Read idege EJE ỌNYỊỊLA 68 Bible Online

EJE ỌNYỊỊLA 68 - idege bible

EJE ỌNYỊỊLA 68

¹Ohe Oluhye ee, wuleji ká nyí aluji nyang epepe, ká angịlẹ wuu ká Ohe Oluhye wụ ẹjẹ ā rụnyẹ rụ mwụ ata bịmwụ.

²Kwaa rụ jaabwọ ká igbachịwụ kaa da ku ịmwụ rụ, jaabwọ ká ida kaa wulo hụrụ ẹ-ẹga nya ila, ịnyịnyị-ịnyịnyị alabwẹla onyobyi à kaa ta ayịreji ị-ịlahị nya Ohe Oluhye.

³Alabwẹla ọnyịịla tị kaa chị ọkẹkẹnị, juwa yụya ị-ịlahị nya Ohe Oluhye, ịị chị ọkẹkẹnị bala ọ-da iwuru nya ọkẹkẹnị.

⁴Anụ mwu eje ha Ohe Oluhye, anụ mwu eje nya ogbo ha ẹnyị nyamwụ, anụ mwu eje gboo họọ ọwa ọngọlẹ kọọ jẹdịyẹ u-uhye nya egbamwụ. Ẹnyị nyamwụ à ri Amkpaa lẹ, anụ chị ọkẹkẹnị i-ijata nyamwụ!

⁵Ohe Oluhye ọlẹ kọ kụ ẹ-ẹga ọlịgọgọ nyamwụ à ri adịda nya anyị-egu, ọngọ kaa chẹwụ ke ịhụ-egu lẹ.

⁶Ọ kaa ya edawụ ha angị la ịlaa nwee, ọọ gba alagba kpehe du kị dagba, juwa chị ọkẹkẹnị. Angị la egbeju-ọngịrị tị lẹ, ịwa ka kụ ọ-ọpyị ọkwangga.

⁷Ohe Oluhye ee, ụka ká juwa kpa angịnyị nyang jẹ rụ, ká kpaa chẹwụ bwu ugbileji rụ,

⁸ịpyị hụ́ kpuka-kpuka, enyi ododo nwà ụga i-ijata nyang ahụ Ohe Oluhye nya ịSayịnayị, ị-ịlahị nyang ahụ Ohe Oluhye nya Isirẹlụ.

⁹À họ enyi do chwọọchwọọ, kpa ọhịhị onyeewe wẹ ọpyị nyang ọlẹ kọ gbugbu kpá ịnọ wuu lẹ.

¹⁰Angịnyị kụ ọ-ọpyị ọọwa, bwula ọnahị nyang à họ ọbaba nya alẹbyahị wuu haa.

¹¹Ọngọlahị ya ẹla nyamwụ dodehe, iru nya anyang kpa ẹla ọọwa pyebile yẹkẹẹ,

¹²“Ịdịrịhụ nya aluji bala angịdẹwụ nyaa rụnyẹ rụ! Anyang ya ang-ẹwụ ịlẹ ká angịdẹwụ kpa nyà gịla awụlẹ.

¹³Ịnọ ị kụ ju ka ẹpwụ nya ẹga kịị ya ịkpịlọ ju, ị tị họ okpoko onyoowuru bala okpoko ịgọm kụrwaa jaabwọ ká enewulo kaa ya achwọ ke ịlọmwụ lẹ.”

¹⁴Ụka ká Agụgụ nyi ịdịrịhụ epepe ọ-Ọgbọdọ nya ịSalụmọn, Ọ họ ká ekpawẹ ihule-hule do ụ-ụwa.

¹⁵Ọgbọdọ nya ịBachan chakpa ri ọgbọdọ ọtụka! Ọ ri ọgbọdọ ọlẹ kọ la achinege ju iru!

¹⁶Ịyẹ tị ká juwa chẹhị nyẹ̀ngẹẹ bwu achinege nyang ẹ-ẹpwụ nya ijiiji kaka yẹ ọgbọdọ ọlẹ ká Ohe Oluhye chụ ha ịlọmwụ nyọka nọ ẹpwa-à? Amkpaa lịlọmwụ ka kụ ụwa gbe oyi myị oyi!

¹⁷Ọngọlahị bwu Ọgbọdọ nya ịSayịnayị wẹ ẹpwa ọlịgọgọ nyamwụ liru nya ụnụnụụnọ nya ang ịrụnyẹ ị-kpa dẹwụ nyamwụ.

¹⁸Ụka ká wule ka uhye, à kpa iru nya alagba dịrẹ ịlọng juwa ye ang-ahị bwu ẹga nya angịnyị, tụ ẹga nya angịlẹ kị dọmwụ la egbeju-ọngịrị tụng pyịpyị. Ụ-ụwa Amkpaa Ohe Oluhye à ka nọ ẹpwa lẹ.

¹⁹Ogbo ā ri nya Ọngọlahị, ọle kọ kaa kpa olo nya akama nyahị ẹnụ myị ẹnụ, ọwa-à ri Ohe Oluhye ọlẹ kọ chịhị da lẹ.

²⁰Ohe Oluhye nyahị ri Ohe Oluhye ọlẹ kọọ chị angịnyị da, ọwa-à ri Amkpaa Ọngọlahị ọlẹ kọọ gba ọngịnyị kpehe bwu ẹpwụ nya igu lẹ.

²¹Ịnyịlẹhị ịnyị, Ohe Oluhye ka be egbeju nya aluji nyamwụ ene yịgẹ-yịgẹ— ịwa angịlẹ wuu kị wẹẹ kịnyaa ụ-ụgbẹyị nya ang onyobyi ọhọhọ nyaa.

²²Ọngọlahị ya deeji yẹkẹẹ, “M̀ ka kpa aluji nyanụ tịrẹkpẹ chịnụ ọgụ bwu ịBachan, m̀ ka kpaa warị bwu ụjẹ-ẹmwụ okpori-kpori nya ihu

²³chaji kaanụ angịnyị nyam ka kpa ịwọ nya aluji hụ́ ịlọnụ ata, ibwu nyanụ tị̀tị̀ ka pịlẹ ịwọ nẹ jaabwọ myị abwọ kọ haa.”

²⁴Ohe Oluhye ee, angịnyị wuu ẹwụ ọchịchị nyang ẹ-ẹpwụ nya ọkụrụ-kụrụ, jaabwọ kaahụ Ohe Oluhye adịrahụ nyam wẹẹ jụ ka ẹpwa ọlịgọgọ nyang.

²⁵Angị mwu eje ji ịlahị, angị du ayịlọ ji ẹkpẹ baa ba, ịyẹẹnọ ji ẹpwụ nyaa juwa du ịchẹchẹ nyaa.

²⁶“Anụ gwogbo ha Ohe Oluhye ẹ-ẹpwụ nya ọjịra-jịra ọtụka nya angịnyị nyamwu. Anụ gwogbo ha Amkpaa, anụ angị ri anyị ịtụma nya iJekọbụ wuu!”

²⁷Yẹ lalẹ wẹẹ, angị kpa ịlahị ri imwawụ nya iBenjamịn kọọwa-à tị byẹhị gụ wuu, alegbeju nya iJuda tọọ da bala alebwo nyaa, ene ka alegbeju nya iSebulọn bala ịnya ịNafụtali baa ba.

²⁸Ohe Oluhye ee, tụ ịlọng michi, ká mẹ ọngịrị nyang ọlẹ ká kpa họ ụkụrwọ hahị jẹ mẹ.

²⁹Ajị nya Ube Ịgọgọ nyang ọla iJerusalẹm lẹ, ịdịrịhụ juwa kpa ang-ahị warị wàng.

³⁰Ya alibyi la Ijipiti, ugbiriyo ọlẹpwụ nya etungkohyo ọwẹ, yalibyi la alẹpwụma wuu, ịwa kị lala ogu nya ịna bala anyị nyaa, gbee kị ka wẹ kaka hirikpẹẹ la ang-ahị nya okpoko onyoowuru nyaa hang. Angịlẹ ká ẹwụ ọdada ri ang ọ-kpaa ịpyọ lụmẹ-ẹ̀ wẹẹ, aa nyaa epepe hi awụlẹ![4]

³¹Angị ku ọmwakpa nya ala Ijipiti ka warị, ala Itiyopyiya ka hiri ịlaa kpẹẹ ha Ohe Oluhye.

³²Anụ alọpyị nya ịdịrịhụ ilodehe wuu, anụ mwu eje ha Ohe Oluhye, anụ mwu eje nya ogbo ha Ọngọlahị la.

³³Anụ mwu eje họọ ọwa ọngọlẹ kọọ jẹdịyẹ u-uhye-ọgba, uhye-ọgba o-bwu orogo-orogo, anụ wo omyi nyamwụ kọ juwa kpụ ịkata ọtụka-ọtụka.

³⁴Anụ ya ọngịrị ọlala nya Ohe Oluhye dodehe, ụmụmẹ nyamwụ hụ́ rịrị ala Isirẹlụ, ọngịrị nyamwụ ji uhye-ọgba.

³⁵Ohe Oluhye chakpa la uhi-uhi la ọyẹyẹ ẹ-ẹpwa ọlịgọgọ nyamwụ, Ohe Oluhye nya ala Isirẹlụ ịnyị! Ọ ya ọngịrị bala ogogo ha angịnyị nyamwụ. Anụ gwogbo ha Ohe Oluhye! Eje Ọnyịịla nya iDevidi ọlẹ ri ịnya olegbeju nya angị mwu eje.