Read idege EJE ỌNYỊỊLA 63 Bible Online

EJE ỌNYỊỊLA 63 - idege bible

EJE ỌNYỊỊLA 63

¹Ohe Oluhye ee, ahụ à ri Ohe Oluhye nyam lẹ, m̀ juwa tịtọ nyang kekeeke, imyi-enyi nyọka ka wung ọyị nwụm, m̀ juwa teleko nyang jaabwọ kịị tịtọ nya enyi ọ-ọpyị ọchọrụ ọlẹ ká enyi-í ji kpong-kpong ka.

²M̀ yẹng u-ube ịgọgọ nyang, m̀ yẹ ọngịrị bala ụmụmẹ ọlala nyang.

³Ọháha o-gbu enyi-ka nyang jum apyobwuna gụ ọhịhị ayịdang, m̀ ka gwogbo hang.

⁴M̀ ka gwogbo hang jaabwọ myị abwọ kam hị tata kaka ba, m̀ ka hu abwọ nyam hwaa juwa raabwọ hang.

⁵Ugbodu okpukpuru nyam ka ri ang kọ ka wu ẹpwụ kpọngkpọng, m̀ ka mwu eje nya ọkẹkẹnị gwogbo hang.

⁶Ụka kam nọnọ ị-ịbẹẹdị nyam, m̀ kaa kpịtịya nyang, m̀ kaa me irya chajị nyang lodu gbee ká ahị ka pyẹ.

⁷Ajị nyọlẹ ká kaa dam ụbwọ ụka wuu lẹ, m̀ ka mwu eje nya ọkẹkẹnị e-ekpeleji nya arụrụ nya achwọ nyang.

⁸M̀ chị ikirii bang, ụbwọ upwuriri nyang kpam lokpunyi.

⁹Angịlẹ kị wẹẹ tịtọ nyọka nwụm nwụ wẹẹ, ka rụ ka ẹpwụ nya ejegu.

¹⁰Ẹwụ ka ryaa, ikirom ka go akịrakpa nyaa ri.

¹¹Adịrahụ ka chị ọkẹkẹnị ẹ-ẹpwụ nya Ohe Oluhye, angị kaa nwa iro lẹnyị nya Ohe Oluhye wuu ka gwogbo họọ, alọnọọkịla wuu ka kpụba gbanggbang. Eje Ọnyịịla nya iDevidi ọlẹ ri nya olegbeju nya angị mwu eje.