Read idege EJE ỌNYỊỊLA 80 Bible Online

EJE ỌNYỊỊLA 80 - idege bible

EJE ỌNYỊỊLA 80

¹Ọngọgbegbe nya ala Isirẹlụ ee, wo lahị ooo, ahụ ọngọ kpa ala Isirẹlụ[6] jaabwọ kịị gbe ịkpịlọ, ká hụhụ ẹ-ẹchị-adịrahụ nyang pwọọọ apewa nya alegu icherubu, ya ahịgboo nyang mẹjẹẹhị.

²Chị ịlọng ehe mẹjẹ imwawụ nya Ifurem bala iBenjamịn bala ịManasẹ. Mẹ ọngịrị ọtụka nyang jẹẹhị, kẹwẹ ká chịhị da!

³Ohe Oluhye ee, kpahị nyà tịrẹkpẹ! Yẹhị lẹhị nya ọnahị nyang, chajị kahị ka chịda.

⁴Amkpaa Ohe Oluhye Agụgụ ee, à ka kịnyaa la agbama ojuju, juwa pwa abwọ ọrịrị nya angịnyị nyang pyịyọọ-ọ́?

⁵À ya ọjụjụ hahị nyang oriri, hu egbejida myị̀ ẹja hahị nwà.

⁶À họ alẹpwụma ịkịla jẹẹhị jẹ kpa họ, aluji nyahị kpahị do hu ụbwọ nọ ụ-ụrụụ.

⁷Ohe Oluhye Agụgụ ee, kpahị nyà tịrẹkpẹ! Yẹhị lẹhị nya ọnahị nyang, chajị kahị ka chịda.

⁸À kpahị nyà bwu Ijipiti lala obebe-eji nya alakọnụ ochiche-ochiche, ku alẹpwụma ịkịla rụ hi ọpyị nyaa, yahị kụ ụ-ụwa.

⁹A nwụla ẹga da hwẹ̀ẹẹ hahị, ọọwa, āhị yẹta yeji, pyẹ yịrị ọpyị yịrị lẹ.

¹⁰Ahị kpụ̀ ụrụrụ ke ikiti lụmẹ-lụmẹ, ábwọ nyahị kpụ ke ekeji ịtụka nya isida.

¹¹Ábwọ ịịwa pyẹ ju ka Ihu nya iMeditareniya lalaala ka ju ka Ihu nya iYufuretisi.

¹²Ee lẹ, ịyẹ tị́ du ká tụrụ egwalọ nyahị beji kpalị-kpalị, ká anyabalịwụ ịchịpwụrụ wẹẹ hyahị alakọnụ kpa rụ mẹ?

¹³Ikomba ịlẹpwamẹ kpa ata baa mọọmọọmọọ, iyo ịlẹpwamẹ huuhi nya ang oriri nyaa.

¹⁴Ohe Oluhye Agụgụ ee, jahị kpata da wẹ ẹga nyahị, chẹhị bwu epwoohe kaka yẹ iwe-ahụrụ nyahị wẹẹ, kẹwẹ ká kpẹhị rịrị alakọnụ ọlẹ,

¹⁵alakọnụ ọlẹ kpangga ká ya ju lịlọng, ká kpa nwà ha ịlọng-ǹg wẹ mẹ.

¹⁶Aluji chọọ eku deeji, jwọọ ila hụrụ. Agbama nyang ā ta aluji ịwẹ ayịreji mẹ!

¹⁷Aa kpẹhị rịrị bala ọ-chẹwụ ke angịnyị nyang ịlẹ ka chu, ịwa ẹpwụma ọlẹ ká kpa nwà ha ịlọng-ǹg wẹ mẹ.

¹⁸Aalẹ, áhị tụtụm ka nyẹẹkpẹ dang myịmyị kaka, ya ọhịhị onyeewe hahị, chajị kahị ka jẹ-ẹ̀ wụrụ ẹnyị nyang myịmyị.

¹⁹Amkpaa Ohe Oluhye Agụgụ ee, kpahị nyà tịrẹkpẹ! Yẹhị lẹhị nya ọnahị nyang, chajị kahị ka chịda. Eje Ọnyịịla nya Asafụ ọlẹ ri nya Olegbeju nya angị mwụ eje.