Read idege EJE ỌNYỊỊLA 88 Bible Online

EJE ỌNYỊỊLA 88 - idege bible

EJE ỌNYỊỊLA 88

¹Amkpaa Ohe Oluhye ọngọchịmda ee, m̀ chị eko wụrụng ụka wuu, lepwodu jijiiji, m̀ juwa wụrụng ịnyịnyị.

²Wo abwọ ọrịrị nyam, ya ụrụ nọ ha eko ọchịchị nyam.

³Iru nya akama do chụm, ọhịhị nyam hi dẹ̀dẹ̀ hi kpii lẹ.

⁴Angịnyị hum lala ogu kụ lahị kpa ang ri lẹ, ogburujwo ọlẹ ká ata nyamwụ nyà kaka ta abwọ meme.

⁵Ị yam ga ha igu, lala ọngọlẹ kọ dọmwụ gbu kpá ene-ene juwa i-iworu, lala angịlẹ kaahụ-ụ́ kpịtịya nyaa kaka, ká be deeji hi ụbwọ ọdada nyang.

⁶À yam ju ka ụjẹ okpori-kpori, ọjọrị-jọrị nya odolowu.

⁷Agbama nyang hị ilo nịrọm nmẹndẹẹ, ọ-wụ gbụrụ-gbụrụ nya ikẹjẹ-awụrụ nyang dum abwọ kpá yịgẹ-yịgẹ lẹ.

⁸À họ aligu nyam nyẹẹkpẹ dam, m̀ nyaa oru pwuu, ị chịgọ him. M̀ ji ẹpwụ nya ụ́wọm ọlẹ kam ka jẹ-ẹ̀ be bwu myị kaka.

⁹Akama kpụm kpụ idu wuu lẹ, Amkpaa ee, ẹnụ myị ẹnụ m̀ kaa be ẹkọ wụrụng, kpa abwọ u-uhye juwa bịlẹng ụbwọ ọdada.

¹⁰Ụkụrwọ ẹbyẹbyị ịlẹ kaa họ tị́ ri ẹla-ịyẹ nya egu? Ị́ ka jẹ-ẹ̀ wuleji kaka gwogbo hang kaka.

¹¹Egu ka jẹ-ẹ̀ ya ọháha o-gbu enyi-ka nyang dodehe-é? Ị ka jẹ-ẹ̀ ya ọkpẹẹkpẹẹ ọlala nyang dodehe ẹ-ẹga ká ayịreji ọtata ji-í?

¹²Ị ka jẹ-ẹ̀ yẹ ụkụrwọ ẹbyẹbyị nya ẹ-ẹpwụ nya ukpowu-ú? Oowo ọ-ọpyị nya eeri à tị́ ka jẹ-ẹ̀ ya ẹla rụ ang ịnyịịla ịlẹ kaa họ-ọ̀?

¹³Amkpaa ee, m̀ wẹẹ wụrụng ká ka dam ụbwọ, ẹnụ myị ẹnụ m̀ wẹẹ raabwọ hang.

¹⁴Amkpaa ee, ọ tị́ lanyị ká juwa pwam ịnyị-ị̄ị̀? Ịyẹ tị́ du ká wẹẹ yahị chị ka ọka him ịnyị?

¹⁵Bwu ụka-ụka nya ụjụ nyam, m̀ yẹ akama hi pyịnyẹng ẹ-ẹpwụ nya igu ogbugbu. A chị uhi jum, họ kam chị ẹpẹtẹkẹẹ.

¹⁶Agbama ọtụka nyang kụrụm bwu uhye wẹ eji, ang onyobyi-obyi ịlẹ ká họm dum abwọ pwụrẹ-pwụrẹ.

¹⁷Ẹnụ myị ẹnụ akama ịwẹ yẹm dada lala enyi ọmyị̀myị̀, ị dagaga jum bwu ịkịla ọnyị myị ọnyị.

¹⁸Ahụ à họ aligu bala aliko nyam wuu chịgọ him lẹ, ukpowu kẹnẹ-kẹnẹ à hi jam tam lẹẹ lẹlẹ. Eje Ọnyịịla nya Etan ọla ịSẹra