Read idege EJE ỌNYỊỊLA 51 Bible Online

EJE ỌNYỊỊLA 51 - idege bible

EJE ỌNYỊỊLA 51

¹Ohe Oluhye ee, yẹ ahyẹẹrwẹrwa nyam jaabwọ ká ọháha o-gbu enyi-ka nyang la. Ajị nya ahyẹẹrwẹrwa ọtụka nyang lẹ, yịlẹ ang ịtịpyọ ịlẹ wuu kam họ!

²Hụ́ abyị ọlala nyam wuu hụrụ, ká yịlẹm kam la charị-charị bwu ẹpwụ nya ịhọbịrị nyam!

³M̀ jẹ abyịkọtọ nya ịlọm, ị tị́ wẹẹ be dịrẹm lodu bala alẹnụ.

⁴M̀ họ ang onyobyi bang, ahụ gbeng-ng m̄ họ ang ọtịpyọ ba-à wẹ lẹ. Ẹla oyaya nyang la kpakpa, eje ọlẹ ká lam la kpẹẹkpẹẹ.

⁵M̀ ri ọlọhọbịrị bwu ẹnụ kị mam gbee daalẹ, bwu ụka-ụka ká ịnam jẹnyị nyam lẹ, m̀ ri ọlọhọbịrị.

⁶Ẹla o-bwu ọkịlẹtụ kpehe ā tịtọ lẹ, mẹ ẹla ọjẹjẹ jẹm kam ka jẹ ẹla chẹpwụ-chẹpwụ.

⁷Tụ ọhọbịrị nyam kịnyaa kam la charị-charị, hụ́m cheri-cheri, kam ka pwo gụ ara.

⁸Họ kam ya ụrụ wo ẹla nya ọkẹkẹnị bala ẹhụ chẹẹ. Ịnọ à dum abwọ kpá yịgẹ-yịgẹ, tị họ kam ya ụya chẹẹ mẹ.

⁹Gu ahị nyang gboo hi ịhọbịrị nyam, ká yịlẹ ang inyibyi ịlẹ kam họ wuu.

¹⁰Ohe Oluhye ee, ya ọkịlẹtụ ọcharị-charị jum, ya olegu onyeewe ọlẹ kọ ka dịrẹng kpẹẹkpẹẹ jum.

¹¹Ā kum rụ hi ẹga nya ịlọng lee ọ-kpa olegu ịgọgọ nyang rụ him ka.

¹²Ya ọkẹkẹnị o-bwula ọchịda nyang ham myịmyị, họ kam ka myị-ị̀ dịrẹng bwula ihi nyang ojuju.

¹³Aalẹ, m̀ ka mẹ ụgbẹyị nyang jẹ alọhọbịrị, kịịwa angị họ ang onyobyi wuu ka nyà wẹ ẹga nyang.

¹⁴Ohe Oluhye ee, gbam kpehe hi abyị nya ọngịnyị ọnwụnwụ, Ahụ Ohe Oluhye ọngọchịm da, aalẹ, m̀ ka mwu eje juwa ya ọchịda nyang dodehe.

¹⁵Ọngọlahị ee, wụrụm ọnụ, kam ka gwogbo hang.

¹⁶Ó-ri iya ịkịlaakịla kịị kpụng ugbodu nyii lụmẹ kem lẹẹ, ịnọ m̀ tị́ ka kịlaa ju ila hang lẹ, ó-rim iya ị-rụ ila kịị hang lụmẹ kem lẹẹ, m̀ tị́ ka kpa warị wàng lẹ.

¹⁷Iya ọlẹ kaahụ Ohe Oluhye tọ ri olegu ọlẹ ká olujwo tọ, ọkịlẹtụ ọdụmwọọ ọlẹ kọ juwa tọ olujwo nya ịhọbịrị wẹẹ, á kaa nyẹẹkpẹ dọọ ka.

¹⁸Ohe Oluhye ee, họ ịSayọn ọnahị, ká dọọ ụbwọ, kị ka m egwalọ nya iJerusalẹm me mẹ.

¹⁹Ụka ọọwa, iya ịchịla-à ka hang wẹẹ lẹ, iya ị-rụ ila ka kpụng ugbodu nyii, ị ka ya ịna kịla iya ogidi nyang. Eje Ọnyịịla ọdatị nya iDevidi ọlẹ kọ ri nya olegbeju nya angị mwu eje. (Ọ dọọ ụka ká iDowẹgị ọla Ẹdọm kele ka ya je ịSọlụ ya iDevidi nyị rụ kaka kpịbaa ẹ-ẹpwa nya Ahimẹlẹkị)