Read idege EJE ỌNYỊỊLA 49 Bible Online

EJE ỌNYỊỊLA 49 - idege bible

EJE ỌNYỊỊLA 49

¹Anụ ke ụrụ wo ẹla ọlẹ! Anụ alụma wuu. Anụ ke ụrụ oo, anụ alodehe ọlẹ wuu.

²Anụ ke ụrụ oo, anụ angịtụka bala ichiche, tụ alụdụ bala alẹbyahị wuu lawụlẹ.

³Ẹla oyaya nyam ri nya ẹla ọjẹjẹ, m̀ yọọ bwu ọkịlẹtụ nyam bwula ang ọjẹjẹ.

⁴M̀ ka kụ irya ju etu ọdada, m̀ ka kpa ogum̀ du, kpa etu nyam da wụlẹ.

⁵Ḿ ka ju uhi ụka ká akama-á pwụ eji ka, aluji-í yẹm yẹ dada, ḿ ju uhi ka.

⁶Ịwa dahịhile okpoko, juwa chị ọgọm ju ụdụ nyaa.

⁷Ọngọhẹ-ẹ́ ka ra ọhịhị nya nya ịlọmwụ tịrẹkpẹ myị ka, ọ-nyẹ ọhịhị nya ịlọmwụ lokpoko bwu ẹga nya Ohe Oluhye myị ka,

⁸chajị uri nya ọhịhị la ịnya lụmẹ, ịngịngịhyẹ-ẹ́ nwà ụga kpụ ọ-ka ya nwụ uri nya ọngịnyị

⁹chajị ká ọngọọwa ka hị pyịyọọ, la ọ-yẹ igu ẹ-ẹhị ka lẹ ka.

¹⁰Anụ tị́ jẹ lẹ, angị jẹ ẹla jẹ kaa gbu, aluchi bala alẹmwa kaa gbu ịnyịnyị, ịị pẹhi ụdụ nyaa ha angịkịla.

¹¹Iworu nyaa-à ri ẹpwa nyaa pyịyọọ lẹ, ị ka kụ ụwa gbe oyi myị oyi, ịnọ, ị tị la ịpyị nya ịlaa lụbwọ-lẹta kpá ẹnẹhẹ lẹ.

¹²Ọngọngọhẹ-ẹ́ ka hị pyịyọọ, chajị nyori ọ ri ọlụdụ koo, ọ ka gbu ẹnẹhẹ mwụnẹkẹ lala iyo oleji wẹẹ.

¹³Ẹbyị ọlẹ kọ ka họ angị dahịhile ịlaa, tụ angịlẹ ká ụdụ ọkpụkpụ nyaa waa ẹpwụ lẹ à wẹ lẹ.

¹⁴Ị ka gbu lala ịkpịlọ, igu à ka gbaa gbe lẹ. Alabwẹla ọnyịịla ka ri alegbeju nyaa, egu nyaa ka mama i-iworu, hwẹẹ hi ẹpwa ịtụka ịlẹ kị nwụ ha ịlaa.

¹⁵Ohe Oluhye tị ka chị ọhịhị nyam da, ka kpam be hi ọngịrị nya igu.

¹⁶Ā ju uhi ụka ká yẹ ká ọngọhẹ-ẹ́ nwa kaka ri ọlụdụ, ká ang ọlala nyamwụ juwa nwa kịlahị-ịlahị ka.

¹⁷Ọ́ ka jẹ-ẹ̀ kpa ịngịngịhyẹ ba ịlọmwụ ẹnụ nya igu ka, ụdụ nyamwụ-ụ́ ka tọọ jẹ ka iworu ka.

¹⁸Ịnọ, ọ wa ịlọmwụ nya ọlụrụrụ ọháha ụka nya ọhịhị nyamwụ, ị mịla oja họ chajị nya ịlahị ọkaka nyamwụ kpá,

¹⁹ọ tị ka ka ẹga ka adamwụ igogo anyị ji, kị ka jẹ-ẹ̀ yẹ ahịgboo nya ẹnụ ẹnẹnẹhẹ kaka.

²⁰Ọngọngọhẹ-ẹ́ ka hị pyịyọọ, chajị nyori ọ ri ọlụdụ koo, ọ ka gbu ẹnẹhẹ mwụnẹkẹ lala iyo oleji wẹẹ. Eje Ọnyịịla nya Asafụ.