Read idege EJE ỌNYỊỊLA 82 Bible Online

EJE ỌNYỊỊLA 82 - idege bible

EJE ỌNYỊỊLA 82

¹Eje Ọnyịịla nya Asafụ Ohe Oluhye ri olegbeju ụgada ube oleje olepwoohe, juwa la ihye nya alẹpwụma datị-datị eje yẹkẹẹ,

²“Anụ hịnyọ la eje ọ-la hịrọ-hịrọ mẹ! Anụ ba la ọ-chẹkpẹ ju angịnyị inyibyi pyííì!

³Anụ-ụ́ụ̀ chẹkpẹ ju alẹbyahị bala anyị-egu. Anụ ya iwe ọlẹ kọ ri nya angị ji ẹpwụ nya ọbaba bala angị la ọngọdụbwọ ka da haa.

⁴Anụ-ụ́ụ̀ gbaa kpehe bwula ọ-chaa da bwu ụbwọ nya angị họ ang onyobyi.

⁵“Ánụ chakpa jẹ ịngịngịhyẹ ka tị̀tị̀! Anụ chị uchi lụmẹ! Anụ họ ụkụrwọ nyanụ ẹ-ẹpwụ nya ukpowu, ẹla ọkpẹẹkpẹẹ o-wu odehe kpa myị gbanggbang lẹ.

⁶Eje ọlẹ kam wẹẹ lanụ ri yẹkẹẹ, ịnọ ihye anụ wuu à tị́ ri, anyị nya Agụgụ anụ ri lẹ.

⁷Anụ tị ka gbu jaabwọ ká angịnyị ehe kaa gbu, ọhịhị nyanụ ka ma anụ tị ka gbu lala angịnyị ehe; ọhịhị nyanụ ka chịpwụrụ ịnya adịrahụ ọhẹ-lọhẹ.”

⁸Ohe Oluhye ee, wuleji ká la odehe eje ooo, chajị ahụ à la ẹpwụma ịlodehe ọlẹ wuu lẹ. Eje Ọnyịịla ọlẹ ri eje nya Asafụ