Read idege EJE ỌNYỊỊLA 96 Bible Online

EJE ỌNYỊỊLA 96 - idege bible

EJE ỌNYỊỊLA 96

¹Anụ mwu eje onyeewe ha Amkpaa! Anụ alodehe wuu, anụ mwu eje ha Amkpaa!

²Anụ mwu eje ha Amkpaa, kanụ gwogbo họọ, anụ ya pyẹ ẹnụ myị ẹnụ nyọlẹ kọ chịhị da.

³Anụ ya ụmụmẹ nyamwụ dodehe tụ ẹpwụma-ẹpwụma da, anụ kpa oja nya ụkụrwọ ẹbyẹbyị nyamwụ pyebile tụ epwoja wuu da.

⁴Anụ tị́ jẹ lẹ, Amkpaa chakpa lụmẹ! Ọ chila kahị ka gwogbo họọ lụmẹ-lụmẹ. Ọwa-à chịla kị ka ju ihi gụ ijiga wuu lẹ.

⁵Ijiga nya alẹpwụma ịkịla wuu ri ekpeku kẹnẹ-kẹnẹ, Amkpaa-à tị họ uhye-ọgba lẹ.

⁶Ọ la ụmụmẹ bala ọ-kpụ ẹhị dagaga ju, ọngịrị bala ụ́hị myị̀ Ube nyamwụ pwẹẹpwẹẹ.

⁷Anụ alẹpwụma ilodehe ọlẹ wuu ee, anụ gwogbo ha Amkpaa anụ mịla oja nya ụmụmẹ bala ọngịrị nyamwụ.

⁸Anụ gwogbo ha Amkpaa jaabwọ kọ pwoku ẹnyị nyamwụ, anụ hu ọhaha nyanụ, kanụ kẹwẹ wẹ Ube nyamwụ.

⁹Anụ gbịgba ha Amkpaa jaabwọ kọ kpụ ẹhị ka ba, ká odehe wuu ā hụ́ kpákpaakpa ị-ịlahị nyamwụ.

¹⁰Anụ ya je alẹpwụma wuu mẹ oo, “Amkpaa ri adịrahụ! Odehe yeji giri-giri lẹ, ịngịngịhyẹ-ẹ́ ka pyọọ hiii myị kaka. Ọ ka la angịnyị ehe eje ọkpakpa.”

¹¹Uhye-ọgba ā chị ọkẹkẹnị! Odehe ā yụya mẹ! Ihu ā mịraa tụ ang ịhịhị ịLẹpwụ nyamwụ wuu.

¹²Ẹrụ wuu tụ ang-ẹrụ ịlụwa wuu ā da iwuru! Ká ekeji ilipyinu wuu ā tịtị chị ụkwa nya ọkẹkẹnị.

¹³Ịwa wuu ā mwu eje ha Amkpaa, chajị ọ wẹẹ wẹ kaka la odehe eje. Ọ ka kpa abwẹla ọnyịịla la odehe eje, ọ ka leje ẹ-ẹpwụ nya ọkpakpa bala ọ-jẹ oye-oye ka.