Read idege EJE ỌNYỊỊLA 9 Bible Online

EJE ỌNYỊỊLA 9 - idege bible

EJE ỌNYỊỊLA 9

¹M̀ ka kpa ọkịlẹtụ nyam wuu gwogbo hang ahụ Amkpaa m ka ya ụkụrwọ ẹbyẹbyị nyang wuu dodehe.

²M̀ ka myị̀ lọkẹkẹnị ọọ-lajị nyang, m ka mwu eje gwogbo hang ahụ Ohe Oluhye Agụgụ.

³Ụka ká aluji nyam yẹng, ị wa wuu rụnyẹ rụ, ị chị achụụ mileji, gbu táaa.

⁴A chị oku ham lẹ, a hụ ẹ-ẹchị nya eje juwa leje ọkpakpa.

⁵A ya eje wu alẹpwụma ị-jẹ Ohe-ka, a ta alọkwọ ayịreji lẹ. A tụ ẹnyị nyaa biri gbe oyi myị oyi lẹ.

⁶Aluji nyahị kpụ ịtẹbyị gbe oyi myị oyi, a ta epweji nyaa wuu ayịreji pyịyọọ lẹ. Ọngọhẹ-ẹ́ ka kpịtịya nyaa kaka.

⁷Amkpaa ri adịrahụ gbe oyi myị oyi. Ọ ya ẹchị-adịrahụ nyamwụ da nyọka leje lẹ.

⁸Amkpaa la odehe eje ẹ-ẹpwụ nya abwẹla ọnyịịla, ọọ la alẹpwụma eje lụgbẹyị ọkpakpa.

⁹Amkpaa ri ẹga ọkpịbaa nya angịlẹ kị taa ba, Ọ ri ẹga ọkpịbaa lụka nya akama.

¹⁰Amkpaa ee, angị jẹng jẹ kaa dahịhileng, chajị aa nyẹẹkpẹ da angịlẹ kị wẹ ẹga nyang ka.

¹¹Anụ mwu eje gwogbo ha Amkpaa ọlẹ kọ ri adịrahụ ị-ịSayọn. Anụ ya ang ịlẹ kọ họ dodehe je angịnyị wuu.

¹²Ọọ kpịtịya nya angị ji ẹpwụ nya ọtụpyịpyị, ọọ ya ụrụ nyí ida nyaa ajị ka, ọọ hu akama ha angị tụ angịkịla pyịpyị kwiwa.

¹³Amkpaa ee, yẹm ahyẹẹrwẹrwa mẹ, yẹ uhila nya akama ịlẹ kam wẹẹ yẹ ụ-ụbwọ nya angị tụm pyịpyị wẹẹ! Amkpaa ee, gbam kpehe bwu ọnụ nya igu,

¹⁴chajị kam ka ya dodehe je ala ịSayọn ang ịlẹ kọ du kam wẹẹ gwogbo hang. M̀ ka chị ọkẹkẹnị chajị a chịm da.

¹⁵Alẹpwụma ị-jẹ Ohe-ka chị abwọ kpụ ụjẹ ọlẹ kịịwa ayịdang chị. Ụnya-ụnya nya ịlaa ị kpa ata kaka wu lẹ.

¹⁶Amkpaa mẹ ịlọmwụ jẹ gede-gede, bwula eje ọkpakpa ọlẹ kọọ la. Alọkwọ chị ẹkpa kpụ ịlaa bwula ụkụrwọ nya ụbwọ nya ịlaa.

¹⁷Igu ogbugbu à ri ocheju nya angịnyị inyibyi lẹ, ọwẹ à ri ẹbyị ọlẹ kọ ka họ angị pwa ẹla nya Ohe Oluhye lẹ.

¹⁸Ị́ ka deeri nya alẹbyahị pyịyọọ ka, ẹhị ọrịrịị-rịrị nya angị la ọbaba-á ka ri ang ododu ka.

¹⁹Amkpaa ee, wuleji mẹ, ā myị ká angịnyị ehe ā ya ẹhị dang bwee ka. Kpa alẹpwụma ị-jẹ Ohe-ka wẹ ịlahị nya ịlọng ká laa eje chahị ju ịlọng.

²⁰Amkpaa ee, chị uhi jwaa mẹ, họ kị jẹ angịnyị ehe kem ịwa nyaa ri lẹ.