Read idege Etu 13 Bible Online

Etu 13 - idege bible

Etu 13

¹Ọnyị ọ-jẹ ẹla kaa wo ọmẹjẹ nya adamwụ, ọnyị ọ-la egbeju-ọngịrị-ị́ kaa myị alibyi oyaya ka.

²Ọngịnyị ọnyịịla kaa ye uri nya ẹla ọnyịịla ọlẹ kọ ya, angị la kpẹẹkpẹẹ ka tịị tịtọ nya ang onyobyi ọhọhọ.

³Ọngọ gbe ọnụ nyamwụ gbe ọhịhị nyamwụ, ọngọ ya ẹla wu ịlọmwụ kpa ka ta ịlọmwụ ayịreji lẹ.

⁴Ọlụchụ-atịra mang ma gbee, ọ́ tị ye myị kaka. Ọngọ họ ụkụrwọ yẹẹyẹẹ tị ka la ang myị ang kọ tịtọ.

⁵Ọnọọkịla-à wụ ọngịnyị ọnyịịla ẹjẹ, ọlabwẹla onyobyi tị ka ju ka ẹpwụ nya oyoyi bala ẹpẹpẹ.

⁶Ọhịhị ọnyịịla kaa gbe ọngọ la irya ọnyịịla, ọhọbịrị kaa kpa ta ọlọkwọ ayịreji.

⁷Ọlẹbyahị ọhẹ kpa ịlọmwụ lala ọlụdụ, ịngịngịhyẹ ochechekureche kpá ọ́ tị la ka. Ọngọkịla ọhẹ kpa ịlọmwụ nya ọlẹbyahị, ọ tị kpụ ụdụ ọtụka-ọtụka.

⁸Okpoko ọlụdụ à kaa ya nyẹ egbeju nya ịlọmwụ lẹ, ọngọhẹ-ẹ́ tị hwahwa jahị da ọlẹbyahị kpụ ọ ka chị uko ka.

⁹Ahịgboo nya ọlabwẹla ọnyịịla kaa hụ́ kịlahị-ịlahị, otinika nya ọlọkwọ tị ka mịrị tẹm-m.

¹⁰Ahị ohihi kaa kpa arụ ọrụrụ wẹ eji, ọngọ wo ọmẹjẹ ri ọngọ jẹ ẹla.

¹¹Ụdụ ọkpụkpụ lụnyẹ-lụnyẹ kaa ta eji ahyaahị, ụdụ ọ-kpụ dụmwọ-dụmwọ bwula ụkụrwọ ọ-họ myị kaa nwa kịlahị-ịlahị.

¹²Ọ-ka da ẹhị ọrịrịị-rịrị nya ọngịnyị giri-giri kaa chị ọkịlẹtụ pyẹpyẹ, ang ọlẹ ká ọngịnyị á nwụ imyi nyamwụ-ụ́ tị họ jịra, ọọ kpa ọkẹkẹnị wẹ ọngọọwa.

¹³Ọngọ pwa ẹla ọmẹjẹ kpa akama wẹ ịlọmwụ, ọngọ tị ba ẹla ọmẹjẹ jẹ̀ ka la okpunyi.

¹⁴Ang ọmẹjẹ nya ọngọ jẹ ẹla ri ẹmwụ nya ọhịhị, ọ ka kpang cheji ba ang ọ-kpụ igu.

¹⁵Ẹla ọjẹjẹ họ ká ọngịnyị la ihi, ụgbẹyị nya ọngọ la kpẹẹkpẹẹ ka tị ka kpụ okiro haa.

¹⁶Ọngọ jẹ ẹla kaa me irya ju ẹla ene kọ ka họọ, oluchi tị kaa ya ẹmwa nyamwụ chị ehe.

¹⁷Ọlẹrụ onyobyi kaa gu ẹla rị e-eji, ọlẹrụ o-ju ọdahịhile kaa kpa okpunyi wẹ eji.

¹⁸Ọngọ myị ọmẹjẹ ka pẹ ẹbyahị bala oyoyi ẹpwa, ọngọ ke ụrụ la ọmẹjẹ ka la ihi.

¹⁹Ọ chakpa kpụ ịpyọ nyọka la ang ọlẹ kọ mang ma, oluchi-í tịị myị ọ-tụ hi ang onyobyi ọhọhọ ka.

²⁰Á ju ogu ta angị jẹ ẹla, à ka jẹ ẹla, á tị dịrẹ aluchi aalẹ, a họ ịlọng elego lẹ.

²¹Inyiribyi-ì be dịrẹ ọlọhọbịrị, ịlahị ọkaka tị ri uhwa nya ọlabwẹla ọnyịịla.

²²Ọngịnyị ọnyịịla kaa la ang-ugu ọ-nọ gbe anyị ịtụma nyamwụ, ụdụ ọkpụkpụ nya ọlọhọbịrị tị ju ụjị gbe ọlabwẹla ọnyịịla.

²³Ịnọ ọpyị nya ẹrụ nya ọkpehika ka há ang-ẹrụ kpá ha ka gbeng, ọ-họ ri tu ọkịrọrọ nya angịnyị tị myị ọ ya wu ẹrụ ka.

²⁴Á nwụ̀ ọnyị nyang rịrị ka aalẹ, ọnyị ọọwa-á háng ka. Ọnyị nyang-ńg hang aalẹ, à ka mẹ ẹla jọọ nwọọ rịrị.

²⁵Ọlabwẹla ọnyịịla kaa ye ang ri wu ẹpwụ, imyi tị kaa nwụ ọngọ onyobyi lẹpwụ họ chịrẹ̀rẹ.