Read idege EJE ỌNYỊỊLA 71 Bible Online

EJE ỌNYỊỊLA 71 - idege bible

EJE ỌNYỊỊLA 71

¹Amkpaa ee, ẹga nyang m̄ wẹ nyọka kpịbaa lẹ, ā myị kị chị oyoyi jum koo!

²À ri Ohe Oluhye ọ-họ ang opwoku ụka wuu, chuchuu, gbam kpehe mẹ! 2 Ya ụrụ nyang da ha eko nyam, ká kẹwẹ ka chịm da mẹ!

³Ahụ ā ri ẹjwọ ọkpịbaa nyam mẹ, ká ri ube ọnyọọngịrị ọ-chẹwụ kem. Ahụ à ri ẹjwọ ọkpịbaa bala ube ọnyọọngịrị nyam lẹ.

⁴Ohe Oluhye nyam ee, gbam kpehe bwu ẹpwụtubwọ nya alọkwọ, gbam kpehe bwu ụbwọ nya alabwẹga inyibyi.

⁵Ọngọlahị Amkpaa ee, m̀ ya ẹhị ọrịrịị-rịrị nyam wuu nịrọng, m̀ dahị hileng bwu enjwo-enjwo nyam.

⁶M̀ ya ọhịhị nyam kpụnịrọng bwu ụka-ụka kị mam, à gbem bwu ẹpwụ-ẹpwụ nya ịnam. M̀ ka gwogbo hang ụka wuu.

⁷Ọhịhị nyam ri ang ọ-chụ me ha iru nya angịnyị, chajị ahụ à ri ẹga ọkpịbaa ọnyọọngịrị nyam lẹ.

⁸M̀ kaa gwogbo hang ẹnụ myị ẹnụ, juwa ya ụmụmẹ nyang dodehe.

⁹Ā gbam ugu da ka ọka lụka nya ụchẹ nyam ka, ā nyẹẹkpẹ dam lụka kam wẹẹ la ukuru kaka wẹ koo.

¹⁰Aluji nyam juwa me obyi kị ka nwụm, ị kọ ju awụlẹ yahị dam.

¹¹Ị juwa yẹkẹẹ, “Ẹhẹẹ, Ohe Oluhye nyẹẹkpẹ dọọ lẹ! Ọngọngohe ọlẹ kọ ka kpọọ be á ji kaka, ahị ka kwọọ kaka wu myị ugbẹnyị lẹ!”

¹²Ohe Oluhye ee, ā ji hwẹẹẹ him koo, Ohe Oluhye nyam, kẹwẹ páaa ka dam ụbwọ mẹ!

¹³Oyoyi bala ayịreji ọtata ā juwa ha angịlẹ wuu kị wẹẹ mwẹla tam. Ẹpẹpẹ bala oyoyi ọ-chị ju ā ri nya angịlẹ wuu kị wẹẹ tịtọ nyọka họm ang.

¹⁴Am tị lẹ, m̀ ka dahịhile ụbwọ ọdada nyang pyịyọọ, m̀ ka juwa gwogbo hang gụ ọọwa-ọọwa.

¹⁵M̀ ka ya ụkụrwọ ẹbyẹbyi nyang pyẹ, m̀ ka ya dodehe jaabwọ ká chị angịnyị nyang da, ịnọ ụkụrwọ ịlẹ ká họ wuu kịlam-kịla la ọjẹjẹ.

¹⁶Ọngọlahị Amkpaa ee, m̀ ka wẹ nyọka ya ụkụrwọ ịtụka nyang dodehe, m̀ ka ya pyẹ jaabwọ ká há kaka ba, ahụ kẹnẹ-kẹnẹ m̄ ka ya ọháha nyang pyẹ lẹ.

¹⁷À mẹ ẹla jẹm bwu ụka ọlẹ kam ri onjwo, m̀ tị jam ya ụkụrwọ ẹbyẹbyị nyang dodehe gbee daalẹ wẹẹ.

¹⁸Ọlẹẹlẹẹ ká kam tị ri ọngọgbahị ká inyi ilegbeju nyam la owuru wuu lẹ, ā nyẹẹkpẹ dam ka Ohe Oluhye gbee kam ka ya ọngịrị nyang pyẹ jẹ aloyi ịlịlahị wuu.

¹⁹Ohe Oluhye ee, abwẹla ọnyịịla ọhọhọ nyang gbọnọ-gbọnọ wu uhye-ọgba ọyị. À chakpa họ ang ịtụka! Ohe Oluhye ee, ọngọngọhẹ-ẹ́ ji ị ka chụ meng ka!

²⁰À ya iwe da iru nya akama ịjụjụ chịm ọgụ kpá odu ịnyị, à ka ya ọngịrị onyeewe ham myịmyị, à ka gbam kpehe hi ụtụjẹ nya akama ọlẹ, ká ka chịm da bwu ọnụ nya igu.

²¹À ka hum hwaa kam ka la ihi gụ olene-ene, à ka kpụm eje myịmyị wẹẹ.

²²Ohe Oluhye nyam ee, m̀ ka gwogbo hang lẹnwụ odudu, chajị à kaa họ ọnụ ọmyịmyị nyang jịra. M̀ ka mwu eje gwogbo hang logum̀, ahụ Ọngọ Ọlịgọgọ nya ala Isirẹlụ.

²³M̀ ka diwuru nya ọkẹkẹnị juwa kpa eje nya ogbo nyang mwu, chajị à chịm da lẹ.

²⁴M̀ ka ya ụkụrwọ ịnyịịla nyang dodehe ẹnụ myị ẹnụ, chajị angịlẹ wuu kị tịtọ nyọka họm ang lẹẹ lẹ, à kụrwaa, chị oyoyi jwaa lẹ. Eje Ọnyịịla nya iSolomọn