Read idege Etu 14 Bible Online

Etu 14 - idege bible

Etu 14

¹Ọnyang ọ-jẹ ẹla wu ẹpwa kpa kpá kwẹhụ ka, ẹmwa nyamwụ tị ka gu ẹpwa yahị kụrụ eji myị.

²Ọngọ họ ẹla ọkpakpa ju ihi nya Amkpaa, ọngọ la ọhịhị obíri-bìri aalẹ, ọngọọwa-á ju ihi nyamwụ ka.

³Ọbọọchẹ oluchi wụrụ akama ha ịlọmwụ bwula ẹla ọyaya nyamwụ, ẹla ọlọnụ nya ọngọ jẹ ẹla tịị chẹwụ kọọ.

⁴Ịna ị-kpa wu ẹrụ-ụ́ ji ka, ukuna kaa da uhuhwo, ị́ tị ji lẹ, ukuna myị̀ pwẹẹpwẹẹ.

⁵Olibeenu ọkpẹẹkpẹẹ-ẹ́ẹ̀ me ọnụ ka, olibeenu ọnọọkịla-áà ye ẹlẹhẹ ya da ọnọọkịla ka.

⁶Ọngọ kpa ọngịnyị họ tịtọ nya ẹla ọjẹjẹ, ọ́ tị ka ye ka, ang ọjẹjẹ tịị rụda hụlẹẹ ha ọngọ jẹ ẹla.

⁷Rụ bwu ẹga nya oluchi, ọ́ la ẹla ọhẹ-lọhẹ ka mẹjẹng ka.

⁸Bwula ẹla ọjẹjẹ nya ọngọ jẹ ẹla kaa jẹ ang ọlẹ kọ ka họ, oluchi-ì da ịlọmwụ lụgbaa kem.

⁹Ang onyobyi ọhọhọ-ọ́ ri oluchi ẹla ka, ọlabwẹla ọnyịịla tịị jẹ abyị nya ịlọmwụ, ọọ bịlẹ ọhịnyọhi.

¹⁰Ọjụjụ nyang ri ịnyang-ịnyang, ọkẹkẹnị nyang ri ịnyang-ịnyang, ị́ jẹ-ẹ̀ gwọọ ene ha ọngọkịla ka.

¹¹Ẹpwa nya ọlabwẹla onyobyi ka ta ayịreji, ịnya ọngịnyị ọnyịịla tị ka godayị giri-giri.

¹²Ụgbẹyị ọhẹ juwa kpá ká ọngịnyị me nyị la kpakpa, ọ tịị cheju i-igu.

¹³Ọngịnyị ka kpa ẹhụ ọ-ọnụ layiiji ọ-ọkịlẹtụ myị, ọkẹkẹnị-ị́ myị kpa, ọjụjụ tị ka hi juwa.

¹⁴Ọngịnyị onyobyi ka ye uri nya ang onyobyi nyamwụ, ọngịnyị ọnyịịla tịtị ka ye uri nya ang ọnyịịla nyamwụ ịnyịnyị.

¹⁵Ọngọ jẹ ẹla ka kaa ye ẹla myị ẹla myị, ọngọ jẹ ẹla tị kaa kụ irya ju ọgụ ẹpẹtẹ ọlẹ kọ ka hu.

¹⁶Ọngọ jẹ ẹla kaa kpẹhị chịng, cheji ba ẹla, oluchi tịị hụ́ kokooko gbajị ju ka ẹpwụ nya ẹla wurum.

¹⁷Ọngọ ju agbama hyaa kaa họ ẹla uchi-uchi, olirikichi kaa wụ angịnyị ẹjẹ.

¹⁸Oluchi ye ẹga ya ẹmwa ju, ọngọ jẹ ẹla tịị kpụ ụdụ nya ẹla ọjẹjẹ.

¹⁹Angịnyị inyibyi ka kpa abwọ chịbagụ ha alabwẹla ọnyịịla, ị ka juwa bịlẹ ụbwọ ọdada nyaa.

²⁰Ọlẹbyahị kaa wụ ọng myị ọng ẹjẹ tụ aanaa, ọlụdụ tị la iru nya aligu.

²¹O-hu ọngịnyị ọọnang tẹbẹlẹ ri ang ọtịpyọ, ọngọ họ ọlẹbyahị ọnahị ka pyẹ̀ẹẹ.

²²Á me obyi nya ang onyobyi aalẹ, à chị ụchụụ wẹẹ, á me Irya nya ang ọnyịịla aalẹ, angịnyị ka dahịhileng.

²³Ụkụrwọ ọhọhọ la apyobwuna oyeye, ọ-hụhụ kem ya ẹla hwolo-hwolo ka kpang ka ri ọlẹbyahị.

²⁴Uri oyeye nya angị jẹ ẹla ri ụdụ ọkpụkpụ, aga ọmama nya oluchi tịị kpa uchi ọ-gụ olene warị.

²⁵Olibeenu nya ịlẹhị kaa chị ọhịhị da, olibeenu ọnọọkịla tị ri ọngọ pịrị ọngịnyị ha.

²⁶Ihi nya Amkpaa ojuju ya okpunyi ha ọngịnyị, ọọwa ri ẹga o-ye kpịbaa ha anyị nyamwụ.

²⁷Ihi nya Amkpaa ojuju ri ẹmwụ-enyi nya ọhịhị, bwula ọọwa ọngịnyị à kaa cheji ba igu lẹ.

²⁸Iru ojuju nya angịnyị à ri ụmụmẹ nya adịrahụ lẹ, ó-ri kọ la angịnyị ka, adịrahụ oriri nyamwụ ri ododu

²⁹Ọngọ wu agbama nyamwụ kpa myị ri ọngọ jẹ ẹla, ọlagbama ri ọngọ họ ẹla uchi-uchi.

³⁰Okpunyi ọlọkịlẹtụ ya ọkpịra-kpịra ha ịnyịrọ, ijiiji ọlala kaa rụ ọngịnyị ila e-ekpinegu.

³¹Ọngọ tụ okpehika pịpyị do Ohe Oluhye ọlẹ kọ họọ, ọnahị ọ-họ ọlẹbyahị tị ri ihi o-ju Ohe Oluhye ju.

³²Ang onyobyi ọhọhọ nya alabwẹla onyobyi kpaa kaka ta ayịreji, ọlabwẹla ọnyịịla-á gbugbu, ọ ye ẹga ọkpịbaa.

³³Ẹla ọjẹjẹ ji ọkịlẹtụ nya ọngọ jẹ ẹla, oluchi-í tị jẹ ẹlẹlẹhẹ ka.

³⁴Abwẹla ọnyịịla kaa kpa epwoja kịlahị, ma ọhọbịrị kaa hu oyoyi ju angịnyị.

³⁵Ọnchẹ ọ-jẹ ẹla kaa há adịrahụ, ọ tị ka yẹ ọnchẹ ọ-họ ẹla uchi-uchi akama.