Read idege EJE ỌNYỊỊLA 90 Bible Online

EJE ỌNYỊỊLA 90 - idege bible

EJE ỌNYỊỊLA 90

¹Ọlẹ ri abwọ ọrịrị nya iMosisi ọngịnyị nya Ohe Oluhye Ọngọlahị ee, ahụ à ri ẹpwa nyahị lẹẹ ụka wuu lẹ.

²Ene-ene ká-à họ ịgbọdọ lee ọ-họ ká odehe ji, à ri Ohe Oluhye, á la ọmwụ ọdada ka, á la ọbaba ka ịnyịnyị.

³À byihi ahị angịnyị ehe nyị nyà tịrẹkpẹ ka ọpyị mẹ, ọọwa ā yẹẹhị tịrẹkpẹ kaka ri ịpyị lẹlẹ.

⁴Ẹka ụnọ ẹ-ẹga nyang lala ahyẹẹnụ ookpokpo, ị lala ịnịyẹ oleeri ọwẹ kọ chịpwụrụ kem lee awa ịmanyị-ịmanyị lepwodu.

⁵À tụụhị ahị angịnyị ehe tuuu hụrụ, ahị lala ụlaa ọlẹ kịị kpịtịya nyamwụ tata ka, ahị lala amẹ ịlẹ kịị be etukpo lụtụrụ,

⁶kịị wụrụ arụ pyẹ pyọọ lụtụrụ, obyi-í tị ka hi, ịị gbu wombooo, nwụ ọnwụ bwụgẹ-bwụgẹ.

⁷Agbama nyang chị uhi juhi, ikẹjẹ-awụrụ nyang yẹẹhị juju.

⁸À ya ịhọbịrị nyahị nọ ị-ịlahị nyang gede-gede, ee, ang ịtịpyọ ịlịbaa nyahị, à yaa cheri-cheri.

⁹Ahyẹẹnụ nyahị wuu myị̀ lagbama nyang, ọhịhị nyahị myị pwẹẹẹ lala ịhụ ọ-chị byị̀ị̀ị̀.

¹⁰Ehe oriri ọlẹ ká hunọ hahị wuu ri ẹka iwo irwiye, angị la kpịra-kpịra tị ka hị pwụ ẹka iwo ineku myị, ẹka ịịwa wuu tị myị̀ lakama bala ọjụjụ, ahyaahị lẹ, ọhịhị à myị pwẹẹẹ lẹ, egbahị nya ịnyahị à go lẹlẹ.

¹¹Oowo tị́ ka jẹ ọngịrị nya agbama nyang kpá? Ikẹjẹ-awụrụ nyang wu ejiri lala uhi nyang ọlẹ kahị kaa ju.

¹²Mẹjẹẹhị kahị jẹ jaabwọ ká ẹnụtụrụ nyahị la wure-wure kaka ba, chajị kahị ka jẹ ẹla mẹ.

¹³Amkpaa ee, nyà chịhị ọgụ mẹ, à tị́ ka godayị tata ba anyị? Yẹ ahyẹẹrwẹrwa nya anchẹ nyang chẹẹ mẹ!

¹⁴Họ myịhị ẹnụ myị ẹnụ lụtụrụ bwula ọháha o-gbu enyi-ka nyang, chajị kahị ka mwu eje nya ọkẹkẹnị lẹnụtụrụ nya ọhịhị nyahị wuu.

¹⁵Ya ọkẹkẹnị hahị jịra pwoku ẹnụtụrụ ịlẹ wuu ká yẹhị akama, ká ya iru nya ẹka ịnyịịla nyẹ iru nya ẹka ịlẹ kahị ji ẹpwụ nya ọjụjụ mẹ.

¹⁶Họ ká anchẹ nyang ā yẹ ụkụrwọ ịtụka nyang gede-gede, ká anyị nyang ā yẹ ụmụmẹ nya ọngịrị nyang.

¹⁷Ọngọlahị Ohe Oluhye ee, myị ká ahị ọwawa nyang ā jam tahị, họ ká ụkụrwọ nyahị wuu ā kịlahị. Ee, họ ka ụkụrwọ nyahị wuu ā kịlahị!