Read idege EJE ỌNYỊỊLA 86 Bible Online

EJE ỌNYỊỊLA 86 - idege bible

EJE ỌNYỊỊLA 86

¹Amkpaa ee, ke ụrụ lam, ká wẹm mẹ, chajị m̀ ri ọlẹbyahị, ḿ jula ọlọlọhẹ ka.

²Chẹwụ kem mẹ, chajị m̀ la kpẹẹkpẹẹ ẹ-ẹga nyang. Chịm da mẹ, chajị m̀ ri ọnchẹ nyang ọ-dahịhileng. Ahụ à ri Ohe Oluhye nyam lẹ.

³Ọngọlahị ee, yẹ ahyẹẹrwẹrwa nyam, chajị m̀ kaa raabwọ hang ụka wuu.

⁴Họ ká am ọnchẹ nyang ā chị ọkẹkẹnị, chajị ahụ m̄ kaa raabwọ ha lẹ.

⁵À kaa hịnyọhi bala ọ-họ ang ọnyịịla hahị lụmẹ, ọháha o-gbu enyi-ka nyang juwa ha angịlẹ wuu kịị raabwọ hang.

⁶Amkpaa ee, ke ụrụ wo abwọ ọrịrị nyam wẹẹ, ká wo eko nya ụbwọ ọdada ọlẹ kam wẹẹ chị wụrụng wẹẹ.

⁷M̀ kaa wụrụng ụka kam ji ẹpwụ nya akama, chajị à kaa wẹ abwọ ọrịrị nyam.

⁸Ọngọlahị ee, ojiga ọhsẹ-lọhẹ-ẹ́ lala ahụ ka, ọngọngọhẹ-ẹ́ họ ụkụrwọ ịlala ịnyang myị ka.

⁹Alẹpwụma ịlẹ ká họ wuu ka wẹ kaka hirikpẹẹ hang, kị ka gwogbo ha ẹnyị ọtụka nyang.

¹⁰À lụmẹ, à họ ụkụrwọ ịlẹbyẹbyị, ahụ kẹnẹ-kẹnẹ à ri Ohe Oluhye lẹ.

¹¹Amkpaa ee, mẹ ụgbẹyị nyang jẹm mẹ aalẹ, m̀ ka bang jẹ kpẹẹkpẹẹ. Họ kam kpa ọkịlẹtụ ookpokpo ju ihi nyang kpẹẹkpẹẹ.

¹²Ọngọlahị Ohe Oluhye nyam ee, m̀ ka gwogbo hang lọkịlẹtụ nyam wuu, m̀ ka gwogbo há ẹnyị nyang gbe oyi myị oyi.

¹³Ọháha o-gbu enyi-ka nyang chakpa lụmẹ ẹ-ẹga nyam, à gbam kpehe bwu ejegu.

¹⁴Ohe Oluhye ee, alọgọm jam bá ẹla tam lẹ-ẹ̄, ekpilo nya alabwẹga jam maga kị ka nwụm lẹ-ẹ̄— angịlẹ ká ẹla nyang-ńg maa ịngịngịhyẹ ka ịnyị-ị̄.

¹⁵Ọngọlahị ee, ahụ tị ri Ohe Oluhye ọlọnahị bala ọ-yẹ ahyẹẹrwẹrwa, aa ju agbama hyaa ka, à kaa la ọháha o-gbu enyi-ka bala ọ-họ kpẹẹkpẹẹ ẹ-ẹga nya angịnyị nyang.

¹⁶Jahị kpata wẹ ẹga nyam, ká yẹ ahyẹẹrwẹrwa nyam mẹ. Ya ọngịrị nyang ham am ọnchẹ nyang, ká chịm am ọnyị ọkpẹẹkpẹẹ nyang da.

¹⁷Amkpaa ee, ya ang-ẹjẹẹ nya ọnahị nyang ham, ká oyoyi ka ju angịlẹ wuu kam wụ ẹjẹ, chajị ị ka yẹ jaabwọ ká dam ụbwọ bala ọ-ya ẹjẹ ọkpụkpụ ham. Eje ọnyịịla ọlẹ ri nya anyị ịtụma nya iKora