Read idege EJE ỌNYỊỊLA 56 Bible Online

EJE ỌNYỊỊLA 56 - idege bible

EJE ỌNYỊỊLA 56

¹Ohe Oluhye ee, yẹm ahyẹẹrwẹrwa mẹ, chajị aluji nyam jam mwẹla tam lọngịrị-ọngịrị, juwa tụm pyịpyị ụka wuu.

²Ụka wuu aluji nyam juwa mwẹla tam, angị ma uya tam lugbodu ojuju ju iru lụmẹ.

³Amkpaa Agụgụ ee, ụka kam ju uhi, m̀ kaa dahịhileng.

⁴M̀ dahịhile Ohe Oluhye, ḿ ju uhi ka, m̀ gwogbo họọ ajị nya ọnụ ọmyịmyị nyamwụ. Ọngịnyị ehe amamadiroko tị́ ka jụm họ ịyẹ myị́-ị̀?

⁵Aluji nyam kpa ẹla tịtọ nyam ụka wuu, juwa me obyi jaabwọ kị ka bwu họm ang.

⁶Ị tụguru ẹ-ẹga ịkpịbaa juwa kpẹhị tụm da, ya ẹhị rịrị nyọka nwụm nwụ.

⁷Ohe Oluhye ee, aa yaa akama chajị nya ang onyobyi nyaa, ká kpaa nọnọ lagbama nyang.

⁸Á ri ọngga nya erebetere nyam ka, egbejida nyam wu tị́ nyà ka ekpem nyang, a daa ju ụ-ụpwụ nyang.

⁹Ẹnụ kam be ẹkọ nya ụbwọ ọdada wụrụng, aluji nyam ka wa wií rụnyẹ rụ. M̀ jẹ ọlẹ myị̀myị̀ nyori Ohe Oluhye ji oye nyam.

¹⁰Ohe Oluhye ee, ọnụ ọmyịmyị nyang m̄ mịla oja ha lẹ, Amkpaa ee, m̀ mịla oja nya ọnụ ọmyịmyị nyang.

¹¹M̀ dahịhileng lẹ, ḿ ju uhi ka. Ọngịnyị ehe amamadiroko tị́ ka jụm họ ịyẹ myị́-ị̀?

¹²Ohe Oluhye ee, m̀ ka họ ọnụ ịlẹ kam myị hang jịra, M̀ ka hu ọhaha hang nyọka jing obe,

¹³chajị a chịm da hi igu, á myị m̄ chị ụchụụ mileji ka, kam ka jẹ-ẹ̀ jẹdịyẹ ị-ịlahị nyang ahụ Ohe Oluhye, a-ahịgboo ọlẹ kọ juwa ha angị ịhịhị. Eje Ọnyịịla ọdatị-datị nya iDevidi ọlẹ ri nya olegbeju nya angị mwu eje. Ọ dọọ ụka kọ rụnyẹ rụ hi ịSọlụ kaka kpịbaa ụgbụ ọhẹ.