Read idege EJE ỌNYỊỊLA 7 Bible Online

EJE ỌNYỊỊLA 7 - idege bible

EJE ỌNYỊỊLA 7

¹Amkpaa Ohe Oluhye nyam ee, m wẹ ẹga nyang nyọka kpụ ịbaa, Chịm da, ká gbam kpehe bwu ẹpwụtụbwọ nya angị wẹẹ chị ụnyẹ jum:

²Ó-ri ịnyị ka aluji ịịwẹ ka wum hụlam hwẹẹhwẹẹ lala ugẹbẹ a be iyo ri la o-ye olewe ọhẹ ka chịm da ka.

³Amkpaa Ohe Oluhye Amkpaa nyam ee, à tị́ yẹm-m̀ wẹ hwenghweng lẹ, am ā jẹ onyobyi jẹ,

⁴lee am ā ya ang onyobyi nwụ oligu uri nya ang ọnyịịla, lee ọ-họ oluji nyam ang nya abwẹga tu ịmịmẹ,

⁵aalẹ, aluji nyam ā kum kata-kata kaka wu, kị tụm tudu eji kị kpam ụ-ụbwọ, pẹhim dụwa ị-ịpyị pátaaa.

⁶Amkpaa ee, wuleji ẹ-ẹpwụ nya agbama nyang ká gba mịla aluji nya ịlụrụ-ụrụ ịwẹ. Ohe Oluhye nyam ee, wuleji ká leje ọkpakpa.

⁷Kpa alẹpwụma nya odehe ọlẹ wuu kaka jịra i-ijata nyang, ká hụ ẹ-ẹchị oluhye nyang ri adịrahụ nyaa.

⁸Ahụ Amkpaa ọngọleje nya alodehe wuu, chị oku ham ẹ-ẹga nya aluji nyam. Agụgụ ee, ahụ ayịdang jẹ kam da ẹlẹlẹhẹ ka.

⁹Ahụ Ohe Oluhye ọlabwẹla ọnyịịla ee, à jẹ irya ọlọkịlẹtụ nyahị bala ịbaba nyahị, họ ka ang onyobyi ọhọhọ nya alọkwọ ā ba, ka angị họ ang ọnyịịla ā godayị giri-giri.

¹⁰Ohe Oluhye à ri ọkụmada ogbem gbe lẹ, ọọ chị angị họ ang ọnyịịla da.

¹¹Ohe Oluhye ri ọngọleje ọnyịịla, kọ kaa wụ ẹjẹ ta angịnyị inyibyi ẹnụ myị ẹnụ.

¹²Ó-ri kị myị yẹ irya da ka, Ohe Oluhye kaa jwo oge nyamwụ iri, bala ọ-gbụrụ uda nyamwụ jahị daa.

¹³Ohe Oluhye nwụla àchám̀ nyamwụ nọ bala ịcha ịlẹhwa ịlụrụ-ụrụ nyamwụ nọ.

¹⁴Angịnyị inyibyi jẹnyị nya ang onyobyi ọhọhọ, hi dọdọọdọ lirya nya imajẹ ọhọhọ, ya ma ọnyị ri ọnọọkịla ọ-kpa pịrị angịnyị ju.

¹⁵Ụjẹ-ụjẹ kị chị da gbe angịkịla, ịwa-ịwa-à tị chabwọ kpọọ lẹ.

¹⁶Ụnụ gba chị udo, udo yahị kụrwọọ, ọkwọ kị me obyi nyamwụ yahị da angịkịla, dachichi yẹ kụrwaa ịwa ayịdang e-egbeju.

¹⁷M̀ ka gwogbo ha Amkpaa, chajị ọ ri ọngọ la kpakpa. M̀ ka mwu eje gwogbo ha Amkpaa Agụgụ. Eje Ọnyịịla nya iDevidi