Read idege EJE ỌNYỊỊLA 64 Bible Online

EJE ỌNYỊỊLA 64 - idege bible

EJE ỌNYỊỊLA 64

¹Ohe Oluhye ee, m̀ jam ẹ-ẹpwụ nya akama, ke ụrụ wo ẹla nya akama nyam! aluji nyam hụrụ jahị dam lụmẹ, chị ọhịhị nyam da!

²Kpụm ịbaa hi obyi onyobyi nya alọkwọ, hi ẹpwụ nya iru nya angịnyị inyibyi.

³Ị jwo ẹlẹlẹ nyaa iri weri-weri lala oge, ẹla ọlọnụ nyaa yi ọngịnyị chọ̀ọ́chọ̀ọ́ lala ịcha ịlẹhwa.

⁴Ị daa bwu iwe-ịbaa nyaa kaka chị angị da ẹlẹlẹhẹ ka, juwa mwẹla taa lụka ọmwaaaa luhi ojuju kpong-kpong ka.

⁵Ị du awụlẹ ju uguru-ẹla, ị me irya nya ẹga kị ka gbụrụ ụnya da, juwa yẹkẹẹ, “Ọngọngọhẹ-ẹ́ ka jẹ juhi ka.”

⁶Ị me obyi onyobyi lẹ, ị juwa byị ịlaa yẹkẹẹ, “Ẹhẹẹ, ahị me ẹlẹwẹ gu awụlẹ kpọngkpọng lẹ!” Ịnyịlẹhị ịnyị, ọkịlẹtụ bala irya nya ọngịnyị ehe myị̀ lijẹẹhị.

⁷Ohe Oluhye tị ka da ịcha nyamwụ kaka chaa, ká ang ka haa lọmwaa.

⁸Ọ ka kpa ẹla ọlọnụ nyaa taa ayịreji, ọng myị ọng kọ yẹ ẹlẹwẹ ka hụlọ ẹhụ jwaa.

⁹Ejiri ka wu angịnyị wuu, ị ka me irya ju ang ịlẹ ká Ohe Oluhye họ, ị ka ya ụkụrwọ nyamwụ dodehe.

¹⁰Alabwẹla ọnyịịla wuu ka chị ọkẹkẹnị, chajị nya ang ịlẹ ká Amkpaa họ, ị ka ye ẹga ọkpịbaa ẹ-ẹga nyamwụ! Angịlẹ wuu kị ri angịnyị ịnyịịla ka gwogbo họọ! Eje Ọnyịịla nya iDevidi ọlẹ ri eje ọlẹ kị mwu ha olegbeju nya angị mwu eje.