Read idege EJE ỌNYỊỊLA 81 Bible Online

EJE ỌNYỊỊLA 81 - idege bible

EJE ỌNYỊỊLA 81

¹Anụ mwu eje nya ọkẹkẹnị ha Ohe Oluhye ọngịrị nyahị, anụ mwu eje gwogbo ha Ohe Oluhye nya iJekọbụ!

²Anụ dọmwụ nya eje omwumwu, kanụ du ịchẹchẹ jwọọ, anụ kpa ẹnwụ bala ogum̀ du ang ọ-kpụ ịpyọ.

³Anụ chị ekure chajị nya ọhụhụ nya ịtịya ọkpụkpụ, lụka nya ọya onyeewe bala ọya ọjịra ẹkịla.

⁴Ole à ri ehile am̀ Isirẹlụ lẹ, ehile o-bwu ẹga nya Ohe Oluhye nya iJekọbụ ịnyị.

⁵Ọ hwọọ nya ehile ha ala Isirẹlụ[7] ụka kọ mwẹla ta ala Ijipiti ajị nyọka gbahị kpehe. M̀ wo omyi ọhẹ kpá kam jọọ ogu datị ka kọ yẹkẹẹ,

⁶“M̀ hiri olo hiinu e-egbeju lẹ, m̀ ye olo ọnyẹẹnyẹẹ ọwẹ rịrị e-eji hiinu lẹ.

⁷Anụ wụrụm ụka kanụ ji ẹpwụ nya akama, m̀ chịnụ da, m̀ wẹẹnụ bwu ẹga kam ji ẹ-ẹpwụ nya igbachịwụ nya ịkpala, m̀ manụ yẹ ẹ-ẹga nya ágbụ nya enyi ịla iMeriba.

⁸Anụ angịnyị nyam ee, anụ ke ụrụ wo ọna ọlẹ kam wẹẹ danụ mẹ, ang pyíì ká ala Isirẹlụ ka myị-ị̀ ke ụrụ làm!

⁹Ánụ ka la ojiga ọhẹ-lọhẹ o-bwu ẹpwụma ọkịla koo, ānụ kpụ eteji ha ojiga kpong-kpong koo.

¹⁰Am à ri Amkpaa Ohe Oluhye nyanụ ọlẹ kọ gbanụ kpehe bwu ọpyị nya Ijipiti lẹ. Anụ ya ọnụ nyanụ nịrọm mẹ, m̀ ka ya ang oriri myọọ pwẹẹpwẹẹ hanụ.

¹¹“Angịnyị nyam-ḿ tị myị ke ụrụ làm ka, ala Isirẹlụ-ụ́ tịtọ nyọka yẹm-m yẹ ẹ-ẹhị kpong-kpong ka.

¹²Ọọwa, m̄ pẹhyaa kị ka kịnyaa ụ-ụgbẹyị nya aruwoka nyaa, kị ka juwa họ ang myị ang ọlẹ kọ báa i-irya lẹlẹ.

¹³Ang pyíì ká angịnyị nyam ka myị-ị̀ ke ụrụ làm, kịịwa ala Isirẹlụ ka dịrẹ ụgbẹyị nyam.

¹⁴Ịnọ m̀ tị ka kụrụ aluji nyaa chẹẹchẹẹ ahyaahị haa, ụbwọ nyam tị ka ba angị báa ẹtẹ ịwẹ lọbịrị ụka-ka.

¹⁵Angịlẹ ká am Amkpaa waa ẹjẹ ka ju uhi kpabwọ chịbagụ ị-ịlahị nyam, akama ọlẹ kam ka yaa ka ri akama ọpyịyọọ.

¹⁶Anụ tị lẹ, m̀ ka ya ang oriri ọlẹ kọ ri ọlahịchịng gụ wuu hanụ, m̀ ka ru inwa olohulo hanụ nẹ gbee kanụ ka wu ẹpwụ.”