Read idege EJE ỌNYỊỊLA 50 Bible Online

EJE ỌNYỊỊLA 50 - idege bible

EJE ỌNYỊỊLA 50

¹Amkpaa Ohe Oluhye Agụgụ wẹẹ ya ẹla, ọ juwa wụrụ alodehe wuu wẹ ịlahị nya eje bwu ọmwẹnụ-ụtụrụ lalaala ka ju ka ọmwẹnụ-obyi.

²Ohe Oluhye juwa hụ́ myịrị-myịrị ẹ-ẹpwụ nya ụmụmẹ nyamwụ bwu ịSayọn epweji ọlụhị.

³Ohe Oluhye nyahị juwa pwụ eji, ọ́ juwa wẹ lọnụ-ujiji koo, ila juwa rụ ang hụrụ ị-ịlahị nyamwụ, igbachịwụ ọnyọọngịrị nyi dagaga jwọọ.

⁴Ọ wụrụ epwoohe bala odehe kaka hụhụ nya alibeenu, nyọka wo jaabwọ kọ ka la angịnyị nyamwụ eje.

⁵Ọ yẹkẹẹ, “Anụ wụrụ angị ịkpẹẹkpẹẹ nyam wẹ ẹga nyam, ịwa angị nwa iro tam bwula ọ-kịla iya ham.”

⁶Alepwoohe ya ang ọnyịịla ọhọhọ nya Ohe Oluhye dodehe yẹkẹẹ, “Ọwa-à ri ọngọ leje nya ịlẹhị lẹ.”

⁷Ohe Oluhye yẹkẹẹ, “Anụ angịnyị nyam ee, anụ ke ụrụ wo ẹla ọlẹ kam wẹẹ ya mẹ, Anụ ala Isirẹlụ ee, m̀ ka gbe ẹla junu, Am a ri Ohe Oluhye, Ohe Oluhye nyanụ lẹ!

⁸Aajị nya iya ịlẹ kanụ-ụ̀ kịla lee ajị nya iya ị-rụ ila ịlẹ kanụ-ụ̀ kpa wam ụka wuu m̄ wẹẹ yalibyi lanụ ka.

⁹Ḿ tị tịtọ nya ịna i-bwu ẹrụ nyanụ lee ịmwụ i-bwu iku nyanụ kaka.

¹⁰Anụ tị́ jẹ lẹ, iyo ịlẹpwamẹ wuu ri ịnyam, am-am à la ịna iluhye nya iru nya ịgbọdọ wuu lẹ.

¹¹Ịchịnụ ịlẹpwamẹ wuu ri ịnyam, Ang ọhịhị ọnyị myị ọnyị ẹ-ẹpwamẹ ri ịnyam.

¹²“Imyi-í nwụm-m nwụ, anụ me kam ka kpaa ọọwa kaka tọnụ-ụ̄, anụ tị́ jẹ ká odehe ọlẹ wuu tụ ang ịlpwụ nyamwụ wuu ri ịnyam.

¹³Ḿm̀ ri iyo nya ịna ka, ḿ tịị nwa ịwọ nya ịmwụ koo.

¹⁴Obe o-ji Ohe Oluhye ji ā ri iya ọkịlaakịla nyanụ, kanụ họ ọnụ ọmyịmyị nyanụ jịra ẹ-ẹga nya Agụgụ mẹ.

¹⁵Anụ wụrụm ụka nya akama mẹ, m̀ ka chịnụ da. Ọọwa anụ ka gwogbo ham lẹlẹ.”

¹⁶Ohe Oluhye tị juwa byi alabwẹla onyobyi yẹkẹẹ, “Ịyẹ tị́ kanụ tụtụm juwa kpa ehile nyam ma ya lee ọ-kpa ẹla nya iro nyam ọ-ọnụ wẹẹ?

¹⁷Anụ tị́ pwa am nyị nwụ̀ ịwa rịrị kaka, ānụ nyẹẹkpẹ da ehile nyam lala ang ohideeji lẹ.

¹⁸Ánụ yẹ oyi, ànụ ri igu tọọ, ánụ yẹ alụya, anụ ji ogu nyaa.

¹⁹“Anụ kaa hụ́ momoomo nyọka ya ẹla ọtịpyọ, ọnọọkịla omeme-éè bwunu agaga ka.

²⁰Anụ kaa hụhụ juwa ya ẹla ba aananụ— angị ri aananụ bwu igbeene ri, anụ bịraa ẹnyị.

²¹M̀ hu ujiji ụka kanụ wẹẹ họ ang ịwẹ wuu, anụ ka me kpá kam lala anụ. M tị ka yalibyi lanụ ugbẹnyị lẹ, m̀ ka chị ẹla baanụ a-ahị nyanụ.

²²“Anụ angị nyẹẹkpẹ dam am Ohe Oluhye ee, anụ ju ẹla ọlẹ ẹjẹẹ mẹ, ó-ri ịnyị ka, m̀ ka hụlaanụ hwẹẹhwẹẹ, ọngọngọhẹ-ẹ́ tị ka juwa nyọka chịnụ da ka.

²³Obe o-jim am Ohe Oluhye ji à ri iya ọkịlaakịla ọlẹ kọ ya ihi ham lẹ. Ọng myị ọng ọlẹ kọ ba ụgbẹyị nyam jẹ kpẹẹkpẹẹ aalẹ, m̀ ka chị ọngọọwa wuu da.” Eje Ọnyịịla nya iDevidi ọlẹ ri nya olegbeju nya angị mwu eje. Ị dọọ ụka ká ịNatan ọlọmwụ ka ẹga nya iDevidi ẹ-ẹkpẹ nyọlẹ ká iDevidi họ ụya ta ịBatịchaba kpá.