Read idege EJE ỌNYỊỊLA 66 Bible Online

EJE ỌNYỊỊLA 66 - idege bible

EJE ỌNYỊỊLA 66

¹Anụ angịnyị ehe wuu, anụ gwogbo ha Ohe Oluhye lomyi gboo lọkẹkẹnị!

²Anụ mwu eje rụ ụmụmẹ nya ẹnyị nyamwụ, anụ ya ogbo ọlụmẹ-lụmẹ họọ!

³Anụ byi Ohe Oluhye yẹkẹẹ, “Ang ịlẹ kaa họ chakpa wu ejiri! Ọngịrị nyang lume kpuuu, aluji nyang kpa abwọ chị ịbagụ ị-ịlahị nyang.

⁴Alodehe wuu kaa gbịgba hang, ịị mwu eje gwogbo hang, ịị mwu eje gwogbo ha ẹnyị nyang.”

⁵Anụ kẹwẹ ooo, kanụ yẹ ang ịlẹ ká Ohe Oluhye ho, ụkụrwọ ẹbyẹbyị nyamwụ ịlẹ kọ họ ha angịnyị ehe.

⁶Ọ họ ihu chị ọhụ kịra-kịra, adahị igogo anyị jẹdịyẹ lẹpẹtẹ kpoye nya ihu. Anụ kẹwẹ kahị chị ọkẹkẹnị chajị nya ang ịlẹ kọ họ.

⁷Ọ ri adịrahụ ẹ-ẹpwụ nya ọngịrị nyamwụ, juwa kpẹhị yẹ ang myị ang ọlẹ ká alodehe juwa họ. Angị la egbeju-ọngịrị ā wuleji jahị dọọ koo.

⁸Anụ angịnyị wuu, anụ gwogbo ha Ohe Oluhye nyahị, kanụ mwu eje nya ogbo nyamwụ gboo ká angịnyị ā wo.

⁹Ọ chẹwụ keehi du kahị jam hịhị, Ọ́ myị ahị chị ụchụụ mileji ka.

¹⁰Ohe Oluhye ee, à mahị yẹ. Jaabwọ kị kaa hyà okpoko onyoowuru i-ila, ịnyịnyị-ịnyịnịyị ā mahị yẹ lẹ.

¹¹À da ụnya wuhi, ya olo nya ụhị ọyẹyẹ chụụhị e-egbeju.

¹²À ya iwe da aluji jẹhị chẹẹchẹ̀ẹ̀chẹẹ, ahị chịpwụrụ bwu ẹpwụ nya ila bala ẹpwụ nya enyi, ene kaa kpahị warị kaka kụ ẹ-ẹga kahị ka ye ri juwa dagba.

¹³M̀ ka kpa iya ọkịlaakịla ọ-rụ ila wẹ ẹpwa nyang, m̀ ka họ ọnụ ọlẹ kam myị hang jịra—

¹⁴ọnụ nya ang ọlẹ kam myị nyọka ya hang, ụka kam juwa ẹ-ẹpwụ nya akama m̄ myị ọnụ ọọwa lẹ.

¹⁵M̀ ka ya ịkpịlọ kịla iya ogidi hang— iya nya imilodo ịlẹ kị ka chịng oru kwọkwọ, m̀ ka ya ịna bala ịmwụ kịla iya hang.

¹⁶Anụ angịlẹ wuu kanụ-ụ̀ ju ihi nya Ohe Oluhye, anụ kẹwẹ kanụ ke ụrụ, aalẹ, m̀ ka ya jenu ang ịlẹ kọ họ ham.

¹⁷M̀ chị eko wụrwọọ bịlẹ ụbwọ ọdada, m̀ gwogbo họọ leje omwumwu.

¹⁸Ó-ri kam wu ọhọbịrị bajẹ lẹẹ, ịnọ Ọngọlahị-ị́ ka myị-ị̀ ke ụrụ wo lam kaka.

¹⁹Ohe Oluhye tị wo lam ịnyịlẹhị, Ọ ke ụrụ wo abwọ ọrịrị nyam.

²⁰Ogbo ā ri ịnya Ohe Oluhye, chajị Ọ́ pwa abwọ ọrịrị nyam ka, Ọ́ tị tụ ọháha o-gbu enyi-ka nyamwụ kịnyaa him ka. Eje Ọnyịịla ọlẹ ri eje ọlẹ kị da ha olegbeju nya angị mwu eje