Read idege EJE ỌNYỊỊLA 72 Bible Online

EJE ỌNYỊỊLA 72 - idege bible

EJE ỌNYỊỊLA 72

¹Aa mẹjẹ adịrahụ kọka họ ang ụ-ụgbẹyị ọkpakpa, ya ọkpẹẹkpẹẹ nyang ha ọnyị nya adịrahụ mẹ!

²Dọọ ụbwọ kọ la angịnyị nyang eje ụ-ụgbẹyị ọkpakpa, kị ka yẹ alẹbyahị ba kpong-kpong kaka mẹ.

³Họ ká ịgbọdọ ā tụ uhwa nya ịlahị ọkaka ha ọng myị ọng, ká ikiti ā rụ ẹjẹ nya ang ọnyịịla ọhọhọ mẹ.

⁴Họ ká adịrahụ ā chẹkpẹ ju alẹbyahị, kọ da angị la ọbaba ụbwọ, kọ kụrụ angị tụ alẹbyahị pyịpyị.

⁵Angịnyị nyang ā gbịgba hang jaabwọ myị abwọ ká ahịgboo nya ẹnụ-ụ́ tata ka ba, jaabwọ ká ọya-á hụ tata ka ba ju kele ka oyi ịlịlahị.

⁶Ụka nya adịrahụ oriri nyamwụ ā kpunyi jaabwọ ká enyi kaa do ju ang-ẹrụ, bala jaabwọ ká enyi ọlẹ kọọ do ju ọpyị.

⁷Ang ọnyịịla ọhọhọ ā pyebile lụka nyamwụ, ká ịlahị ọkaka-ā ji ha angịnyị wuu gbee pwụ ụka ohyẹẹkpẹ.

⁸Ọpyị-adịrahụ nyamwụ ka pyẹ ẹpwụ bwu ihu ọlọbaba ọhẹ kele ka ihu ọlọbaba ọkịla, bwu Ihu nya iYufuretisi lalaala ka gu ọbaba nya odehe.

⁹Alụma ị-ga tụ ugbileji-ugbileji da ka hirikpẹẹ họọ, aluji nyamwụ ka hịnọnọ ẹ-ẹpwụ nya ekuruwa ị-ịlahị nyamwụ.

¹⁰Ịdịrịhụ nya ala ịTaachichi bala ịnya ịpyị ịlẹ ká enyi dagaga ju ka wẹ kaka nyẹ ẹpwa họọ, ịdịrịhụ nya ala ịChẹba bala ịnya ala ịSẹba ka kpa ang-ahị warị wẹ ẹga nyamwụ.

¹¹Ịdịrịhụ wuu ka hirikpẹẹ họọ, alẹpwụma ilodehe wuu ka myị ẹrụ họọ.

¹²Ọọ gba alẹbyahị kpehe ụka kị chị eko wụrwọọ, ọọ da angị la ọbaba bala angị la ọngọdụbwọ ka ụbwọ.

¹³Ọọ yẹ ahyẹẹrwẹrwa nya angị jula ọlọlọhẹ-ka bala angị ji ẹpwụ nya ọbaba. ọọ chị ọhịhị nyaa da.

¹⁴Ọọ chaa da bwu ẹpwụ nya ọtụpyịpyị bala ọngịrị nya alabwẹga, chajị ọhịhị nyaa kẹhị ẹ-ẹga nyamwụ.

¹⁵Adịrahụ ka hị tata! Myị kị kpa okpoko ịgọm o-bwu ịChẹba warị kaka gọọ, myị ká angịnyị ā raabwọ chajị nyamwụ ụka wuu, ká ahị ọwawa nya Ohe Oluhye ā ji uhye nyamwụ ụka wuu!

¹⁶Myị ká ang oriri ā dịda ọ-ọpyị ọlẹ, ká ang-ẹrụ iluhye nya ikiti ā há ọgwọgụ. Egbe nya ekeji ịlụwa ā há lala ịla iLibanọn, ká angịnyị ịlụwa ā pyẹ pyọọọ yịrị ẹga yịrị lala apwụ bala amẹ.

¹⁷Họ ká angịnyị ā kpịtịya nya ẹnyị nya adịrahụ pyịyọọ, ká ohi oruru nyamwụ ā tata jaabwọ myị abwọ ká ẹnụ ka ji kaka ba. Ká alẹpwụma nya odehe wuu ā ye ahị ọwawa bwulọọ, kị mịla oja ọnyịịla nyamwụ mẹ.

¹⁸Anụ gwogbo ha Amkpaa Ohe Oluhye nya ala Isirẹlụ! Ọwa ụbwọọmwụ à họ ang ịlẹbyẹbyị ịwẹ lẹ.

¹⁹Anụ gwogbo ha ẹnyị ọlụmẹ-ụmẹ nyamwụ gbe oyi myị oyi! Ụmụmẹ nyamwụ ā pyẹ yịrị odehe wuu yịrị mẹ. Amẹn! Amẹnị!

²⁰(Ọlẹ à ri eju ọchịchị nya abwọ ọrịrị nya iDevidi ọnyị nya iJesi lẹlẹ.)