Read idege EJE ỌNYỊỊLA 73 Bible Online

EJE ỌNYỊỊLA 73 - idege bible

EJE ỌNYỊỊLA 73

¹Eje Ọnyịịla nya Asafụ Ịnyịlẹhị lẹ, Ohe Oluhye họ hiigu ẹ-ẹga nya ala Isirẹlụ, ọọ họ hiigu ẹ-ẹga nya angịlẹ ká ọkịlẹtụ nyaa la charị-charị.

²Am tị lẹ, m̀ chị ụchụụ chị-ị̀ wẹ kpá myị lẹ, ẹta nyam pyịpyị kpịra hi ụkụchụ ookpokpo kam ka mileji lẹ,

³chajị ọ lam ijiiji nyọka yẹ ká angịlẹ kị wẹẹ chị ọgọm bala angịnyị inyibyi kị juwa pyẹ pyọ́ọọ kịlahị-ịlahị.

⁴Ịwa-á yẹ akama ẹ-ẹpwụ yẹ kpong-kpong ka, ịnyịrọ nyaa hwo kpumkpum la kpọngkọng.

⁵Ị́ị̀ yẹ akama jaabwọ ká angịkịla kaa yẹ ka, ụma nya akama ọlẹ kọọ yẹ angịnyị ehe wuu kam-kale aa wẹ uhye nyaa ka.

⁶Ịị hu ahị ohihi dapịlẹ lala ang odoomyi, agbụrụ nya abwẹga ọ-họ angịnyị-ị họ myị̀ kụrwaa ị-ịnyịrọ lala awụrụ ogbileji.

⁷Ang onyobyi kem a kaa kpehe bwu ọkịlẹtụ nyaa lẹ, ang onyobyi myị ẹpwụ nya irya nyaa.

⁸Ịị hụlọ angịnyị ahụ, ya ala ba angịnyị tu ịmịmẹ, ị ri angị chị ọgọm ri, ị ri angị hwahwa nyọka yẹ angịkịla ba.

⁹Ịị ya ala inyibyi ba Ohe Oluhye e-epwoohe, ịị ya ẹla nya oboogo-oboogo ta ọng myị ọng.

¹⁰Ajị nya ọọwa lẹ, angị ri angịnyị nya Ohe Oluhye ri jahị kpata da wẹ ẹga nyaa, juwa ye ẹla myị ẹla kị ya wuu myị.

¹¹Ị juwa yẹkẹẹ, “Ohe Oluhye-é ka jẹ ka, Agụgụ á ka jẹ ẹlẹwẹ juhi ka.”

¹²Ọwẹ à ri ọhọhọ nya angị inyibyi lẹ. Ị hụ ẹ-ẹpwụ nya ụdụ lẹ, ị tị juwa la ang gụ ọọwa-ọọwa.

¹³Am lẹ, m̀ kpa ịlọm charị-charị chukuru odudu, kpa ịlọm cheji bala ang onyobyi ọhọhọ ododu.

¹⁴Ohe Oluhye ee, m̀ ji ẹpwụ nya akama ụka wuu, lụtụrụ ẹnụ myị ẹnụ à yẹm akama.

¹⁵Ó-ri kam ya ụma nya ala ịlịịwẹ lẹẹ, ịnọ ọọwa ka ri ọnọọkịla o-me ju angịnyị nyang lẹ.

¹⁶M̀ chachii nyọka me irya ju ang odudu ká angị inyibyi à dachichi wẹẹ ka ịlahị, ọ tị chịm ọha la ọjẹjẹ

¹⁷gbee kam rụ ka Ube Ịgọgọ nyang, ene kam-m̀ jẹ ẹbyị ọlẹ kọ wẹẹ ka họ angịnyị inyibyi.

¹⁸À yaa godayị ẹ-ẹga ogile-gile, kị ka chabwọ kpụ ẹpwụ nya ayịreji!

¹⁹Ẹ-ẹpwụ nya ẹhị ọ-mwụbiri ị ta ayịreji, ju ka ẹpwụ odolowu oluhi-uhi!

²⁰Ọhịhị nyaa ọlẹẹlẹẹ lala ụlaa ọlẹ kọọ myị ụka ká ọngịnyị chahị une. Ọngọlahị ee, ụka ká gu ịlọng achwọ, à ka họ kị ka myị yịra-yịra hi odehe ọlẹ.

²¹Ene lẹ, ọ tọm olujwo, ọ wum ọyị aalegu.

²²M̀ họ ẹla-uchi lala iyo oleji, la ọ-jẹ ọhọhọ nyang kpong-kpong ka.

²³Tị kpọkpọọkpọ, ḿ ji hwẹẹẹ hing ka, à ya ụbwọ upwuriri nyang chịm.

²⁴À kpam ụgbẹyị lẹla ọmẹjẹ nyang, à ka yem ju ka ẹpwụ nya ẹpwa ọlụmẹ-ụmẹ nyang.

²⁵Oowo m̄ tị́ la e-epwoohe gụng wẹẹ? Ịngịngịhyẹ-ẹ́ tị bam am̀ odehe ọlẹ gụng kaka.

²⁶Irya ka chịm pyẹpyẹ, ịnyịrọ nyam ka kpụ ịrwẹmbẹ myị, Ohe Oluhye à tị ri ọngịrị nyam lẹ, ọwa kẹnẹ-kẹnẹ m̄ tịtọ pyịyọọ lẹ.

²⁷Angịlẹ kị nyẹẹkpẹ dang ka ta ayịreji, à ka ta angị la kpẹẹkpẹẹ ẹ-ẹga nyang ka ayịreji.

²⁸Am tị lẹ, m̀ yẹ nyori ọ chakpa hiigu nyọka ju Ohe Oluhye chwẹẹ. M̀ hu Ọngọlahị Amkpaa nya ẹga ọkpịbaa nyam lẹ. M̀ ka ya ụkụrwọ ịlẹ wuu kọ họ dodehe. Eje Ọnyịịla nya Asafụ