Read idege EJE ỌNYỊỊLA 58 Bible Online

EJE ỌNYỊỊLA 58 - idege bible

EJE ỌNYỊỊLA 58

¹Anụ alegbeju ịtụka ee, anụ kaa ya ẹla jaabwọ ká ẹla la-à wẹẹ-ẹ́? Anụ chị eje ha angịnyị la ọ-jẹ oye-oye ka-à wẹẹ-ẹ́?

²Eheehe! Irya nya ang onyobyi ọhọhọ anụ-ụ̀ me lẹ, anụ ka kpa abwẹga họ ang onyobyi am̀ ọ-ọpyị ọlẹ.

³Alabwẹla onyobyi họ ang ịtịpyọ bwu ụkụ-ụka kị maa, alọnọọkịla ị ri bwu ẹnụ-ẹnụ kị yẹtẹ kpeji lẹ.

⁴Ị myị̀ lẹhwa lala ilo ịlẹhwa, ị mwụ ang ku arụ lala idu ọlẹ kọ jẹ-ẹ̀ wo ẹla

⁵kpụ ọ-ka wo omyi nya ọngọ ri iji nya ilo lee uhule ọlẹ ká ọngọ ri ọnggwọ juwa du ka.

⁶Ohe Oluhye ee, chị angịrị nyaa eku, Amkpaa ee, wo ikopya nya egabẹ ịwẹ hụrụ.

⁷Họ kị myị yịra-yịra lala enyi ọnụnụ hụrụ, ká angịnyị ā kpa ata baa mọọmọọmọọ lala ịkpẹẹ ịlụgbẹyị.

⁸Họ kị lala ekpa i-wulo hyọ̀hyọọhyọ yẹ ri ide-ide nyaa wuu, kị lala ogu-ọnyị ọlẹ kị kaa pwọ, kọọ yẹ ẹnụ nya adoohe ẹ-ẹhị ka.

⁹Ene kị ka jẹ kpá, aa hwaa chịịrụ lala ịkpẹẹ, ị́ ri ilekpo ri lee ịnwọnwụ, Ohe Oluhye ā daa igbachịwụ hụrụ lagaga.

¹⁰Alabwẹla ọnyịịla ka chị ọkẹkẹnị ụka kị yẹ jaabwọ kị juwa yẹ alabwẹla onyobyi akama. Ị kaa jẹdịyẹ bwu ẹpwụ nya ịwọ nya aluji nyaa.

¹¹Ụka ohyẹẹkpẹ, angịnyị ka juwa yẹkẹẹ, “Ẹẹ́ẹ̀ẹẹẹ! Angị la ọhịhị ọnyịịla la uri ka ye ịnyịlẹhị, Ohe Oluhye ọlẹ kọọ la odehe eje ọkpakpa ji ịnyịlẹhị.”