Read idege EJE ỌNYỊỊLA 76 Bible Online

EJE ỌNYỊỊLA 76 - idege bible

EJE ỌNYỊỊLA 76

¹Ị jẹ Ohe Oluhye yẹẹyẹẹ i-iJuda, ẹnyị nyamwụ kpẹ̀hị ụ-ụwa Isirẹlụ.

²Ọ nọ ẹpwa i-iJerusalẹm[5], Ọ kụ ọ-Ọgbọdọ nya ịSayọn.

³Ụ-ụwa Ọ mwụ ịcha nya aluji eku lẹ, tụ akụmada bala ige—ang-abwọ nya ẹwụ nyaa wuu.

⁴Ohe Oluhye ee, à chakpa la ụmụmẹ, à nyà ẹ-ẹpwụ nya ọngịrị bwu ịgbọdọ ịtụka la ang-ẹwụ nya aluji nyang ịlẹ ká kụrụ.

⁵Ị nu ang ịlẹ ká angịdẹwụ igburujwo nyaa la wuu kpa rụ, egu nyaa chị bẹlẹ-bẹlẹ lala ịnyaa juwa nune, angịdẹwụ ịtụka pyii! Ị hu ụbwọ ka, hu ẹta kaka.

⁶Ụka kaahụ Ohe Oluhye nya iJekọbụ kpaa ịkata, ụnyịrẹ bala ọngọ kwọọ kụ gbu chụwa dẹyị-dẹyị.

⁷Amkpaa ee, à chakpa la angịnyị wuu uhi-uhi, oowo tị godayị ị-ịlahị nyang ụka ká juwa ju agbama myị-ị̀?

⁸À chị eje nyang bwu epwoohe, odehe wuu ju uhi, godayị kpọọ i-ijata nyang.

⁹À wuleji nyọka la angị kaa họ ang onyobyi eje, ká ka gba angịlẹ wuu kị ji ẹpwụ nya ọtụpyịpyị odehe kpehe.

¹⁰Agbama ojuju nya angịnyị ehe ka mwọọgịlẹ kpa ogbo ogwogwo wang, angịlẹ kị be bwu ọgbẹwụ myị à ka tuugu jung lẹ.

¹¹Anụ myị ọnụ nya ang ha Amkpaa, kanụ tị họ ọnụ ọmyịmyị ịịwa jịra, anụ alẹpwụma ịlọnaabwọ wuu, anụ kpa ang-ahị wẹ ẹga nyamwụ ọwa ọlẹ ká angịnyị wuu ju uhi mẹ.

¹²Ọọ pwuru olegu nya ịdịrịhụ i-hi ọbọọchẹ, ọọ chị uhi jwaa ịwa ịdịrịhụ ịtụka nya odehe. Eje Ọnyịịla nya Asafụ olẹ ri nya iJedutun olegbeju nya angị mwu eje.