Read idege EJE ỌNYỊỊLA 78 Bible Online

EJE ỌNYỊỊLA 78 - idege bible

EJE ỌNYỊỊLA 78

¹Anụ angịnyị nyam ee, anụ ke ụrụ wo ọmẹjẹ nyam. Anụ ya ụrụ da ha ẹla ọlẹ kam wẹẹ ka ya.

²M̀ ka kpa oja ịkpịta ya ẹla tanụ, bala ọ-da ang ịkpịbaa i-bwu ẹpwụ nya ego nyahị wụlẹ—

³ang ịlẹ kahị wowo bala ọjẹjẹ, ká adahị igogo anyị ya jehi.

⁴Áhị ka ya kpịbaa hi anyị nyahị ka, ahị ka ya je aloyi ọlịlahị ọngịrị nya Amkpaa bala ụkụrwọ ịtụka ịlẹ kọ họ, tụ ang ịlẹbyẹbyị ịlẹ kọ họ.

⁵Ọ ya ehile ha ala Isirẹlụ, kị ri anyị ịtụma nya iJekọbụ. Ọ byi adahị igogo anyị ya nyị mẹ ehile ịịwa jẹ anyị nyaa,

⁶chajị ká aloyi ọbaa-ba ka jaa, tụ anyị ịlẹ kị mama lẹka, kịịwa tịtị ka maa jẹ anyị nyaa.

⁷Bwula ọọwa, aloyi ọnyọnyọọnyị ka dahịhile Ohe Oluhye, kị ka juwa ju ihi nya ehile nyamwụ, kị ka deeri nya ụkụrwọ ịlẹ kọ họ kpong-kpong ka.

⁸Ị́ tụtụm ka lala adaa igogo anyị kaka. Adaa anyị ri angị la egbeju-ọngịrị bala ọ-kaa ju ihi ka, ị́ dahịhile Ohe Oluhye lọkịlẹtụ nyaa wuu ka, ị́ myị hu irya nyaa họọ juwa dịrọọ kpẹẹkpẹẹ ka.

⁹Ala Ifurem kị ju agidi nya ẹwụ leda nyaa wuu, mwọọgịlẹ mwụ ata bịmwụ ẹnụ ká ẹwụ kpeji.

¹⁰Ị́ ba iro ọlẹ kị nwà ta Ohe Oluhye jẹ ka, ị pwa ihi nya ehile nyamwụ ojuju.

¹¹Ị deeri nya ang ịlẹ wuu kọ họ— ụkụrwọ ẹbyẹbyị ịlẹ kọ họ kị kpẹhị nya ịlaa yẹ.

¹²Ohe Oluhye họ ụkụrwọ ẹbyẹbyị a-ahị nya adaa igogo anyị, ụ-ụwa uteeji nya iSowan ọ-ọpyị nya Ijipiti.

¹³Ọ chị ihu eku, kpaa bwu ụwa kpoye, ọ họ ká enyi go kụkụ pyịyọ-pyịyọ lala egwalọ.

¹⁴Alẹnụ ọ kpaa ụgbẹyị legbamwụ, alodu wuu ọọ kpaa ụgbẹyị lahịgboo nya ila.

¹⁵Ọ gu ajwọ ene kpooo u-ugbileji, ya enyi haa nwa bwu ụjẹ-enyi.

¹⁶Ọ be ọ̀bá nya enyi bwu ẹpwụ nya ẹjwọ, la enyi mwụ ọtụka-ọtụka lala ihu.

¹⁷Ị tị kịnyaa juwa họ ang onyobyi ba Ohe Oluhye, ị la egbeju-ọngịrị ta Agụgụ u-ugbileji.

¹⁸Ị tọchị-tọchị ma Ohe Oluhye yẹ bwula o-byọọ kọ ka ya ang oriri ọlẹ kọ háā haa.

¹⁹Ị mwala ya ba Ohe Oluhye yẹkẹẹ, “Ohe Oluhye ka jẹ-ẹ̀ ye ang oriri hahị am̀ u-ugbileji-í?

²⁰Ịnyịlẹhị lẹ, ọ ya ang mịla ẹjwọ, enyị bene kùúú juwa mwụ́ gbụrụ-gbụrụ. Ee lẹ, ọ ka jẹ-ẹ̀ ya ịkaa hahị rị, ya iyo ha angịnyị nyamwụ ri ịnyịnyị myị-ị̄ị́?”

²¹Amkpaa wụ ẹjẹ ụka kọ wo ẹla ọọwa, ikẹjẹ-awụrụ nyamwụ wuru pwuuu jahị da anyị nya iJekọbụ, agbama nyamwụ wuleji yahị da ala Isirẹlụ,

²²chajị ị́ myị la Ohe Oluhye myị ka, ị́ tị dahịhiloo kọ ka chaa da myị ka.

²³Tị kpọkpọọkpọ, ọ ya ẹla ta uhye-ọgba, ọ wụrụ agbayị nya epwoohe,

²⁴ya ịkaa du warị waa bwu epwoohe, bwula ịmána ọlẹ kọ ya haa ri.

²⁵Lẹẹlẹ, ị ri ang ọlẹ ká alegu-ẹrụ kaa ri, Ohe Oluhye ya haa-ā ri jaabwọ myị abwọ kị tịtọ.

²⁶Ọ họ ká igbachịwụ ọ-bwu ọmwẹnụ-ụtụrụ da, ọ wule igbachịwụ o-bwu edii eji lọngịrị nyamwụ.

²⁷Ọ du ịchịnụ warị wẹ angịnyị nyamwụ, ị ju iru lala ugburuja ịlọnụ nya ihu.

²⁸Ọ họ kị chabwọ ju wẹ ọdọda nya ịkampụ nyaa, yịrị ẹga yịrị tụ ẹpwa nyaa da wuu.

²⁹Angị ri gbee kị wu ẹpwụ kpọngkpọng, Ohe Oluhye ya ang ọlẹ kị tịtọ haa.

³⁰Ene kị tị ka ri ang ọwẹ wu ịlaa ọnụ, kị wẹẹ kpakpa ri wẹẹ,

³¹agbama nya Ohe Oluhye à wuru jahị daa, ọ nwụ alẹng i-ri igburujwo lẹpwụ nyaa, kpa ikolobya ịlahịchịng nya ala Isirẹlụ nọnọ lẹlẹ.

³²Tị kpọkpọọkpọ, angị ihihi nyaa kịnyaa juwa họ ang onyobyi, ụkụrwọ ẹbyẹbyị nyamwụ ịwẹ wuu-ú tụtụm hwaa ugbii kpụ̀ ị myị lọọ ka.

³³Lẹẹlẹ, ọ họ ká ọhịhị nyaa myị pwẹẹ lala ọhụ ọ-da pweee, ị myị̀ luhi ojuju ẹ-ẹpwụ nya ọhịhị nyaa wuu.

³⁴Ụka kọ nwụ angịhyẹ nyaa, angị ihihi yẹ kpata juwa ka ẹga nyamwụ, ị teleko nyamwụ kekeeke, yẹ irya da nyà chọọ ọgụ.

³⁵Ị kpịtịya nyori Ohe Oluhye ri ẹjwọ ọ-chẹwụ kaa, nyori Ohe Oluhye Agụgụ à ri ọngọ gbaa kpehe lẹ.

³⁶Ẹla oyaya nyaa tị ba ọ-ọnụ-ọnụ, ọnọọkịla kpá kem ị me lẹ.

³⁷Ị́ dahịhile Ohe Oluhye lọkịlẹtụ nyaa wuu ka, ị́ ba iro ọlẹ kị nwa tọọ jẹ ka.

³⁸Ma, ọ tị yẹ angịnyị nyamwụ ahyẹẹrwẹrwa, hịnyọhi ang inyibyi ịlẹ kị họ, du kọ taa ayịreji ka. Ụka lụmẹ-lụmẹ, ọọ wu agbama nyamwụ kpa, ọọ pwuru ikẹjẹ-awụrụ nyamwụ.

³⁹Ọ kpịtịya nyori angịnyị ehe amamdiroko ị ri lẹ, ọhịhị nyaa kaa chịpwụrụ lala ọhụ ọ-da pilele kam̀, kọ tị kaa nyà tịrẹkpẹ kaka.

⁴⁰Ámalẹ kịị la egbeju-ọngịrị jahị dọọ u-ugbileji wẹẹ-ẹ́! Ị họ olujwo tọọ ụka lụmẹ-lụmẹ!

⁴¹Ị ma Ohe Oluhye yẹ kịla ụka ohu kụrụ iwo, du agbama ju Ọng Ọlịgọgọ nya ala Isirẹlụ.

⁴²Ịwa-ā ka kpịtịya nya ọngịrị ọtụka nyamwụ kpụ, lee jaabwọ kọ gbaa kpehe bwu ẹpwụtubwo nya aluji,

⁴³lẹẹ ụkụrwọ ẹbyẹbyị ịtụka ịlẹ kọ họ ụteeji nya iSowan ọ-ọpyị nya Ijipiti ka.

⁴⁴Ọ họ ihu ịtụka yẹ ri ịwọ-ịwọ du ká ala Ijipiti-í ye enyi nwa ka.

⁴⁵Ọ du iru nya ịjị ka ẹga nyaa ịlẹ kị hu akama haa, bala arwa ịlẹ kị bịrị ọpyị nyaa.

⁴⁶Ọ du ekpunjuju kaka jụ ang-ẹrụ nyaa, ịyịrị nẹ ang-ẹrụ ịlẹ kị wu wuu kịrẹm.

⁴⁷Ọ do ekpawẹ bịrị alakọnụ nyaa, ọ ta ikiledu nyaa ayịreji lohu onyobyi-obyi.

⁴⁸Ọ nwụ ịna nyaa lekpawẹ, ọ nwụ iyo ileji ịkịla nyaa lịkpala.

⁴⁹Ọ ju agbama ọtụka-ọtụka taa, ikẹjẹ-awụrụ ọtụka tụ agbama ojuju nyamwụ wẹ bwọọọ lala ógù nya angịlẹ kịị du ẹrụ kaka nwụ ọngịnyị.

⁵⁰Ọ du agbama nyamwụ ẹrụ kpụrụrụ chaa ọgụ. ọ́ chị ala Ijipiti ịwẹ da ka, ọ nwaa lẹdụrụ onyobyi.

⁵¹Ọ nwụ anyị alẹng nya ọgbanyẹ ịla Ijipiti, bwu ugbiyegu ọnyọnyọọnyị nyaa wuu chọnụ.

⁵²Ọ tị kpa angịnyị nyamwụ ụgbẹyị rụ bwu ugbileji jaabwọ ká ọngọgbikpịlọ kaa họ.

⁵³Ọ kpaa rụ lokpunyi, lẹ, ị́ ju uhi kpong-kpong ka, ihu tị ye aluji nyaa mile.

⁵⁴Ọ kpaa wẹ ọpyị ọlịgọgọ nyamwụ, kele ka ịpyị ilikiti ịlẹ kọ nu haa.

⁵⁵Ọ ku angịlẹ kị kụ ụ-ụwa rụ hi ẹga da ha angịnyị nyamwụ, hu ọpyị nyaa gà ha angịnyị nyamwụ nya ang ọlala nyaa, ọ ya ẹpwa nyaa ha alimwawụ nya ala Isirẹlụ kụ.

⁵⁶Ị tị mwọọgịlẹ la egbeju-ọngịrị ta Ohe Oluhye Agụgụ, kpụ ị mọọ yẹ. Ị́myị ju ihi nya ehile nyamwụ ka.

⁵⁷Ị la egbeju-ọngịrị ta Ohe Oluhye, ị́ la kpẹẹkpẹẹ ka lala adaa igogo anyị, ị́ ju ọdahịhile ka lala ịcha ọ-lẹhị kpunu-kpunu.

⁵⁸Ị du agbama jwọọ bwula o-me ada ị-kpụ́ ijiga, ị họ ká ijiiji nyamwụ wuleji ajị nya ekpeku ịwẹ kị họ.

⁵⁹Ohe Oluhye wụ ẹjẹ ụka kọ yẹ ọhọhọ ọwẹ wuu, du kọ pwa angịnyị nyamwụ lụpwụ okopyi.

⁶⁰Ọ pẹhi ọdụ nyamwụ ọla iChilo deeji, Ọdụ Ọlịgọgọ ẹga kọ kụ ẹ-ẹpwarịrị nya angịnyị ene-ene.

⁶¹Ọ ya iwe da aluji nu Akpa nya Iro kpa rụ, ịnọ ọwa-à tị ri ang-ẹjẹẹ nya ọngịrị bala ụmụmẹ nyamwụ lẹ.

⁶²Ọ pẹhi angịnyị nyamwụ la aluji nwaa loge nya ẹwụ, ọ wụ ẹjẹ ta angịnyị nyamwụ ịlẹ kọ la lụbwọ-lẹta.

⁶³Ila rụ ikolobya nyaa wuu, ịyẹẹnọ nyaa-á ye alẹng ka rụrwọ kaka.

⁶⁴Ị nwụ angịkiliya nyaa labwẹga, ị tị myị ịhụ-egu nyaa jida nya ọrwaa ka.

⁶⁵Ụka ohyẹẹkpẹ, Ọngọlahị wuleji kpịraka lala ịnyaa nune ene-ene, lala ọngọtụka ọlẹ ká ere juwa jwọọ ọngịrị.

⁶⁶Ọ chị aluji nyamwụ hụlẹẹ, kụrwaa chẹẹchẹẹ loyoyi jwaa pyịyọọ.

⁶⁷Ọ pwa anyị ịtụma nya iJosẹfụ, ọ chụ imwawụ nya Ifurem chụ ka.

⁶⁸Ọkọkọ nya ọọwa lẹ, ọ chụ imwawụ nya iJuda, ọ chụ Ọgbọdọ nya ịSayọn ẹga kọ kụ.

⁶⁹Ọ nwụ Ube Ịgọgọ nyamwụ luhye gbọnọ-gbọnọ lala ịgbọdọ, ọ nwọọ giri-giri lala odehe ayịdang kọ ya itiwe nyamwụ yeji giri-giri gbe oyi myị oyi.

⁷⁰Ọ chụ iDevidi ọnchẹ nyamwụ, gbọọ kpehe bwu ẹpwarịrị nya ịkpịlọ,

⁷¹ẹga kọ juwa kpa ịmwụ ri kaka ri adịrahụ nya ala Isirẹlụ, ri ọngọ kpẹhị rịrị anyị ịtụma nya iJekọbụ angịnyị nyamwụ, juwa kpaa lala ọngọgbikpịlọ.

⁷²IDevidi kpẹhị rịraa yẹẹyẹẹ lọkịlẹtụ ookpokpo, ọ kpaa bwula ẹla ọjẹjẹ. Eje Ọnyịịla nya Asafụ