Read idege Etu 15 Bible Online

Etu 15 - idege bible

Etu 15

¹Ẹla ọ-wẹ kpẹnẹ kaa chụ agbama hi, ẹla ọbwarị-bwarị kaa du agbama ju ọngịnyị.

²Ẹla ọjẹjẹ kaa bwu ọnụ nya ọngọ jẹ ẹla, oluchi tị ka kpa ọnụ nyamwụ ya ẹmwa nya ẹla.

³Amkpaa yẹ ang ọlẹ kọ juwa họ ẹ-ẹga myị ẹga, juwa yẹ ọhọhọ ịnyịịla tụ ịtịpyọ.

⁴Ẹla oyaya ọdụmwọ kaa kpa ọhịhị warị wẹ ọngịnyị, ẹla obiri-bìri bịrị ọngịnyị olegu.

⁵Oluchi kaa nyẹẹkpẹ da ẹla ọmẹjẹ nya adamwụ, ọngọ jẹ ẹla tị kaa wo ọmẹjẹ.

⁶Ẹpwa nya ọlabwẹla ọnyịịla kaa chutu, akama tị kaa gu ụdụ nya ọngọ onyobyi cheji.

⁷Ọngọ jẹ ẹla kaa kpa ẹla ọjẹjẹ pyebile, oluchi tị kaa jụ ọwẹ họ myị ka.

⁸Iya ọkịlaakịla nya ọngịnyị onyobyi kaa wụ Amkpaa ẹjẹ, abwọ ọrịrị nya ọlabwẹla ọnyịịla tị họ́ọ.

⁹Ụgbẹyị nya angịnyị inyibyi wụ Amkpaa ẹjẹ, ọ tịị la ọháha ẹ-ẹga nya angị kaa họ ang ọnyịịla.

¹⁰Ị ka yẹ ọngọ họ ang onyobyi akama ọtụka-ọtụka, ọngọ ka myị alibyi ka kaa jẹ lẹtẹ kaka hị ori.

¹¹Ejegu ri ejegu, Amkpaa yọyị dọọ ewewa, ẹla-ịyẹ ọlọkịlẹtụ nya ọngịnyị ehe à tị́ ka kpọọ ịbaa myị?

¹²Angị nwà ọbọọchẹ-ẹ́ẹ̀ myị ọnụ nya alibyi o-ya laa ka, ịị tịtọ nya ẹla ọmẹjẹ bwu ẹga nya angị jẹ ẹla gwaa ka.

¹³Ọngịnyị-ị́ chị ọkẹkẹnị, ẹhị nyamwụ-ụ̀ pwọkpuru, ọjụjụ ọlọkịlẹtụ tịị bịrị ẹhị ọlẹpwụ-ẹhị chịkẹ-chịkẹ.

¹⁴Ọngọ jẹ ẹla kaa tịtọ nya ang ọjẹjẹ, ẹmwa tị ri ang o-ri wu ẹpwụ nya oluchi.

¹⁵Ọhịhị nya ọlẹbyahị myị̀ lakanya-akanya kpọrịkọọ, ọhịhị o-ju ịpyọ tị lala ọhụhụ nya ụya ọyaya ọpyịyọọ.

¹⁶Ang o-ye pyịnyẹng luhi nya Amkpaa ojuju hagụ ọ-ka kpụ ụdụ ká tị ka ji ẹpwụ nya akama.

¹⁷Ó-ri apwụ kem ká ye juwa ri bala angịlẹ kanụ há awụlẹ, ọ hagụ ọ-ka juwa ri iyo ọlahịchịng bala angịlẹ kanụ wụ awụlẹ ẹjẹ.

¹⁸Ọlagbama kaa ju ọmwụ nya arụ, ọngọ dọhụ pịlẹẹ tị kaa ká arụ.

¹⁹Ọlụchụ-atịra kaa tọ ang ịnyaanyaa ụ-ụgbẹyị nyamwụ, ụgbẹyị nya ọngịnyị ọnyịịla tị la kpụrụrụ.

²⁰Ọnyị ọ-jẹ ẹla du ká adamwụ chị ọkẹkẹnị, oluchi tịị yẹhị da ịnamwụ bwee.

²¹Uchi ọchịchị ri ọkẹkẹnị ha angị la irya ka, ọngọ jẹ ẹla tị kaa họ ang opwoku.

²²Irya ọnyịịla o-ju awụlẹ-ẹ́ ji ka, ịlahị ọkaka-áà ji ka. Irya o-juju nya angịnyị lụmẹ-lụmẹ họ ká ang hiigu.

²³Ẹla ọ-wẹ pwoku há ọng myị ọng, ẹla ọ-wẹ pwoku lụka opwoku chakpa hiigu.

²⁴Ọngọ jẹ ẹla kaa dịrẹ ụgbẹyị ọlẹ kọ ka dọọ gẹdẹ ju ka ẹpwụ nya ọhịhị, cheji ba hi ọlẹ kọ ka kpẹẹ nyụrụrụ ju ka ejegu.

²⁵Amkpaa kaa ta ẹpwa nya ọlọbọọchẹ ayịreji, ọ tịị chẹwụ ke ọpyị nya ahụ-ogu.

²⁶Irya onyobyi omeme wụ Amkpaa ẹjẹ, ẹla ọ-kpụ umwu tị kaa kpọọ ịpyọ.

²⁷Ọngọ họ iwo nyọka ri apyobwuna obíri-bìri kpa akama ọkịla wẹ ẹpwa nyamwụ, ọngọ chẹhị piri hi okpoko ochikiriju ka hị tata.

²⁸Ọngịnyị ọnyịịla kaa me irya ju ẹla ene kọọ ya, ọngọ onyobyi tị kaa ya uguru-ẹla ọlẹ kọ wẹ ọnụ nyamwụ.

²⁹Amkpaa ji hwẹ̀ẹẹ hi angịnyị inyibyi, ọ tị kaa wo abwọ ọrịrị nya ọlabwẹla ọnyịịla.

³⁰Ụmwẹhụ ọchịchị kpa ọkẹkẹnị wẹ ọngịnyị, oja ọnyịịla owowo họ lịnyịrọ da ọngịnyị cháaa.

³¹Ọngọ myị ke ụrụ la alibyi ọnyịịla, ka ri ọngọ jẹ ẹla.

³²Ọngọ pwa ẹla ọmẹjẹ aalẹ, ọ họ ịlọmwụ elego, ọngọ myị ẹla ọmẹjẹ ka jẹ ẹla.

³³Ihi nya Amkpaa ojuju kaa mẹ ẹla jẹ ọngịnyị, ọngịnyị kaa kpa ịlọmwụ keji ene nya ihi ọlala.