Read idege EJE ỌNYỊỊLA 92 Bible Online

EJE ỌNYỊỊLA 92 - idege bible

EJE ỌNYỊỊLA 92

¹Amkpaa ee, ọ hiigu nyọka jing obe, nyọka mwu eje rụ ụmụmẹ nya ẹnyị nyang ahụ Ohe Oluhye Agụgụ.

²Ọ ri ang ọnyịịla nyọka ya ọháha o-gbu enyi-ka nyang dodehe lụtụrụ ẹnụ myị ẹnụ, bala o-ya ọkpẹẹkpẹẹ nyang dodehe lobyi

³bwula o-juwa du ẹnwụ ju eje ọọwa, bala o-juwa du ogum̀ jwọọ ịnyịnyị.

⁴Amkpaa ee, ụkụrwọ ịtụka nyang kpụm ugbodu nyii, m̀ ka mwu eje nya ọkẹkẹnị chajị nya ang ịlẹ ká họ.

⁵Amkpaa ee, ụkụrwọ nyang chakpa lụmẹ! Irya ọlọkịlẹtụ nyang chakpa la kpori-kpori!

⁶Oluchi-í ka jẹ-ẹ̀ jẹ pwụ ọọwa ka, ọlẹjị-ị́ ka jẹ-ẹ̀ jẹ ọdawụlẹ nyamwụ myị ka.

⁷Alọkwọ ka bwu yịrị ẹga yịrị tụ ẹga ku lala amẹ, angị họ ang onyobyi ka pyẹ pyọọ kịlahị-ịlahị myị, ị tị ka ta ayịreji wutẹ-wutẹ gbe oyi myị oyi.

⁸Ahụ Amkpaa tị lẹ, à la gidogbooo e-epwoohe. À ka juwa gbe oyi myị oyi.

⁹Ahị jẹ ká aluji nyang ka ta ayịreji, ị ka nyi angị họ ang onyobyi wuu epepe hụrụ.

¹⁰À họ m̄ la ọngịrị lala ẹhya, à ya ida nya okpunyi hụm lẹ.

¹¹M̀ kpẹhị nya ịlọm yẹ jaabwọ ká aluji nyam tịrị bwụjẹ-bwụjẹ, m̀ wo lụrụ eko nya ayịreji ọlẹ kị juwa chị.

¹²Alabwẹla ọnyịịla ka pyẹ pyọọ lala ọrị, ị ka nwà lọngịrị lala ekeji isida ịla iLibanọn.

¹³Ị lala ekeji ịlẹ kị ya ju ẹ-ẹpwa nya Amkpaa, kị juwa nwà gbọdọ-gbọdọ u-Ube nya Ohe Oluhye nyahị,

¹⁴kịị juwa nwụ egbe lụka kị chị ụchẹ chị kpá, kịị jú apwụ inyeewe-inyeewe bala ọ-la gogo.

¹⁵Ọwẹ mẹjẹ ya Amkpaa la kpakpa, ọwa-à ri ọngọ chẹwụ kem lẹ, ọọ họ ang onyobyi ka.