Read idege EJE ỌNYỊỊLA 74 Bible Online

EJE ỌNYỊỊLA 74 - idege bible

EJE ỌNYỊỊLA 74

¹Ohe Oluhye ee, ịyẹ tị du nyẹẹkpẹ dahị ịnyị-ị̄ị̀? Anyị tị́ ká agbama nyang juwa wuru jahị da ịkpịlọ nyang ịịwẹ-ẹ̀?

²Kpịtịya nya angịnyị nyang ịlẹ ká chụ ha ịlọng bwu edede, angịlẹ ká gba kpehe bwu ẹpwụ nya ọnyọhị oriri kaka ri angịnyị nyang lụbwọ-lẹta. Kpịtịya nya Ọgbọdọ nya ịSayọn ẹga ká kụ ene.

³Jẹdịyẹ lịlọng bwu ẹpwụ nya egwawụ ịlẹ ká yẹ jaabwọ ká aluji ta ang ịlẹpwụ nya Ube Ịgọgọ ọlẹ wuu ayịreji.

⁴Aluji nyang godayị mwu eje nya ọkụrụ-kụrụ u-Ube Ịgọgọ nyang, ya ụgbàńg nyaa weji nya ang-ẹjẹẹ nya okụrụ-kụrụ.

⁵Ị kpa eje i-be ọwụ hụla ọnang deeji lala angị tụrụ ekeji i-ipyinu.

⁶Ị du ekpileku wuu abwọ yịgẹ-yịgẹ leje i-be ọwụ ịtụka bala ichiche nyaa.

⁷Ị jụ Ube Ịgọgọ nya ila weji-weji, ị kpa ibyi wẹ ẹga ká angịnyị kaa gbịgba hang.

⁸Irya nyaa ri ọ-ka gaahị beji kị ka ta ang myị ang wuu ayịreji. Ịnyị ị jụ ẹga myị ẹga ịlẹ kịị gbịgba hang ọ-ọpyị ọlẹ ila hụrụ.

⁹Ụkụrwọ ẹbyẹbyị wuu ta ube lẹ, ọlọmwụ ọhẹ-ẹ́ hi jam kaka, ọngọngọhẹ-ẹ́ tị jẹ jaabwọ kahị ka ji ẹpwụ nya akama ọlẹ tata ka ba ka.

¹⁰Ohe Oluhye ee, à ka myị aluji nyahị-ị̀ hụlọng ẹhụ kịlahị-ịlahị-ị̄ị́? À ka myị ịị kịnyaa juwa dong gbe oyi myị oyi-í?

¹¹Ịyẹ tị́ du ká wa ụbwọ upwuriri ọlọngịrị ọwẹ kwii-ì? gbọọ kpehe ká taa ayịreji mẹ!

¹²Ahụ Ohe Oluhye à ri adịrahụ nyahị bwu orogo-orogo, à chịhị da ụka lụmẹ-lụmẹ lẹ.

¹³Ahụ à chị ihu eku lọngịrị nyang lẹ, à be egbeju nya egbiriyo ịlẹpwụ nya ihu ene yịgẹ-yịgẹ.

¹⁴À be iru nya egbeju nya ugbiriyo onyobyi ene, hwọọ ha iyo ilugbileji ri.

¹⁵Ahụ à họ du ká enyi ịlagbụ bala ịlị̀bá mwụ lẹ, à tị họ ihu ịtụka nwụ kịra-kịra wuu.

¹⁶Ahụ à họ ahị ọpyẹpyẹ tụ odu ohihi lẹ, ahụ à họ ẹnụ bala ọya pịlẹ ẹ-ẹga kị ji lẹ.

¹⁷Ahụ à hu oyi ọnyọnyọọnyị nya odehe nọ lẹ, ahụ à họ ụrwẹnụ bala alogo lẹ.

¹⁸Amkpaa ee, kpịtịya jaabwọ ká aluji juwa hụlọng ahụ wẹẹ, bala jaabwọ ká angị jẹng ka wẹẹ ju ẹnyị nyang ẹpẹ wẹẹ.

¹⁹Ā pẹhi angịnyị ilikẹjẹ nyang ịlẹ kaa kpa kemkem lala enewulo ju aluji inyibyi ịwẹ ụ-ụbwọ koo, ā deeri nya angịnyị nyang pyịyọọ ẹ-ẹpwụ nya akama nyaa ka.

²⁰Kpịtịya nya iro ọlẹ ká nwa tahị. Abwẹga ọ-họ awụlẹ họ ji uku ọnyị myị ọnyị ọ-ọpyị ọlẹ.

²¹Ā myị ka oyoyi a ju angịlẹ kị ji ẹpwụ nya ọtụpyịpyị ka, ká angị jula ọlọlọhẹ-ka bala alẹbyahị ka gwogbo hang.

²²Ohe Oluhye ee, gu ịlọng achwọ ka ma uya ha ịlọng mẹ. Yẹ jaabwọ ká angị jẹng ka wẹẹ hụlọng ẹhụ ẹnụ myị ẹnụ wuu wẹẹ.

²³Ā gu ahị gboo hi iju-awụ nya ala ịlẹ ká aluji nyang wẹẹ da tang koo, jaabwọ kị wẹẹ tụ iru ẹ-ẹpwụ nya egbeju-ọngịrị ọlala jahị dang. Eje Ọnyịịla nya Asafụ