Read idege EJE ỌNYỊỊLA 85 Bible Online

EJE ỌNYỊỊLA 85 - idege bible

EJE ỌNYỊỊLA 85

¹Amkpaa ee, à yẹ alọpyị nyang ahyẹẹrwẹrwa lẹ! À họ ala Isirẹlụ pyẹ pyọọ myịmyị lẹ!

²A hịnyọhi ang inyibyi ịlẹ ká angịnyị nyang họ, à hu abwọ hi ị-họpyị nyaa wuu lẹ.

³À tụụbwọ hi agbama ọlẹ ká ju taa neeji, à kpụba la ẹjẹ ọlẹ ká wụ taa lẹ.

⁴Kpahị nyà tịrẹkpẹ mẹ, Ohe Oluhye ọngọchịda nyahị, ká hu abwọ la ẹjẹ ọ-wụ tahị mẹ.

⁵À ka ju agbama tahị ịịwẹ pyịyọọ-ọ́? Ikẹjẹ-awụrụ nyang-ńg ka myị ka gbee ju ka oyi ịlịlahị-ị̄ị́?

⁶Á ka juhi ọngịrị onyeewe, kpụ angịnyị nyang ka gwogbo hang ka-á?

⁷Amkpaa ee, chị ọháha o-gbu enyi-ka nyang ehe ẹ-ẹga nyahị, ká chịhị da mẹ.

⁸M̀ juwa ke ụrụ la ẹla ọlẹ ká Amkpaa Ohe Oluhye juwa ya, ọ myị ọnụ nya okpunyi ha angịnyị nyamwụ, angịnyị ịkpẹẹkpẹẹ nyamwụ, ó-ri ki tịrẹkpẹ ju ka ẹpwụ nya ụgbẹyị nya uchi nyaa ka.

⁹Ịnyịlẹhị ịnyị, angịlẹ kịị ju ihi nyamwụ ọ nwụlanọ nyọka chị da lẹ, ọ ka kụ am̀ ọ-ọpyị nyahị lụmụmẹ nyamwụ.

¹⁰Ẹhẹẹ, ọháha o-gbu enyi-ka bala ọkpẹẹkpẹẹ ọlala ka tọ awụlẹ, ang ọnyịịla bala okpunyi tịtị ka wu awụlẹ bajẹ.

¹¹Ọkpẹẹkpẹẹ nya angịnyị ehe ka nwa gbọnọ-gbọnọ ka uhye, ang ọnyịịla ọhọhọ nya Ohe Oluhye tị ka jahị da we eji bwu epwoohe.

¹²Amkpaa ka họ kahị ka pyẹ pyọ́ọọ, ọpyị nyahị ka há ang ẹrụ bwọbwọọbwọ.

¹³Ang ọnyịịla ọhọhọ ji ịlahị nya Amkpaa juwa nwụla ụgbẹyị da gbọọ. Abwọ ọrịrị bịlẹ ụbwọ ọdada.