Read idege EJE ỌNYỊỊLA 89 Bible Online

EJE ỌNYỊỊLA 89 - idege bible

EJE ỌNYỊỊLA 89

¹M̀ ka mwu eje rụ ọháha o-gbu enyi-ka nya Amkpaa gbe oyi myị oyi, m̀ ka ya dodehe jaabwọ ká ọkpẹẹkpẹẹ nyang la, ká aloyi ọlẹẹlẹẹ tụ aloyi olijuju ka wo.

²Ọháha o-gbu enyi-ka nyang ka juwa gbe oyi myị oyi, ọkpẹẹkpẹẹ nyang godayị pyịyọọ, jaabwọ ká uhye-ọgba la.

³Ahụ Amkpaa à tị́ ya lẹẹ yẹkẹẹ, “M̀ nwa iro ha iDevid ọnchẹ nyam, m̀ myị ọnụ họọ ọwa ọngọlẹ kam chụ yẹkẹẹ,

⁴‘Anyị-anyị ịtụma nyang m̄ ka hu ri adịrahụ pyịyọọ lẹ, ẹchị-adịrahụ ka ji ugbiyegu nyang gbe oyi myị oyi.’ ”

⁵Alepwoohe wuu ka mịla oja nya ụkụrwọ ẹbyẹbyị ịlẹ ka họ, alegu-ẹrụ nyang ka gwogbo hang chajị nya ọkpẹẹkpẹẹ nyang.

⁶Amkpaa ee, Ọngọnọhẹ e-epwoohe-é ji nyọka chụ meng ka, olegu-ẹrụ ọhẹ-lọhẹ-ẹ́ lala ahụ ka, Amkpaa.

⁷Ẹ-ẹpwụ nya alepwoohe wuu, ahụ Ohe Oluhye ịị ju uhi gụ wuu lẹlẹ. Ụmụmẹ nyang wu ejiri gụ ịnya angị dagaga ju ẹchị-adịrahụ nyang.

⁸Amkpaa Ohe Oluhye Agụgụ ee, ọngọngọhẹ-ẹ́ lụmẹ lala ahụ kaka. Amkpaa ee, à la kpẹẹkpẹẹ ẹ-ẹpwụ nya ang myị ang wuu.

⁹Ahụ à ri ọngọ kpẹhị rịrị ihu ịtụka lẹ, enyi-í gu agbụ ọtụka-ọtụka, à kaa kpọọ ba.

¹⁰Ahụ à tụ ugbiriyo iRehabụ[8] pyị eji, nwọọ kẹhị-kẹhị lẹ, a kụrụ aluji nyang lọngịrị ọtụka nyang.

¹¹Uhye-ọgba wuu ri ịnyang ri, odehe ri ịnyang ri, ahụ à họ odehe tụ ang ịlẹpwụ nyamwụ wuu lẹ.

¹²Ahụ à họ ẹtẹ bala edii lẹ, Ọgbọdọ nya ịTabọ bala Ọgbọdọ nya ịHẹẹmọn mwu eje nya ọkẹkẹnị ha ẹnyị nyang.

¹³À chakpa la ọngịrị! Ụbwọ nyang la ọngịrị lụmẹ, upwuriri nyang hu hwaa ẹ-ẹpwụ nya ọngịrị ọlala.

¹⁴À ya ẹchị-adịrahụ nyang rịrị u-uhye nya ang ọnyịịla ọhọhọ bala ẹla ọ-họ kpakpa, ọháha o-gbu enyi-ka bala ọkpẹẹkpẹẹ la gede-gede ẹ-ẹpwụ nya ang ịlẹ kaa họ.

¹⁵Angịlẹ kịị gbịgba hang leje omwumwu wẹẹ, ịnyaa há haa lẹ! Ị kaa jẹdịyẹ ẹ-ẹpwụ nya ahịgboo nyang.

¹⁶Ịị chị ọkẹkẹnị ụka wuu chajị nya ẹnyị ọnyịịla nyang, ịị gwogbo hang chajị nya ang ọnyịịla ọhọhọ nyang.

¹⁷Ahụ ayịdang à ri ọngịrị ọlẹ kịị hụ jeje ju lẹ, bwula ọnahị nyang ọngịrị nyahị la ọkụrụ-kụrụ.

¹⁸Ẹwụ ọ-chịke nyahị bwu ẹga nya Amkpaa, ọwa Ohe Oluhye Ọlịgọgọ nya ala Isirẹlụ à chụ adịrahụ hahị lẹ.

¹⁹À ya ẹla ẹ-ẹpwụ nya ọyị ọ-yẹ a-arụrụ ugbeene ta anchẹ ịkpẹẹkpẹẹ nyang yẹkẹẹ, “M̀ ju ọngọdẹwụ ọtụka ọngịrị lẹ, m̀ chwọọ bwu ẹpwụ nya alụma nyọka ri adịrahụ.

²⁰M̀ ye iDevidi ọnchẹ nyam ọwẹ yeye, ya ida ọlịgọgọ hwọọ nyọka ri adịrahụ.

²¹M̀ ka jwọọ ọngịrị, m̀ ka yụbwọ chọọ kọ ka la gogo.

²²Aluji nyamwụ-ụ́ ka chọọ ọkpalo-kpalo myị ka, ọngịnyị onyobyi ọhẹ-lọhẹ-ẹ́ ka kụrwọọ myị ka.

²³M̀ ka kụrụ aluji nyamwụ chẹẹchẹẹ, m̀ ka nwụ angịlẹ wuu kị juwa bọọ ẹtẹ.

²⁴M̀ ka ya ọkpẹẹkpẹẹ bala ọháha o-gbu enyi-ka nyam hụ tọọ, bwula ọngịrị nyam ọ tịtị ka la ọngịrị lẹ.

²⁵M̀ ka họ adịrahụ nya alụma i-bwu Ihu nya iMeditareniya lalaala ka juka Ihu nya ịTayịgirisi bala iYufuretisi.

²⁶Ọ ka wụrụm byim am nyaa ri adịdọwa, Ohe Oluhye nyọwa bala ọngọ chọwa da lẹ.

²⁷M̀ ka hwọọ ri ọnyị ọlẹng nya ọgbanyẹ nyam ọlẹ kọ ka lụmẹ gụ ịdịrịhụ ilodehe wuu.

²⁸M̀ ka la ọháha ẹ-ẹga nyamwụ gbe oyi myị oyi, iro ọlẹ kam nwa họọ ka godayị rịrị pyịyọọ.

²⁹Anyị nyamwụ ka ri adịrahụ pyịyọọ, ẹchị-adịrahụ ọlẹpwa nyamwụ ka yeji gbe oyi myị oyi.

³⁰“Ọ́ tị ri ká anyị nyamwụ-ụ́ nyẹẹkpẹ da ehile nyam, kị myị hịhị dịrẹ ọmẹjẹ nyam ka,

³¹kị bịrị ehile nyam, kị ba ọmẹjẹ nyam jẹ ka

³²aalẹ, m̀ ka yaa akama chajị nya ang onyobyi ọhọhọ nyaa, ị ka yẹ akama bwula enyiri ọlẹ kam ka nyaa.

³³Ḿ tị ka hịnyọ la ọ-la ọháha ẹ-ẹga nya iDevidi lee ọ-pẹhi ọnụ ịlẹ kam myị họọ deeji koo.

³⁴Ḿ ka bịrị iro ọlẹ kam nwa họọ ka, ḿ ka chị ide deeji myịmyị-ị̀ pịlọọnẹ ka.

³⁵M̀ nwa iro lẹnyị ịgọgọ nyam lẹ, ḿ ka jẹ-ẹ̀ me ọnọọkịla je iDevidi kaka.

³⁶Ugbiyegu nyamwụ ka pyẹ kịlahị-ịlahị, ẹchị-adịrahụ ọlụwa ka godayị giri-giri lala ẹnụ.

³⁷Ọ ka godayị pyịyọọ lala ọya, kọ ri ang ibeenu nyam oluhye-ọgba!”

³⁸Amkpaa, tị yẹ-ẹ̀ wẹ mẹ, à ju agbama ta adịrahụ ọlẹ ká chụ, pwọọ, nyẹẹkpẹ dọọ lẹ.

³⁹À tụ iro ọlẹ ká nwa tọọ biri, hu okpo-adịrahụ nyamwụ da ka ẹpwụ nya ịwa lẹ.

⁴⁰À be egwalọ ịdagaga ju epweji nyamwụ ene, pẹhi ebe ịnyịịngịrị nyamwụ kpụ egwawụ-egwawụ lẹ.

⁴¹Anyabalịwụ ịchịpwụrụ wuu juwa gbile ang-ụdụ nyamwụ yoyi kpa rụ, ọ ri ẹla-ẹlẹhụ nya aloye ẹpwa nyamwụ wuu lẹ.

⁴²À ya ọkụrụ-kụrụ ha aluji nyamwụ, du kịịwa wuu juwa chị ọkẹkẹnị lẹ.

⁴³À ta oge nya ẹwụ nyamwụ iri, á myị dọọ ụbwọ ọ kụrụ ẹ-ẹwụ ka.

⁴⁴À nọọ otuma nya adịrahụ oriri nyamwụ, hu ẹchị nyamwụ ahị kụrụ eji lẹ.

⁴⁵À họ ọ chị okwirichi hi ẹnụ ta uhye, hu oyoyi jwọọ u-ugbọdọda lẹ.

⁴⁶Amkpaa ee, à ka juwa kpụ ịlọng ịbaa hiihi ịịwẹ pyịyọọ-ọ́? Ụka oyina ikẹjẹ-awụrụ nyang a tị́ ka kpụba la o-wuru jahị dahị-ị̀?

⁴⁷Kpịtịya jaabwọ ká ọhịhị nyam la kpii kaka ba wẹẹ, à jẹ jaabwọ ká ọhịhị nyahị ahị angịnyị ehe ri uhwo nya ang.

⁴⁸Ọngịnyị ehe oyina-à tị́ ka hị pyịyọọ la ọ-yẹ igu ẹ-ẹhị ka-à? Oowo tị́ ka chị ịlọmwụ ịgọ nya iwori myị-ị̀?

⁴⁹Ọngọlahị ee, ọháha o-gbu enyi-ka nyang oligbalẹ tị́ lee mẹ? Ọnụ ịlẹ ká myị ha iDevidi wuu bẹẹ?

⁵⁰Ọngọlahị ee, ā deeri nya ido ịlẹ kị wẹẹ dom am ọnchẹ nyang ka. Yẹ jaabwọ kam wẹẹ kpa olo nya ido ịlẹ ka alụma ịkịla wẹẹ do.

⁵¹Amkpaa ee, aluji nyang do adịrahụ ọlẹ ká chụ, ị dọọ ẹ-ẹga myị ẹga kọ ka.

⁵²Anụ gwogbo ha Amkpaa gbe oyi myị oyi! Amẹn! Amẹn!