgọ nyamwụ.

²Uhye ọlala nya ọgbọdọ nyamwụ há ụhị, ọ kpa ọkẹkẹnị wẹ odehe wuu, ọgbọdọ nya iSayon lala ịgbọdọ ikuu ịlẹtẹ, ọwa-à ri epweji nya adịrahụ ọtụka lẹ.

³Ohe Oluhye juwa e-ebe ịnyịịngịrị ịlụwa, ọ mẹ ịlọmwụ jẹ nyori ọwa-à kaa ma uya yọọ dada lẹ.

⁴Ịdịrịhụ yẹkpẹ chawụlẹ, wẹ kaka dẹwụ ta epweji ọwẹ.

⁵Ụka kị yọọ, ọ laa ahịbwuu, ị mwụ ata bịmwụ ọọ-la uhi ojuju.

⁶Uhi gbaa ekpinegu, ị che bwẹ̀ẹ́bwẹ̀ẹ́ lala ọnyang o-okube,

⁷lala agbọ nya enyi ịtụka i-bwu ịTaachichi, ká igbachịwụ o-bwu ọmwẹnụ-ụtụrụ kaa daa iloyiilo.

⁸Ene-ene, ahị wo lụrụ-ụrụ ang ịlẹ ká Ohe Oluhye họ, ọlẹẹlẹẹ lẹ, a yọọ lẹhị e-epweji nya Amkpaa Agụgụ, e-epweji nya Ohe Oluhye lẹ, epweji ọlẹ ká Ohe Oluhye ka chẹwụ ke pyịyọọ.

⁹Ohe Oluhye ee, ahị wẹ Ube Ịgọgọ nyang nyọka me irya ju ọháha o-gbu enyi-ka nyang.

¹⁰Ohe Oluhye ee, ị wo ẹnyị nyang gu onwu gu ọba, ị la gwogbo hang pwụ ẹga myị ẹga nya odehe wuu, ụbwọ upwuriri nyang myị̀ lọkụrụ-kụrụ.

¹¹Ọgbọdọ nya ịSayọn chị ọkẹkẹnị! Epweji ịla iJuda wuu chị ọkẹkẹnị, chajị a kaa chị eje kpakpa.

¹²Anụ jẹ dagaga ju iJerusalẹm, kanụ wa ebe iluhye ịlụwa wẹẹ.

¹³Jẹ jaabwọ kị lọngịrị wẹẹ, yẹ ẹpwa nya adịrahụ wẹẹ, chajị kanụ ka jẹ-ẹ̀ tịrọnụ ya je aloyi olijuju.

¹⁴Ohe Oluhye ọlẹ à ri Ohe Oluhye nyahị gbe oyi myị oyi lẹ. Ọ ka kpahị ụgbẹyị kịlahị pyịyọọ. Eje Ọnyịịla nya anyị ịtụma nya iKora.