Read idege EJE ỌNYỊỊLA 84 Bible Online

EJE ỌNYỊỊLA 84 - idege bible

EJE ỌNYỊỊLA 84

¹Amkpaa Agụgụ ee, Ube Ịgọgọ nyang chakpa ham lụmẹ!

²M̀ charịnya, ịnyịlẹhị ịnyị! M̀ babọọnya nyọka ka Ube Ịgọgọ nya Amkpaa. Am ayịdang lẹpwụ-lẹpwụ wuu juwa mwu eje hang ahụ Ohe Oluhye ọlẹ ká juwa hịhị.

³Egwe ri egwe, ị nọ awụ, arwịị ri arwịị, ị la ẹpwa ẹga kịị ya anyị nyaa nọ ju ogidi nyang ahụ Amkpaa Agụgụ Adịrahụ bala Ohe Oluhye nyam chwẹẹ.

⁴Angịlẹ kị nọ ẹpwa u-Ube Ịgọgọ nyang, kị wẹẹ mwu eje hang ụka wuu wẹẹ, ịnyaa pyẹ̀ẹẹ haa lẹ!

⁵Angịlẹ wuu kịị ye ọngịrị bwu ẹga nyang ká imyi nyọka kpa ẹta kaka chị Ọgbọdọ nya ịSayọn wẹẹ nwaa wẹẹ, ịnyaa pyẹ̀ẹẹ haa lẹ!

⁶Jaabwọ kị juwa chịpwụrụ bwu Ọkpọọ nya ịBaka ọchọhụ kịra-kịra, ụwa yẹla ágbụ nya enyi, enyi nya ahị ọwawa myị̀ ẹmwụ-enyi ịlụwa yịlọlọọọ.

⁷Jaabwọ kị wẹẹ kịnyaa lẹdịyẹ nyaa, ịnyịnyị-ịnyịnyị ị juwa la ọngịrị gụ olene-ene lẹ, ị ka jẹ kaka yẹ Ohe Oluhye ọlẹ kọ gụ ijiga wuu.

⁸Amkpaa Ohe Oluhye Agụgụ ee, wo abwọ ọrịrị nyam, Ohe Oluhye nya iJekọbụ ee, chuchuu wo lam.

⁹Ohe Oluhye ee, wahị kụrụ adịrahụ nyahị, yẹ ahyẹẹrẹrwa nya adịrahụ ọlẹ ka chụ.

¹⁰Ẹnụtụrụ ookpokpo ọlam-ọlam ọlẹ ọ-họ u-Ube Ịgọgọ nyang hagụ ahị ọpyẹpyẹ ụnọ ịlẹ ká ọngịnyị ka họ ẹ-ẹga ọkịla. Ọ-ka ri ọngọ godayị rịrị ọ-ọnang nya ẹpwa nya Ohe Oluhye nyam ham gụ ọ-ka kụ ẹ-ẹpwụ nya ụdụ ẹ-ẹpwa nya angịnyị inyibyi.

¹¹Amkpaa Ohe Oluhye à ri ọngọ chẹwụ keehi bala ahịgboo nyahị lẹ. Ọọ wahị kụrụụhị bwula ọ-họhị ọnahị bala ọ-ya ihi ọlala hahị. Ọọ wu ụbwọ kpa la ang ọnyịịla ọhẹ-lọhẹ hi angị kaa họ ang ọlẹ kọ pwoku ka.

¹²Amkpaa Agụgụ ee, angịlẹ kị dahị hileng wẹẹ, ịnya angịịwa pyẹ̀ẹẹ haa lẹ! Eje Ọnyịịla nya anyị nya iKora ọlẹ ri eje ọlẹ kị mwu ha olegbeju nya angị mwu eje.