Read idege EJE ỌNYỊỊLA 79 Bible Online

EJE ỌNYỊỊLA 79 - idege bible

EJE ỌNYỊỊLA 79

¹Ohe Oluhye ee, angị jẹng ka be ọpyị nyang ẹpwa lẹ oo! Ị kpa ibyi wẹ Ube Ịgọgọ nyang, ta iJerusalẹm ayịreji, họ ọ kpụ egwawụ-egwawụ lẹ.

²Ị pẹhi akịrakpa nya angịnyị nyang chị ha epwu kị ka ryaa nya ang oriri nyaa. Ị pẹhi akịrakpa nya angị ịkpẹẹkpẹẹ nyang chị ha iyo ịlẹpwamẹ.

³Ị chị ịwọ nyaa cheji lala enyi, juwa mwụ tụ ẹga myị ẹga nya iJerusalẹm da, ọngọnọhẹ-ẹ́ hi lahị ka ju egu ịwẹ eji kaka.

⁴Ahị ri angịnyị ịlẹ ká alẹpwụma ị-baahị ba kaa kpa do, ịị hụlọ ẹhụ juhi bala ọ-kpahị hu utungguru.

⁵Amkpaa ee, à ka ju agbama tahị ịịwẹ pyịyọọ? Ikẹjẹ-awụrụ nyang ka juwa wuru kịnyaa ịịwẹ gbe oyi myị oyi-í?

⁶Ji agbama nyang ahị da ẹpwụma ịlẹ kị jẹng ka— kịị raabwọ hang kpong-kpong ka mẹ.

⁷Ị go anyị nya iJekọbụ angịnyị nyang ịịwa nwụ, ị yẹ ọpyị nyang la egwawụ-egwawụ.

⁸Ā yẹhị akama chajị nya ang inyibyi ịlẹ ká adahị igogo anyị họ kaka, yẹhị ahyẹẹrwẹrwa páaa mẹ, chajị áhị la ahị ọdahile kpong-kpong kaka.

⁹Ohe Oluhye ọngọchịda nyahị ee, dahị ụbwọ mẹ, chajị nya ihi ọlala nya ẹnyị nyang, ká gbahị kpehe bala ọ-hịnyọhi ịhọbịrị nyahị mẹ.

¹⁰Ā myị ká alẹpwụma ịkịla-ā juhi ẹpẹ bwula ọ-tọhị wo yẹkẹẹ, “Álẹ Ohe oluhye nyanụ à tị́ ji mẹ” ka. Họ alẹpwụma ịkịla kwiwa kahị kpẹhị nya ịlọhị yẹ, chajị ịwa-à chị ịwọ nya anchẹ nyang lẹ.

¹¹Wo eru ọchịchị nya alagba wẹẹ, ká kpa ọngịrị ọtụka nyang gba angịlẹ kị ya eje nya igu wu-ù wẹ kpehe.

¹²Ọngọlahị ee, nwụ̀ alẹpwụma ịkịla uri tịrẹkpẹ ugbabwọ irwiye chajị nya ido ịlẹ wuu kị dong.

¹³Aalẹ, ahị angịnyị nyang, ịkpịlọ ịlẹ ka kaa kpẹhị rịrị ka jing obe gbe oyi myị oyi, bala o-gwogbo hang pyịyọọ. Eje Ọnyịịla nya Asafụ ọlẹ ri eje ọlẹ kị da ha olegbeju nya angị mwu eje