Read idege Etu 12 Bible Online

Etu 12 - idege bible

Etu 12

¹Ọngọ myị ọmẹjẹ tịtọ nya ang ọjẹjẹ, ọngọ myị alibyi ka ri oluchi.

²Ẹla nya ọngịnyị ọnyịịla kaa há Amkpaa, ọ tịị yẹ ọngọ kaa me obyi onyobyi akama.

³Ọngịnyị-ị̀ la okpunyi bwula ọkwọ ọlala ka, ọlabwẹla ọnyịịla tị kaa godayị giri-giri.

⁴Ahụ ọnyịịla ri ọkẹkẹnị bala ihi nya ọrụmwụ, ahụ ọ-kpa oyoyi kịla ọrụmwụ lala ẹbẹ-ọgọja.

⁵Irya omeme nya ọlabwẹla ọnyịịla la kpakpa, ẹla ọmẹjẹ o-bwu ẹga nya ọngịnyị onyobyi tị ri ụgbaa ọdada.

⁶Ẹla ọlọnụ nya ọngịnyị onyobyi ri ọ-wụrụ igu nwụ ọngịnyị, ẹla ọyaya nya ọlabwẹla ọnyịịla tị ka chị ọhịhị da.

⁷Ọlọkwọ-ọ́ keji, ọọ ta ayịreji gbanggbang, anjwo nya ọlabwẹla ọnyịịla tị kaa hịhị kịlahị-ịlahị.

⁸Ọngịnyị ọ-jẹ ẹla ị kaa mịla oja ha lẹ, angịnyị kaa ya ẹhị da oluchi bwee.

⁹Á kpa ịlọng nya okpehika ká tị la ọnchẹ ookpokpo kem, ọ hagụ ọ-ka kpa ịlọng nya ọngọtụka ká tị ka ye ang ri ka.

¹⁰Ọlabwẹla ọnyịịla kaa kpahị ju iyo ileji nyamwụ, ọlọkwọ tị kaa kpa ịnyamwụ nmaanmaa.

¹¹Ọlẹrụ ọ-họ ang myị à ye ang ri lẹ, oluchi tị kaa bịrị ụka nya ịlọmwụ ju ụkụrwọ i-ju apyobwuna ka.

¹²Ọngịnyị onyobyi tịtọ nya ang onyobyi ọhọhọ, ọlabwẹla ọnyịịla tị ka godayị giri-giri.[1]

¹³Ẹla ọlọnụ nya ọlọkwọ à ri ụnya wọọ lẹ, ọlabwẹla ọnyịịla tị kaa be hi akama.

¹⁴Ọngịnyị kaa ye uri nya ẹla ọnyịịla ọlẹ kọ ya, ọ ka ye uri nya ụkụrwọ ọlẹ kọ họ ịnyịnyị.

¹⁵Oluchi meme irya nyọwa nyị la kpakpa, ọngọ jẹ ẹla tịị ka ke ụrụ lirya ọmẹjẹ.

¹⁶Oluchi kaa kpịraka lagbama ahyaahị, ọngọ jẹ ẹla tịị ya ụrụ kpịla hi ido.

¹⁷Ọngọ ya ẹla nya ịlẹhị kaa họ ibeenu nya ịlẹhị, olibeenu ọnọọkịla tị kaa me ọnọọkịla.

¹⁸Ẹla ọlọnụ nya angịhyẹ kaa gu angịnyị chọọchọọ lala ịcha, ẹla ọgẹnẹ-gẹnẹ nya ọngọ jẹ ẹla tị kaa myị̀ ẹbẹ

¹⁹Ẹla nya ịlẹhị kaa godayị gbe oyi myị oyi, ọnọọkịla tii ba i-ijata kem.

²⁰Ụgbaa ọdada myị̀ irya nya angị me obyi nya ang onyobyi, ọkẹkẹnị tị juwa ha angị họ ká okpunyi ka ji.

²¹Ang ọtịpyọ-ọ́ọ̀ họ ọlabwẹla ọnyịịla ka, akama tịị yẹ myị̀ ọlọkwọ gẹrịị

²²Ọnọọkịla omeme ri ang-ibyi ẹ-ẹga nya Amkpaa, angịlẹ kịị họ ẹla ọkpẹẹkpẹẹ kaa họ́ọ.

²³Ọngọ jẹ ẹla-á kaa kpa ang ọjẹjẹ nyamwụ hyoma ka, oluchi tị kaa kpa ẹmwa nyamwụ pyebile.

²⁴Ọngọ họ ụkụrwọ yẹẹyẹẹ kaa ri olegbeju, ụchụ-atịra tịị ka kpang ka ri ọnyọhị nya ọngọkịla.

²⁵Imahị omeme kaa kpụ ọngịnyị ọkịlẹtụ enyi, ọhụ o-jwoo-ò ju tịị kpa ọkẹkẹnyị wọọ.

²⁶Ọlabwẹla ọnyịịla kaa ju oligu nyamwụ irya opwoku. Ụgbẹyị nya ọngịnyị onyobyi kaa kpọọ kaka hwahị.

²⁷Ọlụchụ-atịra-á nwụ iyo-o nwụ, ọ-hwọọ kpụ́ ri iguma, ọngọ họ ụkụrwọ yẹẹyẹẹ tịị kpahị ju ang ịlẹ kọ la.

²⁸Ang ọnyịịla ọhọhọ à ri ụgbẹyị nya ọhịhị lẹ, ụgbẹyị ọwẹ kpa ọngịnyị cheji ba igu.