Read idege Etu 10 Bible Online

Etu 10 - idege bible

Etu 10

¹Etu ịlẹ ká iSolomọn da-à lẹẹ lẹ: Ọnyị ọ-jẹ ẹla kaa kpa ọkẹkẹnị wẹ adamwụ, ọnyị oluchi tị kaa kpa ayiiji wẹ ịnamwụ.

²Ụdụ ọlẹ ká ọngịnyị kpụ bwula ụgbẹyị onyobyi-í ju apyobwuna ka, ang ọnyịịla ọhọhọ kaa chị ọhịhị nya ọngịnyị da.

³Amkpaa-áà tụ hi ọngịnyị ọnyịịla gbu imyi ka, ọ kaa ku ọngịnyị onyobyi iwe nyọka ye ang ọlẹ kọ mọọma.

⁴Ụbwọ ọtata kaa kpa ọngịnyị ka yẹ ẹbyahị, ang ọ-jụ họ ka họ ká ọngịnyị ka kpụ ụdụ.

⁵Ọngọ tụ ang-ẹrụ guru ụka kọ chịla ri ọngọ jẹ ẹla, ọ ri ang oloyoyi nyọka nune lụka nya ang-ẹrụ ọwụwụ.

⁶Ị kaa mịla oja ha ọngịnyị ọnyịịla, ọngịnyị onyobyi kaa kpa ẹla ọlọnụ nyamwụ wu ọkwọ ọlọkịlẹtụ nyamwụ ẹhị dụrụ.

⁷Ịtịya nya ọlabwẹla ọnyịịla ọkpụkpụ ya okpunyi ha ọkịlẹtụ, ị tị ka deeri nya ọlabwẹla onyobyi ahyaahị.

⁸Ọngọ jẹ ẹla kaa wo ọmẹjẹ, oluchi o-ya ẹla hwolo-hwolo tị ka ya ịlọmwụ ta ayịreji.

⁹Ọngọ họ ẹla lirya ọkpakpa kaa hụ lokpunyi, ebe tị ka ba ọngọ kaa họ ẹla ịkọnị.

¹⁰Ọngọ kpa ụgbaa mwụ ọngịnyị ahị kaa gu akama rịrị e-eji, ọngọ byẹjẹ yalibyi kaa họ okpunyi.

¹¹Ẹla ọlọnụ nya ọngịnyị ọnyịịla ri ẹmwụ-enyi nya ọhịhị, ẹla oyaya nya ọngịnyị onyobyi kaa ya ang ke ọkwọ ọlọkịlẹtụ nyamwụ.

¹²Awụlẹ ọ-wụ ẹjẹ kaa kpa arụ ọrụrụ weji, ọháha ọlala tịị chị ịpyị ba ala ị-wụ ọngịnyị ẹjẹ.

¹³Ẹla ọjẹjẹ kaa bwu ọnụ nya ọngọ jẹ ẹla kpehe, ẹkpẹ nya oluchi tị da ha enyiri.

¹⁴Ọngọ jẹ ẹla-à kẹhị ju ang ọjẹjẹ, ẹla-uchi oyaya nya oluchi kaa ju ọmwụ nya akama.

¹⁵Ụdụ nya ọlụdụ ọọ kpa chẹwụ ke ịlọmwụ lẹ, ẹbyahị nya ọlẹbyahị à wụrụ iyabwọ nwụ ịlọmwụ lẹ.

¹⁶Uri nya ang ọnyịịla nya ọlabwẹla ọnyịịla ri ọhịhị, ang ọlẹ ká ọngịnyị onyobyi kaa ye ri ọhọbịrị.

¹⁷Angị myị ọmẹjẹ ji ụgbẹyị nya ọhịhị, angị pwa alibyi ọlẹ kị ya taa hwahị ụgbẹyị lẹ.

¹⁸Ọngọlẹ ká ọngịnyị wọọ ẹjẹ kọ tị tọọ kpịbaa ri ọlọnọọkịla, ọngọ kpa ọngịnyị kụ ri oluchi.

¹⁹Jaabwọ ka ya ala lụmẹ ka ba, ịhọbịrị à tịtị kaa ju iru lẹ, ọngọ wu ọnụ nyamwụ kpa ri ọngọ jẹ ẹla.

²⁰Ẹla ọlọnụ nya ọlabwẹla ọnyịịla há lala okpoko onyoowuru ọlahịchịng, irya ọlọkịlẹtụ nya ọngịnyị onyobyi-í kpụ ịngịhyẹ ka.

²¹Ẹla oyaya nya ọlabwẹla ọnyịịla kaa ju apyobwuna ha iru nya angịnyị, aluchi tị kaa gbu igu nya ẹla ọjẹjẹ ka.

²²Ahị ọwawa o-bwu ẹga nya Amkpaa kaa họ ká ọngịnyị kpụ ụdụ, ọ́ ju ijẹma ọchịchị ka.

²³Ang onyobyi ọhọhọ la oluchi kpá nya ẹla-ụmwara, ang ọ-họ jula ẹla ọjẹjẹ kpụ ọngọ jẹ ẹla ịpyọ.

²⁴Ang ịlẹ ká ọngịnyị onyobyi kaa ju uhi ka chọọ ọgụ, ang ịlẹ ká ọngịnyị ọnyịịla tịtọ ka chịkpẹẹ họọ.

²⁵Akama ọtụka-á pwụ eji, ọọ gu alabwẹla onyibyi cheji, alabwẹla ọnyịịla tị yẹta rịrị e-eji giri-giri gbe oyi myị oyi.

²⁶Jaabwọ ká ere ọchagbịlangịrị kaa gbu ọngịnyị angịrị wọọ, ka ịmwụ kaa jụjụ a-ahị chachaacha, ịnyịnyị ọtụbwọ à la ẹ-ẹga nya ọngọ dọọ ẹrụ lẹ.

²⁷Uhi nya Amkpaa ojuju ya ọhịhị oludiyo ha ọngịnyị, ọngịnyị onyobyi tị kaa gbu kpaarịị.

²⁸Ẹhị ọrịrịị-rịrị nya ọlabwẹla ọnyịịla kaa cheju ọ-ọkekẹnị, ahị ọdahile nya ọngịnyị onyobyi tị ka ri ododu.

²⁹Amkpaa kaa chẹwụ ke ọngọ la kpakpa a-abwẹla, ọ tị ka ta alabwẹla onyobyi ayịreji.

³⁰Ịngịngịhyẹ-ẹ́ ka pyị ọlabwẹla ọnyila hii myị ka, ọlabwẹla onyobyi-í tị ka hi kụ ọ-ọpyị ọlẹ ka.

³¹Ọlabwẹla ọnyịịla kaa ya ẹla nya ẹla ọjẹjẹ, ọnụ o-ya ẹla ịtịpyọ tị ka kpụba.

³²Ọlabwẹla ọnyịịla kaa ya ẹla opwoku, ọlabwẹla onyobyi tị kaa ya uguru-ẹla ụka wuu.