Read idege EJE ỌNYỊỊLA 57 Bible Online

EJE ỌNYỊỊLA 57 - idege bible

EJE ỌNYỊỊLA 57

¹Ohe Oluhye ee, yẹ ahyẹẹrwẹrwa nyam! Yẹm ahyẹẹrwẹrwa mẹ! M wẹ kaka kpịbaa ẹ-ẹga nyang, e-ekpeleji nya arụrụ nya achwọ nyang m̄ ka wẹ kaka kpịbaa gbee ka igbachịwụ itụka ịlẹ ka kpụba.

²M̀ wẹẹ wụrụng, Ohe Oluhye Agụgụ, ahụ Ohe Oluhye ọlẹ kaa họ ọbaba nyam wuu ham, m̄ wẹẹ wụrụ lẹ.

³À ka du bwu epwoohe kaka chịm da, à ka kụrụ angịlẹ wuu kị wẹẹ tụm pyịpyị. A ka chị ọháha o-gbu enyi-ka nyang ehe bala ọ-họ jịra jaabwọ ká myị ọnụ.

⁴Aluji dagaga jum lala egabẹ, ị lala iyo i-be angịnyị ri kìrò-kiro. Ikopya nyaa lala ịkpachị bala ịcha, ẹlẹlẹ nyaa la iri weri-weri lala ikonggo.

⁵Ohe Oluhye ee, ihi ọlala nyang la gidogboo u-uhye-ọgba, ụmụmẹ nyang pyẹ myị̀ odehe wuu.

⁶Aluji nyam ya ụgbọwụ da kị ka wum, ọjụjụ chịm ẹpẹtẹkẹ́ẹ̀ lẹ! Ị chị ụjẹ da ụ-ụgbẹyị ọlẹ kam wẹẹ bwu, ịwa-ịwa-à tị chabwọ kpọọ lẹ.

⁷Ohe Oluhye ee, m̀ da ọkịlẹtụ hileng giri-giri lẹ! Ọkịlẹtụ nyam dayị giri-giri! M̀ ka mwu eje bala o-gwogbọ hang!

⁸Ugbodu okpukpuru nyam ee, wuleji mẹ! Ẹnwụ bala ogum̀ nyam ee, anụ wuleji mẹ! M̀ ka chị ẹnụ ahị kpehe bwu ube leje omwumwu.

⁹Ọngọlahị ee, m̀ ka jing obe a-ahị nya alẹpwụma datị-datị wuu. M̀ ka mwu eje nya ogbo nyang ẹ-ẹga nya alepwoja datị-datị wuu.

¹⁰Ọháha o-gbu enyi-ka nyang nwà gbọnọ-gbọnọ pwụ uhye-ọgba, ọkpẹẹkpẹẹ ọlala nyang wu egbamwụ ọyị.

¹¹Ohe Oluhye ee, mẹ ihi ọlala gidogboo nyang jẹ u-uhye-ọgba, ká ụmụmẹ nyang ā pyẹ yịrị odehe wuu yịrị.