Read idege EJE ỌNYỊỊLA 65 Bible Online

EJE ỌNYỊỊLA 65 - idege bible

EJE ỌNYỊỊLA 65

¹Ohe Oluhye ee, ọ chịla kị ka gwogbo hang ị-ịSayọn, ahị ka họ ọnụ ọmyịmyị nyahị jịra hang.

²Ahụ à kaa wo abwọ ọrịrị nyahị lẹ, angịnyị wuu gu onwu gu ọba ka wẹ ẹga nyang

³ọọ-lajị nya ang onyobyi ịlẹ kị họ. Ịhọbịrị nyahị yẹẹhị jii kaka kpoye, à tị hịnyọhyaa wuu hahị.

⁴Angịlẹ wuu ká chụ, ká kpaa kaka kụ ta ịlọng ẹ-ẹpwa ịgọgọ nyang-ǹg wẹẹ, ịnya angịịwa há haa lẹ! Ahị ka yụya ju ẹpwa nyang, juwa chị ọkẹkẹnị ju ahị ọwawa ịla Ube Ịgọgọ nyang.

⁵À kpa ụkụrwọ i-wu ejiri ịlẹ ká họ, wẹẹhị abwọ ọrịrị nyahị, chịhị da. Ohe Oluhye ọngọchịhị da ee, ahụ alodehe wuu ka ẹtẹ ka edii, tụ angị ji kpoye nya ihu hwẹẹ à dahịhile lẹ.

⁶À họ ịgbọdọ bwula ọngịrị nyang, à bwula ọọwa mẹ ọngịrị ọtụka nyang jẹ.

⁷À họ ka ihu ọ-yẹ ọhụ́ụ̄ kpụba, tụ agbụ ogugu nya enyi, bala iru okuukùùkuu nya alụma nya odehe wuu.

⁸Ejiri wu alodehe wuu gu ọka gu ọka, chajị nya ụkụrwọ ịlẹbyẹbyị ịlẹ ká ho. Bwu ọmwẹnụ-ụtụrụ lalaala ka ju ka ọmwẹnụ-obyi, alodehe wuu juwa chị ọkẹkẹnị ju ụkụrwọ ịlẹ ká họ.

⁹À kpẹhị rịrị ọpyị, juwa do enyi jwọọ, à họ ọ ju eyo bala ọ-há ang, enyi ịlọ̀bá nyang ahụ Ohe Oluhye-é kaa nwụ ka, à họ ang-ẹrụ nya alodehe há yẹẹyẹẹ, ịịwẹ ā hunọ kọ ka la lẹ.

¹⁰À do enyi chwọọchwọọ ju obwu ọlẹ kị wu, à bwuru ịgba nyaa pẹẹpẹẹ, do enyi chwẹchwẹẹchwẹ họ ká ịpyị la mịlẹ-mịlẹ, bala ọ-họ ká ang-ẹrụ há ọgwọgụ.

¹¹À chị ẹka eju bwula ọ-họ ká ang-ẹrụ myị ukuna pwẹẹpwẹẹ, ẹga myị ẹga ká chịpwụrụ bwu, ang oriri dịda ụ-ụwa.

¹²Ugbileji myị̀ lamẹ ịlẹ ká iyo ileji ka ri, ịkịka nya ịgbọdọ myị̀ lọkẹkẹnị.

¹³Ịkpịlọ pyẹ kụrụ amẹ yịrịtị̀tị̀ị̀tị̀, ẹga i-ri ọkpọọ wuu ri ẹrụ-ẹrụ nya iwiiti wuu. Ịwa wuu hu omyi hwaa juwa mwu eje nya ọkẹkẹnị! Eje Ọnyịịla ọlẹ ri eje ọlẹ kị da ha olegbeju nya angị mwu eje.