Read idege EJE ỌNYỊỊLA 53 Bible Online

EJE ỌNYỊỊLA 53 - idege bible

EJE ỌNYỊỊLA 53

¹Oboogo byi ịlọmwụ yẹkẹẹ, “Ohe Oluhye-é ji ka.” Angị ịlịnyị wuu byịbyị, ịị họ ang onyobyi. Ọngọngọhẹ nyaa aa họ ang ọnyịịla ka.

²Ohe Oluhye chẹhị bwu epwoohe wẹ eji kaka yẹ angịnyị ehe kọ ka yẹ ó-ri ká ọngọhẹ ọ-jẹ ẹla-á ji, ọlẹ kọ kaa gbịgba họọ.

³Ma, ịwa wuu tị jahị rụ hi Ohe Oluhye, ị byịbyị lawụlẹ-awụlẹ, ọngọngọhẹ lẹpwụ nyaa aa họ ang ọnyịịla ka, á ka ye ọngọ ookpokpo ụpẹnị-ụpẹnị ka.

⁴Ohe Oluhye tịtọ wo yẹkẹẹ, “Ọọwa ri alabwẹla onyobyi ịwẹ-ẹ́ jẹ ẹlẹlẹhẹ pyịnyẹng kaka-á? Ị juwa họ angịnyị nyam ri ịnyịnyịịnyị, ị́ myị raabwọ ham ka.”

⁵Uhi ọtụka-ọtụka ka jwaa, ị́ jẹ uhi ọlịnyị ẹnẹnẹhẹ lẹka, chajị Ohe Oluhye ka nyi ekpinegu nya aluji nya angịnyị nyamwụ epepe, anụ ka kụrwaa chẹẹchẹẹ, chajị Ohe Oluhye nyẹẹkpẹ daa lẹ.

⁶M̀ bịlẹ ká Ohe Oluhye ka kpa ọkụrụ-kụrụ bwu Ọgbọdọ nya ịSayọn wẹ ala Isirẹlụ. Ụka ká Amkpaa-á wahị kụrụ angịnyị nyamwụ myịmyị, ịwa ala Isirẹlụ, anyị ịtụma nya iJekọbụ wuu ka chị ọkẹkẹnị. Eje Ọnyịịla nya iDevidi ọdatị-datị ọlẹ ri nya olegbeju nya angị mwu eje. Ọ dọọ ụka ká ala iSifu kele kaka byi ịSọlụ yẹkẹẹ, “IDevidi kpịbaa lẹẹ ị-ịnyahị.”