Read idege EJE ỌNYỊỊLA 6 Bible Online

EJE ỌNYỊỊLA 6 - idege bible

EJE ỌNYỊỊLA 6

¹Amkpaa ee, ā yalibyi lam ẹ-ẹpwụ nya agbama ka, lee ọ-nwụm rịrị ẹ-ẹpwụ nya ịkẹjẹ-awụrụ ka.

²Amkpaa ee, yẹm ahyẹẹrwẹrwa mẹ, m̀ kpụ ịbwọ lẹ, m̀ kpụ ịrwẹmbẹ hụ́ lẹtẹ-lẹtẹ lẹ. Ya ọngịrị onyeewe ham mẹ.

³Am ayịdang lẹpwụ-lẹpwụ ji ẹpwụ nya uhila nya akama, Amkpaa ee, à tị́ ka tata ba anyị ene ká ka dam ụbwọ-ọ̀?

⁴Amkpaa ee, jahị kpata, ká wẹ kaka chịm da, Gbam kpehe bwu ọnụ nya igu bwula ahyẹẹrwẹrwa nyang.

⁵Ọngịnyị jẹ-ẹ̀ kpịtịya nyang ụka kọ gbu kpá ka, ị́ ka jẹ-ẹ̀ gwogbo hang e-ejegu kaka.

⁶Ịnyịrọ chịm pyẹpyẹ wuu la eru omwumwu lẹ, lodu ẹnụ myị ẹnụ ịbẹẹdị nyam kpụ chwẹẹchwẹẹ legbejida. Ipilo nyam họ dọyịị lida ojeje.

⁷M̀ jẹ yọyị yẹ alale, ká ahị nyam mịrị juuu lọjụjụ ẹ-ẹpwụ, ọọ-lajị nya ọtụpyịpyị o-bwu ẹga nya aluji nyam.

⁸Anụ angị họ ang onyobyi, anụ tụkịnyaa him, chajị Amkpaa wo ida ojeje nyam lẹ.

⁹Amkpaa wo ọbịlẹ-bịlẹ nyam lẹ, ọ ye abwọ ọrịrị nyam myị lẹ.

¹⁰Oyoyi ā ju aluji nyam, ká ahị ā haa korii. Họ kị rụ tịrẹkpẹ him lọmwaa loyi mọmbọọọ. Eje ọlẹ ká iDevidi mwu ha Amkpaa chajị nya iKuchi olimwawụ nya iBenjamin