Read idege Etu 16 Bible Online

Etu 16 - idege bible

Etu 16

¹Ọngịnyị ehe ka me irya nya ịlọmwụ kpá myị, Amkpaa-à tị la ọ-họ jịra nyamwụ lẹ.

²Ọngịnyị ka me kpá ang ịnyịịla ọwa nyaa kaa họ lẹ, Amkpaa-à tịị wụla irya ọlẹ ká ọngọọwa kaa me yẹ lẹ.

³Hu obyi omeme nyang ju Amkpaa ụ-ụbwọ mẹ, ọ ka họ ká ka haa wuu lọchịkpẹẹ.

⁴Amkpaa la ang odudu kọ kpa họ ang myị ang, ọ họ ọngọ onyobyi nọ gbe ayịreji ọtata.

⁵Ọngọ hi ahị wụ Amkpaa ẹjẹ, ọngọ ọlịnyị-ị́ ka dayi la ọ-yẹ akama kaka.

⁶Ọngịnyị kpa ịlọmwụ keji bala ọ-họ kpẹẹkpẹẹ, Ohe Oluhye ka hịnyọhi ịhọbịrị nyamwụ họọ, á ju ihi nya Amkpaa, ang onyobyi ka ya hwẹ̀ẹ hing.

⁷Ẹla nya ọngịnyị-ị́ kpụ Amkpaa ịpyọ, ọọ họ aluji nya ọngọọwa kaa yẹ ri aligu nyamwụ

⁸Ang ọpyịnyẹng ọ-lala lụgbẹyị ọnyịịla, hagụ ọ-ka kpụ ụdụ chàkụ-chākụ bwula angịnyị ọ-họ ri.

⁹Ọngịnyị ka me obyi nyamwụ kpá wuu myị, Amkpaa-à tị kaa kpa ụgbẹyị lẹ.

¹⁰Ọhe Oluhye à kaa chụ ẹla ju adịrahụ ọ-ọnụ lẹ, eje ọlala nyamwụ kaa la kpakpa.

¹¹Ọchanjẹ ọlam ọ-kpa me ang Amkpaa-à tịtọ lẹ, ọwa-à hunọ jaabwọ kị ka me ang ọnyọnyọọnyị lẹ.

¹²Ang onyobyi ọhọhọ kaa wụ adịrahụ ẹjẹ, abwẹla ọnyịịla à du ká ọpyị ọkpakpa nyamwụ ka yeji giri-giri lẹ.

¹³Ela nya ịlẹhị oyaya à há adịrahụ lẹ, ọngọ ya ẹla nya ịlẹhị kaa họ́ọ.

¹⁴Agbama ojuju nya adịrahụ ka kpụ igu ha ọngịnyị myị, ọngọ jẹ ẹla ka tụ ịpẹpẹ hụ adịrahụ.

¹⁵Adịrahụ chị ụmwẹhụ, ọngịnyị jẹ-ẹ̀ họ hǹgǹg, ọnahị ọhọhọ nyamwụ lala egbamwụ nya enyi ọ-chị eji nya ọgbanyẹ.

¹⁶Ẹla ọjẹjẹ ọ-ka lala hagụ okpoko ịgọm, ang ọjẹjẹ tị hagụ ọkpoko onyoowuru ịnyịnyị.

¹⁷Ụgbẹyị ogede ọlẹ ká ọlabwẹla ọnyịịla kaa bwu kpọọ cheji ba ang onyobyi, obyiyo o-gbe ịlọmwụ à ri adubyi lẹ.

¹⁸Ọbọọchẹ ohihi kpa ayịreji wẹ ọngịnyị, ahị ohihi kpa ọngịnyị kaka mịla eji.

¹⁹Á kpa ịlọng nya okpehika, ká kụ ta alẹbyahị, ọ hagụ ọ-ka ju abwọ-ang ri ta alọbọọchẹ ẹ-ẹpwụ nya ang ịlẹ kị nu angịnyị lagbụrụ.

²⁰Ọngọ hiri ụrụ kpẹẹ ha ọmẹjẹ ka kịlahị, ọngọ dahịhile Amkpaa ka pyẹ̀ẹẹ.

²¹Ịị jẹ ọngọ jẹ ang bwula ẹla ọjẹjẹ nyamwụ, ọmẹjẹ ọgẹnẹ-gẹnẹ nyamwụ há angịnyị lowowo.

²²Ẹla ọjẹjẹ ri ẹmwụ nya ọhịhị ha ọngọ jẹ ẹla, uchi ọchịchị nya oluchi tị kpa akama wọọ.

²³Irya nya ọngọ jẹ ẹla kpọọ ụgbẹyị nya ẹla oyaya, ẹla oyaya nyamwụ mẹ ang o-ju apyobwuna jẹ.

²⁴Ẹla ọgẹnẹ-gẹnẹ oyaya lala ịnwa, ọ kpụ ugbodu okpukpuru ịpyọ, ọ da ịnyịrọ cháaa.

²⁵Ụgbẹyị ọhẹ juwa kpá ká ọngịnyị me nyị la kpakpa, ọ tịị cheju i-igu.

²⁶Imyi ọlẹpwụ kpa ọngịnyị họ ụkụrwọ kịlahị-ịlahị, imyi ọọwa-à gwọọ gbịla lẹ.

²⁷Alachị nya angịnyị kaa me obyi onyobyi, ẹla ọlọnụ nyaa chị ịnyịrọ pwuu lala ịla.

²⁸Ọlụmwọnụ kaa kpa arụ ọrụrụ dịnya, ọọ gu ẹla rịrị e-eji chị aligu ebwo.

²⁹Ọlabwẹga kaa pịrị ọngịnyị ọọnamwụ ju, kpọọ kaka họ ang onyobyi.

³⁰Ọngọ mwụ ọngịnyị ahị la ẹla onyobyi ọkpịbaa ọhẹ, ọngọ mwụ ọngịnyị ịna tịtọ nya ang onyobyi ọhọhọ.

³¹Inyi iwuru lala okpo-adịrahụ olihi-ihi, ehe oriri ri uri nya abwẹla ọnyịịla ọhọhọ.

³²Ọ-ka ri ọngọ da ọhụ pịlẹẹ hagụ ọngịrị ọlala, ọ-ka jụ ịlọng wu kpa hagụ ọ-ka kụrụ iru nya epweji.

³³Angịnyị kaa da iwo nyọka jẹ ang ọlẹ kị ka họ, Amkpaa lịlọmwụ à tịị jẹ ọlẹ kọ ka ri lẹ.