Read idege EJE ỌNYỊỊLA 59 Bible Online

EJE ỌNYỊỊLA 59 - idege bible

EJE ỌNYỊỊLA 59

¹Eje Ọnyịịla ọdatị-datị nya iDevidi ọlụka ká ịSọlụ ya ẹhị nịrọ ẹpwa nya iDevidi chajị kọ ka jẹ-ẹ̀ ye iwe nwụ iDevidi. Ohe Oluhye ee, chịm da bwu ẹga nya aluji nyam, chẹwụ kem hi alẹla nyam.

²Chịm da bwu ẹga nya alabwẹla onyobyi, bala angị nwụ angịnyị ịwẹ!

³Yẹ wẹẹ, Amkpaa, angịnyị godayị, juwa kụ ịnya gbem, alabwẹga kọ ju awụlẹ jahị dam, ḿ tị haa ang onyobyi ọhẹ-lọhẹ ka.

⁴Ḿ họ ịngịngịhyẹ ọtịpyọ kpá kaka, ị tị nwụlanọ nyọka mwẹla tam. Wuleji, ká wẹ kaka dam ụbwọ mẹ, yẹ ẹla nyam dụwẹ wẹẹ!

⁵Amkpaa Ohe Oluhe Agụgụ ee, ahụ Ohe Oluhye nya ala Isirẹlụ. Wuleji ká yẹ alẹpwụma datị-datị ịwẹ akama, ā jujwo nya angị inyibyi ịwẹ kpong-kpong koo.

⁶Ịị tịrẹkpẹ lodu, juwa warụ lala ibwu, ga tụ epweji-epweji da chwolo-chwolo.

⁷Wo ang ịlẹ kịị gba bwu ịnụ nyaa wẹẹ, ẹla i-gu ọngịnyị chọ̀ọ́chọ̀ọ́ ịị ya lẹ, irya omeme nyaa ri oowo tị́ ka byihi yàà myị?

⁸Amkpaa ee, à tị kaa hụlọ ẹhụ jwaa, kpaa ịwa wuu hu utungguru.

⁹Ohe Oluhye ọngịrị nyam ee, m̀ jam ya ẹhị rịrị wẹ ẹga nyang, ahu à ri ẹga ọkpịbaa nyam lẹ.

¹⁰Ohe Oluhye nyam ka wẹ kaka dam ụbwọ ẹ-ẹpwụ nya ọháha o-gbu enyi-ka nyamwụ, ọ ka ya iwe da ham kam ka yẹ jaabwọ kị ka kụrụ aluji nyam bwụjẹ-bwụjẹ.

¹¹Ā nwaa-a nwụ koo, Ohe Oluhye, ó-ri ịnyị ka angịnyị nyam ka deeri, kpa ọngịrị nyang nyaa epepe, ka taa ayịreji.

¹²Ajị nya ang inyibyi ịlẹ kị kpa ọnụ nyaa ya, ahị ohihi nyaa-ā ri ụnya waa! Ajị nya ido ịlẹ kị do bala ịnịịkịla ịlẹ kị me wuu lẹ,

¹³aa taa ayịreji ẹ-ẹpwụ nya agbama nyang. Taa ayịreji kị́ myị kụrwa-kụrwa! Ụka ọọwa angịnyị wuu ka jẹ kaahụ Ohe Oluhye à ri adịrahụ nya Isirẹlụ wuu ju ka ẹga myị ẹga nya odehe wuu.

¹⁴Ịị tịrẹkpẹ lodu, juwa warụ lala ibwu, ga tụ epweji-epweji da chwolo-chwolo.

¹⁵Ị ga tụ ang-ang da durwe nya ang oriri, ị́ ye ri wu ẹpwụ ka, ị jida nya imyi.

¹⁶M̀ ka mwu eje rụ ọngịrị nyang, m̀ ka mwu eje rụ ọháha o-gbu enyi-ka nyang lụtụrụ. Ahụ à ri ẹga ọkịkbaa ogiri-giri nyam lẹ, ẹga ọ-kpịbaa nyam ụka nya akama.

¹⁷Ohe Oluhye, ọngịrị nyam ee, m̀ ka mwu eje nya ogbo hang, chajị ahụ à ri ẹga ọkpịbaa nyam lẹ. À ri Ohe Oluhye ọlẹ kọ la ọháha o-gbu enyi-ka ẹ-ẹga nyam. Eje Ọnyịịla ọdatị-datị nya iDevidi ọlẹ ri nya olegbeju nya angị mwu eje. Ọ dọọ ụka kọ dẹwụ ta ala Aram-ịnaharayim bala ala Aram-isoba, ká iJowabụ nyà kaka nwụ ala Ẹdọm angị ụnọ iwo kụrụ imiiye ọ-Ọkpọọ nya Ịma.