Read idege EJE ỌNYỊỊLA 62 Bible Online

EJE ỌNYỊỊLA 62 - idege bible

EJE ỌNYỊỊLA 62

¹M̀ godayị lọhụ ọdapịlẹẹ gbe Ohe Oluhye, Ọwa ụbwọọmwụ à ka chịm da myị lẹ.

²Ọwa ụbwọọmwụ à kaa chẹwụ kem bala ọ-chịm da lẹ, ọwa-à ri ẹga ọkpịbaa ogiri-giri nyam lẹ. Ḿ ka hụ́ kpiki ka.

³Ahyu! Ánụ ka mwụ ịnyọ kaka-á? Iru nya angịnyị-angịnyị kịị bába jum am ọngọ ookpokpo-ōó? M̀ lala ugulọ ọ-chị eku kụkụ iku ọlẹ kọ yẹ bwụjaa lẹ!

⁴Ịtọ nyọka pwọm ọmwụ cheji bwu iwe-ahụrụ olihi-ihi nyam kem ānụ tọ lẹ, ọnọọkịla omeme à kpụnụ ịpyọ lẹ. Anụ la ọgẹnẹ-gẹnẹ ẹ-ẹga nyam, anụ tịị gọlọ jum ẹ-ẹpwụ nya ọkịlẹtụ nyanu.

⁵M̀ godayị lọhụ ọdapịlẹẹ gbe Ohe Oluhye, Ọwa ụbwọọmwụ m̄ dahịhile lẹ.

⁶Ọwa ụbwọọmwụ à kaa chẹwụ kem bala ọ-chịm da lẹ, ọwa-à ri ẹga ọkpịbaa ogiri-giri nyam lẹ. Ḿ ka hụ́ kpiki ka.

⁷Ẹga nya Ohe Oluhye kem ḿm̀ ye ọchịda bala ihi ọlala bwu lẹ, ọwa-à ri ọngọ chẹwụ kem lẹ, ọ ri ẹga ọkịbaa nyam lẹ.

⁸Anụ angịnyị nyam ee, anụ dahịhilọọ ụka wuu mẹ, anụ ya akama nyanụ wuu jọọ, chajị ọwa-à ri ẹga ọkpịbaa nyahị lẹ.

⁹Angịnyị ehe wuu lala ịhụ ọ-da pwẹẹ, angị ri angịtụka ri tụ angị ichiche lala ijagbodo, ị wụla ilo ọlala nyaa yẹ rige-rige, ị ri uhwongkolo kpá chochoocho.

¹⁰Ānụ dahịhile abwẹga nyanụ ka, ānụ ya irya nyanụ nịrọ ang o-nu angịnyị lagbụrụ koo, ụdụ ọkpụkpụ nyanụ-ụ́ juwa nwanwa kịlahị-ịlahị, ānụ hwaa nya ochirigogo nya ọhịhị nyanụ koo.

¹¹Ohe Oluhye ya ẹla ịlọmwụ gbagbịla lẹ̀-ẹ̄, m̀ tị wo ẹla ọọwa ugbabwọ ohu kụrụ iwo lẹ, nyori ọngịrị wuu ri ịnyamwụ,

¹²nyori ọháha ọlẹ kọ la-áà gbu enyi ka. Ịnyịlẹhị ịnyị, ahụ Ọngọlahị kaa la angịnyị eje jaabwọ ká abwụma nya ụkụrwọ ịlẹ kị họ la. Eje Ọnyịịla nya iDevidi ọlẹ kọ da ụka kọ juwa u-ugbileji nya iJuda.