Read idege EJE ỌNYỊỊLA 94 Bible Online

EJE ỌNYỊỊLA 94 - idege bible

EJE ỌNYỊỊLA 94

¹Amkpaa ee, ahụ Ohe Oluhye kaahụ à la ọ-họ kwiwa, ahụ Ohe Oluhye ọlẹ kaa họ kwiwa, mẹ agbama nyang jẹ mẹ.

²Ọngọleje nya odehe ee, wuleji, ká ya eje wu alọbọọchẹ jaabwọ kọ pwokwaa!

³Amkpaa ee, anyị ọ tị́ ka tata ka ba-à? Alọkwọ ka kịnyaa juwa yaya pyịyọọ-ọ́?

⁴Wo ịtara-ịtara ịlẹ kịị gba bwu ọnụ nyaa wẹẹ, angịnyị inyibyi ịwẹ wuu ri angị chị ọgọm.

⁵Ị gá angịnyị nyang beji kpalị-kpalị, juwa yẹ angị ị-háng-há ịwẹ ụhị.

⁶Ịị nwụ ịhụ-egu bala angga ịlọpyị nyaa, ịị wu anyị-egu chị imyi.

⁷Ịị yẹkẹẹ, “Amkpaa-á yẹhị ka, Ohe Oluhye nya Isirẹlụ ya arụ kpụ ịla hi ọhọhọ nyahị.”

⁸Anụ alẹjị chwiichwii, anụ kpẹhị chịng wẹẹ, ụka oyina anụ tị́ ka jẹ ang kpong-kpong mẹ-ẹ̀?

⁹Ohe Oluhye ọlẹ kọ họ arụ nyahị à ka mwọọgịlẹ jẹ-ẹ̀ wo ẹla ka lẹ-ẹ́? ọwa ọngọ họ ahị nyahị à ka dachichi jẹ-ẹ̀ yẹ ọyị ka lẹ-ẹ́?

¹⁰Ọwa ọngọ kaa yalibyi la alẹpwụma ịkịla rịrị, ọ́ ka yẹhị akama ịnyịnyị ka-á?

¹¹Amkpaa jẹ irya omeme nya angịnyị ehe, ọ jẹ ká irya nyaa-á kpụ ịngịngịhyẹ ka.

¹²Ọngọlẹ ká ahụ Amkpaa-á nwụ rịrị aalẹ, ịnya ọngọọwa pyẹ̀ẹẹ họọ lẹ! Ọngọlẹ ká mẹ ehile nyang jẹ-ẹ̀ wẹẹ, ịnya ọngọọwa tịtị há họọ lẹ!

¹³A ya ịnyọ ọmwụmwụ ha angị ịlịịwẹ bwu ụka nya akama, gbee kị ka be aya nya angịnyị inyibyi.

¹⁴Amkpaa-á ka nyẹẹkpẹ da angịnyị nyamwụ ka, ọ ka pẹhi angị ri ịnyamwụ lụbwọ-lẹta ka.

¹⁵Eje ọkpakpa ọchịchị ka ji ha angị ịnyịịla wẹẹ, alabwẹla ọnyịịla wuu ka dịrẹ ọgụ ọọwa.

¹⁶Oowo à tị́ yagba rịrị e-eji wọnụ nyam ju nyọka bá ẹla ta alọkwọ lẹẹ-ẹ̀? Oowo à tị́ chẹkpẹ jum yahị da angị họ ang onyobyi lẹẹ-ẹ̀ ene-è?

¹⁷Amkpaa-á dam ụbwọ ka lẹẹ-ẹ, ịnọ ejegu tị́ ka ri ẹpwa nyam gbalẹ-gbalẹ lẹ.

¹⁸M̀ chị eko yẹkẹẹ, “Ẹta nyam pyị kpịra wẹẹ ka keji lẹẹ-ẹ!” Ọháha o-gbu enyi ka nyang ahụ Amkpaa tị wum kpa giri-giri.

¹⁹Ụka ká imahị myị̀ irya nyam, à kpụm ẹjẹ, họ kam chị ọkẹkẹnị.

²⁰Alegbeju ịkịrọ-kịrọ ka jẹ-ẹ̀ ri igu tang myị-ị̄ị́? Ị da ehile ịlẹ kịị ya eje rụ ang onyobyi ọhọhọ.

²¹Ịị kọ ju awụlẹ yahị da angịnyị ịnyịịla, ya eje nya igu wu angị da ẹlẹlẹhẹ-ka.

²²Amkpaa-à tị ri ube ọnyọọngịrị nyam le, Ohe Oluhye à ri ẹjwọ ẹga ọkpịbaa nyam lẹ.

²³Ọ ka yẹ angịnyị inyibyi akama chajị nya ọkwọ ọlala nyaa, ọ ka taa ayịreji chajị nya ịhọbịrị nyaa, Amkpaa Ohe Oluhye nyahị ka taa ayịreji.