Read idege EJE ỌNYỊỊLA 69 Bible Online

EJE ỌNYỊỊLA 69 - idege bible

EJE ỌNYỊỊLA 69

¹Ohe Oluhye ee, chịm da mẹ! Enyi myị̀ birim kaka pwụ ụkpụrọkọ lẹ.

²M̀ jam kpụ̀ myọ̀ọọ ju ka ẹpwụ nya ịwa, la o-ye ọpyị ọkpẹnchị ka ya ẹta rịrị ka, m̀ ju ka ụjẹ-ẹmwụ, enyi birim-biri kpá myị wuu lẹ.

³Ida ọlẹ kam wẹẹ je bịlẹ ụbwọ ọdada chịm ẹpẹtẹkẹẹ, ụkpụrọkọ nyam chị ọhụ kịra-kịra, m̀ gba egbahị chichiichi juwa ya ẹhị nọ gbe ụbwọ ọdada bwu ẹga nya Ohe Oluhye nyam.

⁴Angịlẹ wuu kam waa ẹjẹ tu ịmịmẹ ju iru gụ eke-inyi ilegbeju nyam, aluji nyam kaa me ịnịịkịla bam, ị la ọngịrị lụmẹ, ị tịtọ nya egbeju igu nyam, ang kam huhu yoyi ka, ị juwa gbilem a-ajwọ nyọka tịrị ang ịịwa ẹkpẹ.

⁵Ohe Oluhye ee, ịhọbịrị nyam-ḿ kpịbaa hing koo, ahụ ayịdang jẹ jaabwọ kam họ ẹla uchi kaka ba.

⁶Ọngọlahị Amkpaa Agụgụ ee, angịlẹ kị dahịleng wuu wẹẹ, ā myị ká oyoyi ā jwaa ọọ-lajị nyam koo, ā myị kam kpa oyoyi wẹ ẹ-ẹga nya angịlẹ kị kaa gbịgba hang koo, ahụ Ohe Oluhye nya ala Isirẹlụ.

⁷Aji nyang du kam la ido nya angịnyị, ḿ hu ẹhị hwaa myị kaka ọọ-la oyi.

⁸M̀ mwọọgịlẹ me aanam ọngga, ọlala am nyaa ri ọngga ugbiyegu nya ịlọm lẹ.

⁹Ọháha ọlala nyam ẹ-ẹga nya ube ịgọgọ nyang juwa wuru pwuu ẹ-ẹpwụ nyam, ido ịlẹ ká angịnyị wẹẹ dong wuu yẹ ka ri ido nyam.

¹⁰M̀ kpa ịlọm ka eji juwa hụ limyi, ọọwa, i dom do wẹẹ lẹ.

¹¹M̀ hu awụrụ nya owuru ọkpakpa kụrụ, m̀ mwọọgịlẹ ri ẹla ẹlẹhụ nya angịnyị.

¹²Ị kpam kụ tụ opeje-opeje da, alere mwu eje gum.

¹³Am tị lẹ, m̀ ka raabwọ hang ahụ Amkpaa, aa wẹm ụka ọlẹ ká chụ. Ohe Oluhye ee, aa wẹm bwula ọháha o-gbu enyi-ka nyang, ká chịm da jaabwọ ká myị ọnụ.

¹⁴Gbam kpehe hi ẹpwụ nya ịwa. ā myị kam kpụ̀ myọ̀ọ ju ka ẹpwụ nya ịwa ka. Chịm da bwu ẹpwụtụbwọ nya aluji nyam, gbam kpehe bwu ụjẹ-ẹmwụ.

¹⁵Ā myị ká enyi ā myị̀ birim ka, Ā myị kam byi enyi ụ-ụjẹ-ẹmwụ ka, lee iworu o-yem mile ka.

¹⁶Amkpaa ee, bwula ọháha o-gbu enyi-ka ọnyịịla nyang, chẹhị yẹm ẹ-ẹpwụ nya ahyẹẹrwẹrwa ọtụka nyang.

¹⁷Ā ya ahị chị ọka him am ọnchẹ nyang ka, kẹwẹ ká wẹm páaa mẹ, chajị m̀ ji ẹpwụ nya uhila nya akama.

¹⁸Kẹwẹ wẹ ẹga nyam, ka chịm me, gbam kpehe bwu ẹpwụtubwo nya aluji nyam mẹ.

¹⁹À jẹ ido ịlẹ kị wẹẹ dom, à jẹ jaabwọ kị wẹẹ kpam họ bala ọ-chị oyoyi jum ka ba, à yẹ aluji nyam wuu gede-gede.

²⁰Ido odom-do bịrịm ọkịlẹtụ, ọhịhị dam gbẹgbịlẹ lẹ. M̀ ya ẹhị nọ nyọka ye ọngọ ka gá ẹrwa tam, ḿ tị ye ka. M̀ teleko nya ọngọ ka kpụm ẹjẹ, ḿ tị ye ọngọngọhẹ ka.

²¹Imyi nwụm kpá kam ka ri ang, aluji nyam tị ya ẹhwa ju ang oriri ham, imyi-enyi nwụm kpá kam ka nwà enyi, ị tị hu ere ọchagbịlangịrị ham.

²²Aa họ ká ang oriri nyaa-ā kpaa kaka wu eri, ká ọhụhụ nya ụya ọyaya nyaa-ā kpaa kaka mileji.

²³Kpaa idu chajị kị ka jẹ-ẹ̀ yẹ ọyị ka, họ ka abẹkpẹ ā jwaa ụka wuu.

²⁴Wụ agbama jahị da, ká ikẹjẹ-awụrụ ọtụka nyang ā yáa juju.

²⁵Họ ká ẹpwa nyaa-ā kpụ egwawụ-egwawụ, ká ọngọngọhẹ ā hi kụ ụwa ka.

²⁶Angịle ká yẹ akama lẹ, ị juwa myịmyị-ị̀ tụ ila yaa gụ ọọwa. Angịlẹ ká họ ang ọjụjụ-ụ̀ wẹ ene lẹ, ị tụtụm juwa kpaa kụ́ ba ọọwa u-uhye.

²⁷Aa da ịhọbịrị nyaa wuu ju, ā myị ka ọngọngọhe nyaa-ā be koo.

²⁸Aa yịlẹ ẹnyị nyaa bwu ẹpwụ nya ụpwụ nya angị hịhị, ā myị kị wa ọngọngọhẹ nyaa jula angịnyị nyang ka.

²⁹Am tị lẹ, m̀ ji ẹpwụ nya akama bala ọjụjụ, Ohe Oluhye ee, wulem eji ká chịm da mẹ!

³⁰M̀ ka gwogboo ha Ohe Oluhye leje omwumwu, m̀ ka ya ụmụmẹ nyamwụ dodehe lobe ojiji.

³¹Ọwẹ ka há Amkpa gụ ẹna ọ-ya kịla iya họọ, ọ ka kpọọ ịpyị gụ ọ-ka hu ẹna ọlẹ kọ jịra wuu.

³²Angịlẹ kị wẹẹ la ọtụpyịpyị-ị́ yẹ ẹlẹwẹ, ị ka chị ọkẹkẹnị, ọ ka ri ọhụ ojuju ha angịlẹ kị kaa gbịgba ha Ohe Oluhye.

³³Amkpaa kaa wo ọbịlẹ-bịlẹ nya angịlẹ kị la obaba, ọ́ọ̀ deeri nya angịnyị nyamwụ ịlẹ kị juwa a-agba ka.

³⁴Uhye-ọgba bala odehe ā gwogbo ha Ohe Oluhye, ká ihu ịtụka tụ iyo ịlẹpwụ nyaa wuu ā họ ịnyịnyị.

³⁵Ohe Oluhye juwa ka chị iJerusalẹm da, ọ ka ma epweji ịla iJuda nwụ́. Angịnyị nyamwụ ka kụ ụ-ụwa, ị ka ya ọpyị ọọwa la,

³⁶anyị ịtụma nya anchẹ nyamwụ ka la ọpyị ọọwa lụbwọ-lẹta, angịlẹ ká háa wuu ka kụ ụ-ụwa. Eje Ọnyịịla nya iDevidi ọlẹ ri ịnya olegbeju nya angị mwu.