Read idege Etu 17 Bible Online

Etu 17 - idege bible

Etu 17

¹Ó-ri une nya ịkaa ọnwọnwụ ká ye ri ẹ-ẹpwụ nya okpunyi, ọ hagụ ọ-ka la ọhụhụ nya ang oriri ọtụka-ọtụka ẹ-ẹga ká o-wo lawụlẹ-ka ji.

²Ọnchẹ ọ-jẹ ẹla ka ye iwe nya ụchị-ọnyị nya ayịbamwụ la, ọ ka la ang-ugu nya ugbiyegu ọọwa ịnyịnyị.

³Ị kaa ma okpoko ịgọm bala ọkpoko onyoowuru yẹ lila, Amkpaa-à tị kaa ma ọkịlẹtụ yẹ lẹ.

⁴Alabwẹla onyobyi kaa gbarụ pyooo nya ẹla onyobyi, alọnọọkịla tị kaa ke ụrụ lịnịịkịla imeme.

⁵Ọngọ kpa ọlẹbyahị họ do Ohe Oluhye ọlẹ kọ họọ, ehe ọ-byị ọngịnyị byị-ị́ ri ọkẹkẹnị nyang aalẹ, à ka yẹ akama ịnyịnyị.

⁶Anyị ịtụma ri ọkẹkẹnị nya adaa ịgbahị, adịda ịgbahị tịtị ri ọkẹkẹnị nya anyị ịtụma nyaa.

⁷Ọnụ-ẹla ọ-kpa yẹẹyẹẹ pwoku ọnụ nya oluchi ka, ọnọọkịla omeme-é chịla ọnụ nya adịrahụ ka.

⁸Okpoko ochikiriju họ ụkụrwọ lala ogbo, ọọ tụ uhwa ha ọngọ hwọọ ha.

⁹Ọngọ chị ịpyị ba abyị tịtọ nya o-hi aanịna ri, ọngọ kpa abyị chị rịrị ọngịnyị chị igu oriri ebwo.

¹⁰Alibyi oyaya ju apyobwuna ha ọngọ la irya, á wa oluchi ọnụ-ugboji ohu kụrụ iwo wẹwẹ, ọ́ tị ka jẹ ẹla gụ olene ka.

¹¹Ọngịnyị onyobyi tịtọ nya egbeju ọnyọọngịrị ọlala pyịyọọ, ọlẹrụ o-jujwo nya ọngịnyị ka ị tị ka du kaka yọọ akama lẹ.

¹²Ọ la uhi-uhi nyọka tọ oluchi ẹ-ẹpwụ nya ụkụrwọ nya uchi nyamwụ, gụ ọ-ka gbachị ọnarwọ ọnyang ọlẹ kị nọọ anyị.

¹³Ọngọ ya ang ọtịpyọ nwụ uri nya ang ọnyịịla aalẹ, ang onyobyi-ị́ ka jẹ-ẹ̀ rụ hi ẹpwa nyamwụ kpá kaka.

¹⁴Arụ ọrụrụ kaa dọmwụ pyịnyẹng jaabwọ ká ọhwọ́ọ̀ kaa chị iwa, aa kpọọ ba ene kọ ka kpụ oyomo-yomo mẹ.

¹⁵Ọngọ ya eje wu ọlabwẹla ọnyịịla bala ọngọ ya eje rụ ọlabwẹla onyobyi wụ Amkpaa ẹjẹ lawụlẹ-awụlẹ.

¹⁶O-hu okpoko nwụ uri nya ube-ụpwụ ha oluchi ri ang ọdaarụ, chajị ọ́ myị ọnụ nya ang ọjẹjẹ ka.

¹⁷Aligu kaa há awụlẹ ụka wuu, aanịna-à yẹrwa nya awụlẹ lụka nya ọbaba.

¹⁸Ọngọ la irya ka yubwọ nya ọngịnyị, ya ịlọmwụ godayị wọnụ nya oluri ju.

¹⁹Ọngọlẹ ká arụ ọrụrụ-ụ́ há, ọhọbịrị họ́ọ ịnyịnyị, ọngọ hu ịlọmwụ gidogboo juwa pẹ akama ẹpwa.

²⁰Ọngọ la ọkịlẹtụ onyobyi-í ka kịlahị ka, ọngọ họ ẹla bíri-bìri kaa kpụ ẹpwụ nya akama.

²¹Ọnyị oluchi ri olujwo tọ adamwụ, adịda nya ọnyị oluchi-í kaa chị ọkẹkẹnị ka.

²²Ọkẹkẹnị ọlọkịlẹtụ du ká ịnyịrọ da ọngịnyị cháaa, ayiiji tịị bịrị ọngịnyị olegu.

²³Ọngịnyị onyobyi kaa ye okpoko ochikiriju ịbaa-ịbaa kọ ka pyị eje ọkpakpa anyoko.

²⁴Ọngọ jẹ ang kaa ya ẹhị rịrị ka ẹga nya ẹla ọjẹjẹ, oluchi tị kaa yọyị hwolo-hwolo tụ odehe-odehe da.

²⁵Ọnyị oluchi kaa kpa olujwo ọtọtọ wẹ adamwụ, ọọ kpa ijẹma ọchịchị wẹ ịnamwụ.

²⁶Ọ́ hiigu nyọka chị ọngọ da ẹlẹlẹhẹ-ka ijwo ka, ọ-ka wu ọngịnyị ọnyịịla nyi kpuukpuu ododu ri ang ọtịpyọ.

²⁷Ọngọ jẹ ẹla-á ya ala ju iru ka, ọngọ jẹ ẹla kaa wu agbama nyamwụ kpa.

²⁸Oluchi-í wu ịlọmwụ kpa hụ kem, ọ ka me angịnyị ọngọ jẹ ẹla, ọ́ ya ọnụ bawụlẹ, ị kaa yọọ lala ọngọ jẹ ang.