Read idege Etu 11 Bible Online

Etu 11 - idege bible

Etu 11

¹Angị kaa kpa ọchanjẹ ọ-jẹ ẹla me ang wụ Amkpaa ẹjẹ, ang ọlahịchịng ọ-kpa me ang à họ́ọ lẹ.

²Ọbọọchẹ ohihi kaa kpa ọngịnyị kaka ju ka ẹpwụ nya oyoyi, ọngịnyị ọ-kpa ịlọmwụ keji ri ẹla ọjẹjẹ.

³Ẹla ọ-họ kpẹẹkpẹẹ nya ọlabwẹla ọnyịịla kaa gbọọ, ìbìrì-bírí nya ọlabwẹla onyobyi kaa tọọ ayịireji.

⁴Ụdụ ọkpụkpụ-ụ́ ka jụ ịngịhyẹ họ ẹnụ nya igu ka, ọhịhị ọnyịịla tị kaa chị ọngịnyị da.

⁵Ẹla nya ịlẹhị ọhọhọ kaa kpa ọlabwẹla ọnyịịla ụgbẹyị, ọkwọ ọhọhọ nya ọngịnyị onyobyị tị ka kpọọ ka ta ayịreji.

⁶Abwẹla ọnyịịla nya ọngịnyị ọnyịịla chọọ da, imyi nya ang onyobyi nya ọlabwẹla onyobyi ri ụnya wu ịlọmwụ.

⁷Ọlọkwọ-ọ́ gbu, ẹhị ọrịrịị-rịrị nyamwụ tịtị gbu tọọ jẹ, ahị ọdahile ịlọmwụ ri ịtakpi.

⁸Akama kaa ya hwẹ̀ẹẹ hi ọlabwẹla ọnyịịla, ọlabwẹla onyobyi tịị chabwọ kpụ ẹpwụ nyamwụ wurum.

⁹Ọlabwẹla onyobyi kaa kpa ọnụ bịrị ọọnamwụ chịkẹ-chịkẹ, ẹla ọjẹjẹ nya ọlabwẹla ọnyịịla tị ka chọọ da.

¹⁰Ọlabwẹla ọnyịịla-á pyẹpyọọ, alepweji wuu kaa chị ọkẹkẹnị, ọngịnyị onyobyi-í gbu, ị jẹ chị ọkẹkẹnị chịchị wẹẹ lẹ.

¹¹Ọpyẹ̀ẹẹ nya ọlabwẹla kaa kpa ịlahị ọkaka wẹ epweji, ụchị-ọnụ nya ọngịnyị onyobyi tịị gu epweji cheji.

¹²Oluchi à kaa ya ẹla o-hu ẹpẹpẹ ju ọọnamwụ lẹ, ọngọ jẹ ẹla kaa yọnụ bawụlẹ kem.

¹³Ọngọ ri ịnụmeeme ka yeng ẹla-ịbaa ya, ọngọ ju o-hu ọkịlẹtụ ha tị ka kpa ẹla ịbaa myị.

¹⁴Ọngọ kpa ịlahị-ị́ ji ka, angịnyị-ị̀ ju ka ẹpwụ nya akama, angị ju ọngịnyị irya-á tị ju iru, okpunyi kaa ji.

¹⁵Ọngọ yubwọ nya ọngga oluri ka chị ijẹma, á kpa ịlọng ka ri ekure ka ọ hagụ.

¹⁶Ọnyang ọkpẹnẹ ọlụhị kaa la ihi, ọlẹng ọ-la kpịra-kpịra ka kpụ ụdụ.

¹⁷Á họ ọnahị, à họ ha ịlọng-ịlọng, á gu ọkwọ, ịlọng-ịlọng ā họ lẹ.

¹⁸Ọngịnyị onyobyi ye uhwo nya uri kpá lahị nwọọ gbọ̀ọ, ọngịnyị ọnyịịla à kaa ye ọlahịchịng lẹ.

¹⁹Ọngọ godayị kpọọ juwa họ ang ọnyịịla ka hị, ọngọ họ ang onyobyi pwuru-ka ka gbu.

²⁰Angị la irya onyobyi wụ Amkpaa ẹjẹ, angị họ ẹla opwoku tị họ́ọ.

²¹Aa jẹ myị̀myị mẹ, ọngọ onyobyi ka yẹ akama pyii lẹ, angịnyị ịnyịịla tị ka be.

²²Ọnyang ọlụhị ọlẹ kọ la irya ka lala ọmapẹ nya okpoko ọ-ya ku okomba o-okwinyi.

²³Ang ọlẹ ká angịnyị ịnyịịla tọ ri ọhagụ, agbama kem ọngịnyị onyobyi à tị ka ye lẹ.

²⁴Angịhyẹ ri alọnahị kaa gahị pyẹ ụbwọ maa, ụdụ nyaa tị nwà kịlahị gụ olene-ene. Angịkịla tị ri alụkpẹ kụrẹchẹ, ị tị yẹ ẹbyahị.

²⁵Ọlọnahị kaa pyẹpyọọ, ọngọ da ọngọkịla ụbwọ tịtị ka ye ụbwọ ọdada.

²⁶Ọngọ tụ ang kụrụ ang-ẹrụ nyamwụ nọ gbe ụka kọ ka la ịnya, angịnyị kaa gwọọ ọnụ, ị tị kaa mịla oja ha ọngọ myị ọnụ hu ịnyamwụ ra lụka kọ baba ha angịnyị.

²⁷Ọngọ tịtọ nya ang ọnyịịla-à kaa ye ọnahị lẹ. Ọngọ tị tịtọ nya ang onyobyi ka yọọ hwoo ri.

²⁸Ọngọ kpụnịrọ ụdụ ọkpụkpụ ka ya ịlọmwụ ta ayịreji lala apwụ nya ekeji ịlẹ kịị wo lụrwẹnụ, ọngịnyị ọnyịịla tị ka pyẹpyọọ jaabwọ ká apwụ kaa ju jwọọjwọọ lụhyọọ.

²⁹Ọngọ kpa akama wẹ ugbiyegu nyamwụ ka kụ abwabwọ. Aluchi ka ri anchẹ nya angị jẹ ẹla pyịyọọ.

³⁰Abwẹla ọnyịịla lala okoji nya ọhịhị, ọngọ jẹ ẹla kaa wụ́ angịnyị.

³¹Angịnyị ịnyịịla-á kaa ye uri nyaa am̀ odehe aalẹ, alọkwọ bala angịnyị inyibyi-í ka day la ọ-yẹ akama kaka.