Read idege EJE ỌNYỊỊLA 55 Bible Online

EJE ỌNYỊỊLA 55 - idege bible

EJE ỌNYỊỊLA 55

¹Ohe Oluhye ee, ke ụrụ wo abwọ ọrịrị nyam, ā ya ụrụ nyí ọbịlẹ-bịlẹ nyam ajị ka.

²Ke ụrụ lam, ka wẹm, imahị hụm enyi kpá m hi huke-huke lẹ.

³Aluji nyam hwàhwa jahị dam, ị yẹm lẹhị onyobyi, kpa akama wẹ uhye nyam, juwa wụ agbama tam bala ọ-bam ẹtẹ onyobyi-obyi.

⁴Uhila nya imahị myịm pwẹẹpwẹẹ, uko nya igu ọ-ka gbugbu rum lẹtẹ-lẹtẹ.

⁵Uhi ojuju du kam juwa che kpakpaakpa, m̀ dapwụ hụ amẹ.

⁶Ang pyii kam ka ju achwọ lala enewulo, ịnọ m̀ ka hụ rụ kaka mwụ ịnyọ.

⁷M̀ ka hụ lụrụ-lụrụ hwẹẹẹ kaka nọ ẹpwa u-ugbileji.

⁸M̀ ka chị agaga ka ẹga kam ka be hi igbachịwụ onyobyi-obyi nya aluji ọwẹ.

⁹Ọngọlahị ee, kpịla ẹla ọlọnụ nya aluji nyam, ká irya nyaa-ā la jigi-jigi. M̀ yẹ agbụrụ ọ-họ awụlẹ-ẹ họ bala ẹla ọmwọmwọ ẹ-ẹpwụ nya epweji.

¹⁰Lodu bala alẹnụ ị juwa chọnggwọ dagaga ju egwalọ nyamwụ, uyawụ bala akama tị myị̀ ẹpwụ nyamwụ.

¹¹Ang ọbịrịị-bịrị yẹ epweji juju wuu, angịnyị ọ-hwàhwa nya awụlẹ bala ịbịrịbwọ ọ-họ awụlẹ-ẹ họ tụ opeje ịlụwa wuu da.

¹²Tị yẹ wẹẹ, ó-ri oluji nyam kọ wẹẹ dom, ịnọ ọọwa-á ka wọm ugbe ka, ó-ri ọlẹla nyam kọ wẹẹ kpam họ, wum lẹhyọ ịịwẹ, ịnọ m̀ tị ka wa ịlọm wii hyọọ.

¹³Ma, ahụ ọlịkpa-ịkpa nyam, ká ri oliko bala oligu ọ-bam i-iyo chìii tị ịnyị.

¹⁴Ahị ri aligu kpá latabwọ ka ewa ka, kaa gbịgba lawụlẹ kpá u-Ube nya Ohe Oluhye kpá ẹnẹhẹ lẹ.

¹⁵Igu ā bwu aluji nyam ịtambiri, kị rụ ka ejegu lahị-lahị, chajị ịwa ayịdang ri ẹga ká ang onyobyi ọhọhọ nọ ẹpwa.

¹⁶M̀ tị wụrụ Ohe Oluhye juwa bịlẹ ụbwọ ọdada bwu ẹga nyamwụ, Amkpaa ka chịm da.

¹⁷Lụtụrụ, lẹnụ bala alodu, m̀ chị eru, juwa mwu eru ẹ-ẹpwụ nya akama nyam ju Amkpaa, ọ kaa wo lam.

¹⁸Iru nya angịnyị juwa mwẹla tam, ọ tị chẹwụ kem, chịm da, kpam nyà lokpunyi bwu ẹwụ ịlẹ kam da.

¹⁹Ohe Oluhye ọlẹ kọ ri adịrahụ bwu edede ka wo omyi nyam kọ ka kụrụ aluji nyam, chajị ị́ myị yẹ irya da ka, ị́ tị myị ju uhi nyamwụ ka.

²⁰Oligu nyam gbalẹ ọwẹ tị lẹ, ọ yam am oligu nyamwụ dụrụ ila, ọ́ họ ọnụ ọlẹ kọ myị jịra ka.

²¹Ẹla ọlọnụ nyamwụ-ụ́ụ̀ kpụ ugbe kpụ ka lala ida ọwụwụ, ọkwọ ogugu à tị ji ọkịlẹtụ nyamwụ lẹ, ẹla ọlọnụ nyamwụ kpunyi kpá lala ida, ịlẹ ị-nẹ ọba bwu ekpeleji ọ tị ri lẹ!

²²Pẹ hi akama nyang ha Amkpaa mẹ, Ọ ka ma uya yẹng dada, ọ́ kaa myị ịị kụrụ alabwẹla ọnyịịla ka.

²³Ohe Oluhye ee, à tị ka du alọkwọ ịwẹ, angị nwụ angịnyị tụ alịbịrịbwọ ịwẹ wuu, ẹrụ kele ka odolowu, hi ẹnụ tà uhye. Am ayịdang tị lẹ, m̀ ka dahị hileng. Eje Ọnyịịla ọdatị-datị nya iDevidi ọlẹ ri nya olegbeju nya angị mwu eje. Ọ dọọ ụka ka ala iFilisitiya wọọ pyẹẹ́ẹ́ ị-ịGaatị.