Read idege EJE ỌNYỊỊLA 83 Bible Online

EJE ỌNYỊỊLA 83 - idege bible

EJE ỌNYỊỊLA 83

¹Ohe Oluhye ee, a hu ujiji koo, ā hụhụ chịng yọnụ bawụlẹ ka!

²Yẹ-ẹ̀ wẹ wẹẹ, aluji nyang juwa hwọnụ jahị dang, angị bang ẹtẹ wẹẹ mwẹla tang lẹ.

³Ị kpa ijẹẹhị me obyi inyibyi ju angịnyị nyang, ị kọ ju awụlẹ jahị da angịnyị nyang ịlẹ ká chẹwụ ke.

⁴Ị juwa byi awụlẹ yẹkẹẹ, “Anụ kẹwẹ kahị ta ẹpwụma nyaa ayịreji, ká ọngọngọhẹ-ẹ́ ka wo ẹnyị nya ala Isirẹlụ kaka pyịyọọ mẹ.”

⁵Ị me obyi nyaa chọọ ọchị wu giri-giri lẹ, ị dụgba wule awụlẹ jahị dang lụmẹ—

⁶ee, ịwa ala Ẹdọm bala Ichimẹla bala ala iMowabụ bala ịHagiriti

⁷tụ ala ala ịGẹbalụ bala ala Amọn bala ala Amalẹkị, bala ala iFilisitiya bala ịTaya anyị wuu ịnyị.

⁸Ala Asiriya dọmwụ yẹjulaa ịnyịnyị lala alakpa ịnyịịngịrị ịlẹ kị ka tụkụ yi ala Amọn bala ala iMowabụ kị ri anyị ịtụma nya ịLọtụ.

⁹Aa gwaa ụbwọ jaabwọ ká họ ala iMidiyan, haa elego jaabwọ ká họ iSisẹra bala ịJabin lẹẹ Ihi nya iKichọn,

¹⁰kị ta ayịreji ụ-ụwa Ẹndọọ, ká akịrakpa nyaa mama ju eji ụ-ụwa.

¹¹Aa họ ká alegbeju nyaa-ā gbu lala Ọrẹbụ bala ịSiibu, ká ịdịrịhụ nyaa wuu ā tị̀tị̀ gbu lala ịSẹba bala ịSalụmuna anyị,

¹²chajị ị lẹẹ yẹkẹẹ, “Ahị hu ọpyị ọlẹ kọ ri nya Ohe Oluhye kahị ya la mẹ.”

¹³Ohe Oluhye nyam ee, aa nyaa epepe hụrụ lala ọrụ nya ọpyị, kị nyí epepe jaabwọ ká igbachịwụ kaa da ewoo nya ang.

¹⁴Jaabwọ ka ila kaa rụ ipyinu, bala jaabwọ ká ẹlẹlẹ nya ila kaa rụ ikiti,

¹⁵ịnyịnyị ā ka kwaa rụ ligbachịwụ nyang bala ọ-chị uhi jwaa lugbọchịrị nyang lẹ.

¹⁶Amkpaa ee, chị oyoyi jwaa pẹtẹ-pẹtẹ, ká họ kị jẹ ọngịrị nyang.

¹⁷Myị kị kụrwaa bala o-ji ẹpwụ nya uhi ojuju gbe oyi myị oyi, họ kị ta ayịreji ẹ-ẹpwụ nya oyoyi.

¹⁸Họ kị jẹ nyori ahụ ụbwọng à ri Amkpaa ọlẹ ká ri Agụgụ ọlẹ kọ ri adịrahụ nya odehe wuu lẹ. Eje Ọnyịịla nya anyị nya iKora ọlẹ ri eje ọlẹ kị da ha olegbeju nya angị mwu eje.