Read idege EJE ỌNYỊỊLA 77 Bible Online

EJE ỌNYỊỊLA 77 - idege bible

EJE ỌNYỊỊLA 77

¹M̀ chị eko gboo wụrụ Ohe Oluhye kọ ka dam ụbwọ, m̀ chị eko gboo, ọ wo omyi nyam.

²Ụka kam ji ẹpwụ nya akama, m̀ raabwọ ha Ọngọlahị, lodu m̀ kaa kpa abwọ ka uhye juwa raabwọ họọ, ḿ tị ye ẹjẹ ọkpụkpụ ka.

³Ḿ kụ irya nya ẹla nya Ohe Oluhye chịng-ng, m̀ chị ịhụ byị̀ịị ḿ me irya kpori-kpori gbee, ọkịlẹtụ kaa kpụm enyi.

⁴Ọ́ myị m̄ kpa une ọlẹhị kẹhị ka, ila ọlẹpwụ nyam du ká ọkọ nyam tala.

⁵M̀ kaa me irya nya oyi onyogo, juwa kpịtịya nya ẹka iligbalẹ.

⁶M̀ nwụ ịlọm lirya omeme lepwodu, juwa tọ ịlọm wo ẹ-ẹpwụ-ẹpwụ yẹkẹẹ,

⁷“Ọngọlahị ka pwahị pyịyọọ-ọ́? Ọ́ ka họhị ọnahị myịmyị chẹẹ kaka-á?

⁸Ọháha o-gbu enyi-ka nyamwụ ọlẹga nyahị myị gbanggbang lẹ-ẹ́? Ọnụ ịlẹ kọ myị hahị tụbiri lẹ-ẹ́?

⁹Ohe Oluhye deeri nyọka họhị ọnahị lẹ le? Agbama ọ dachichi ya ku ọmwakpa nya ahyẹẹrwẹrwa nyamwụ lẹlẹ-ẹ́?”

¹⁰Ọọwa, m̄ tị yẹkẹẹ, “Ẹbyị à họm lẹẹ-ẹ́! Ohe Oluhye-é lọngịrị ka jụ ịngịngịhyẹ họ hahị kaka-á?”

¹¹Amkpaa ee, m̀ ka kpụ ịlọm ịtịya nya ụkụrwọ ịtụka ịlẹ ká kaa họ wẹẹ, m̀ ka gbe ụkụrwọ ẹbyẹbyị ịlẹ ká họ ugbeene.

¹²M̀ ka kpa ụkụrwọ ịlẹ ká họ wuu me irya ju, juwa kụ ẹhị yaa pyịịị.

¹³Ohe Oluhye ee, ang myị ang ịlẹ ká họ lịgọgọ, ojiga ọhẹ-lọhẹ-ẹ́ lụmẹ lala ahụ ka.

¹⁴À ri Ohe Oluhye ọlẹ kọọ họ ụkụrwọ ẹbyẹbyị, à chị ọngịrị oluhi-uhi nyang ehe ha alẹpwụma datị-datị.

¹⁵À chị angịnyị nyang da bwula ọngịrị nyang, ịwa anyị ịtụma nya iJekọbụ bala iJosẹfụ.

¹⁶Enyi ịlọ̀bá chẹhị yẹng ahụ Ohe Oluhye, ị ju uhi ju ka ụjẹ-ẹmwụ.

¹⁷Enyi do bwu egbamwụ chwọ̀chwọọchwọ, ịkpala kpụ bwu uhye-ọgba gbirong-ng, apya chị hwoóhwòòhwoó ju ka ẹga myị ẹga lala ịcha nya alẹwụ.

¹⁸Ịkata nya ịkpala nyang hụ́ ẹga jigi-jigi, apya nyang ya ahịgboo ha odehe wuu, odehe hụ jigi-jigi, hụ kpuka-kpuka.

¹⁹À jẹdịyẹ bwu ẹpwụ nya enyi, chị ihu ikpori-kpori eku kpoye, ọngọngọhẹ-ẹ́ tị jẹ yẹ ọgụ nya ẹpẹtẹ nyang ka.

²⁰À kpa angịnyị nyang ụgbẹyị lala ọngọgbikpịlọ, à ya iMosisi bala Erọn ri alegbeju nyaa. Eje Ọnyịịla ọdatị-datị nya Asafụ